السلام عليكم، هو أولا الزواج لازم يقوم على التكافؤ (الاجتماعي والتعليمي والفكري) ولازم يكون فيه قبول وتوافق بين الطرفين... حتى لو على دين وخلق، التكافؤ ضروري وواقعيا انعدامه بيعمل مشاكل في الزواج. فيه ناس كتير طبعا متعلمة لكن دينيا وأخلاقيا أقل بكتير من ناس مش متعلمة والعكس، جايز ابن عمك على دين وخلق وأحسن من ناس متعلمين كتير وممكن مش كده. الفكرة إن في الغالب كتير شباب لما بيكون فيه فرق في التعليم والفكر وحتى الطبقة الاجتماعية بيحسوا بنقص وده بيؤثر سلبا على علاقتهم بزوجاتهم وبيبدأ الزوج يتعامل مع زوجته بحساسية أكبر وكل كلمة أو تصرف منها ولو عادي يبدأ يفسره على أساس إنها بتنتقصه أو شايفة نفسها أعلى منه. طبعا لكل قاعدة شواذ وأنا شفت نماذج رغم الفرق محترمين وبيحبوا زوجاتهم وشفت العكس ده يرجع لشخصية الرجل ونفسيته. والله أعلم ابن عمك شخصيته ونفسيته تبع أي فريق... العشرة وحدها والتعامل هو اللي هيظهر معدن الشخص. بالنسبة لكلام أهلك فصحيح ممكن تاخدي واحد متعلم ويكون شر لك بس إيه المانع تنتظري تلاقي حد متعلم ومتوافق معك ويكون على خلق ودين وإن شاء الله يكون خير لك. إذا محتارة بين أفكارك ومخاوفك وبين رأي أهلك فممكن تصلي استخارة وتعطيه فرصة. اركني مشاعرك الإيجابية والسلبية ناحية ابن عمك واتركي الخيار بتسليم تام لله وإن شاء الله لو فيه خير في الزواج فرينا هييسره وهيرضيك به ولو كان عكس هيبعده عنك من غير ما تعملي حاجة. إذا ربنا قدر وحصلت خطوبة فعندك فرصة تدرسيه براحتك ومتخليش ضغط أي حد يؤثر عليك وعلى قراراتك. دي حياتك ومستقبلك فخدي وقتك وراحتك تماما واحكمي بعقلك مش بقلبك. وربنا يوفقك للي فيه الخير.
لعرض الإجابة في فدني اضغط هنا