السلام عليكم، لو أنتِ لسه مخلصة امتحانات فممكن جسمك وعقلك محتاجين يفصلوا وطبيعي بعد فترة ضغط تحسي بانعدام الطاقة والشغف وعدم القدرة على فعل أي شيء. إذا بقالك فترة مخلصة امتحانات والمفروض أخدتِ فترة راحة كافية فده ينقلنا للاحتمال التاني اللي غالبًا هيكون السبب وهو إنك حولتِ الموضوع لإلزام. ** أي حاجة هنحولها لإلزام، طبيعي العقل هيبدأ يضع لنا مبررات عشان نتهرب من عملها وهتلاقي نفسك بتهربي عن طريق التسويف بطرق مختلفة، النهاردة مفيش طاقة، بكرة تعبانة بسبب سهري على الموبايل. إدمانك للموبايل في حد ذاته نوع من الهرب من المسؤولية اللي فرضتِها على نفسك وإنه لازم وحتمًا أستغل الإجازة واتعلم حاجة قبل ما تخلص. ** الحل، إنك تمارسي على عقلك خدع نفسية عشان تخرجي من إحساس الإلزام والضغط. متفكريش في الموضوع إنه واجب ولو فات يوم معرفتيش تبقي فاشلة، فكري باستمتاع وفضول، قولي لنفسك إنك مش هتذاكري ولا هتدرسي الحاجة الفلانية، فكري بس أنا هعرف إيه جديد النهاردة، معلومات إيه اللي هعرفها النهاردة عن نفسي وعن الحياة من حواليا. *** قولي لنفسك إنهم بس عشر دقائق هتقرأي فيهم ولو صفحة من كتاب أو رواية، عشر دقائق هشوف فيديو مثلا اكسب منه معلومة مكنتش أعرفها أو اعرف عن مهارة معينة أو اتعلم إزاي أرسم حاجة بسيطة زي وردة. ** وعلى فكرة... أول كم دقيقة.. أول خطوة هتاخديها هتكون الأصعب بس لو أخدتِها هتلاقي الوقت سرقك وأنت بتقرأي أو بترسمي أو بتتعلمي كلمات في لغة جديدة مثلا. هتلاقي العشر دقائق بقوا نصف ساعة وبعدين بقوا ساعة وكل يوم هيزيدوا. ** الأهم بقى من كل اللي فات إنك متقصريش في صلاتك وعلاقتك بربنا وتدعيه دائما يرزقك العلم النافع ورددي كتير (لا حول ولا قوة إلا بالله) الذكر ده قادر يغير حياتك تمامًا بإذن الله. بالتوفيق.
اوكى شكرا ليكى
تم النشر السبت، ٥ يوليو ٢٠٢٥
لعرض الإجابة في فدني اضغط هنا