السلام عليكم، مشاعرك طبيعية واستنزافك بعد اللي مريتِ به أمر طبيعي ومش مطلوب منك إنك تجبري نفسك ترجعي طبيعية وتنسي كل حاجة على طول. خدي وقتك في التعافي. الزمن كفيل ينسي ويداوي أي جروح. فاصبري على نفسك واعطيها كل الوقت اللي محتاجاه. *** والموضوع مش هيتحل بمقاومة التفكير فيه أو نسيان الأذى اللي تعرضتِ له أو ذكرياتك مع الشخص ده أيا كانت، لو قاومتِ وحاولت تجبري نفسك على عدم التفكير هتفكر ومش هتقدر تاخد وقتها في التعافي، الحل إنك ترجعي تمارسي حياتك وتغيري روتينك وتتخلصي من الطاقة السلبية واحدة واحدة، إنك تفوقي لنفسك وتعرفي إن محدش يستحق تضيعي حياتك وعمرك ووقتك الغالي بسببه وتستهلكي مشاعرك ونفسيتك. فكري نفسك بكل الأسباب اللي لازم ترجعي أحسن عشانها وليه تستحقي تكوني في حال ووضع أفضل وتعاملي مع الماضي إنه كان درس مهما كان قاسي فأنتِ أكيد تعلمتِ منه عشان متكرريش الغلط ده مرة تانية. أيا كان اللي حصل في العلاقة دي فتعلمي منه واعرفي إزاي تحافظي على كرامتك وحقوقك ومتخليش حد أبدا ييجي عليكِ. ابدئي تعلمي عن العلاقات السوية ويا ريت لو عندك هوايات أو مهارات معينة تنزلي ورش خاصة بها وتتفاعلي مع الناس اللي بتشاركك الاهتمامات دي الخطوة دي هتساعدك تخرجي من الفقاعة اللي حابسة نفسك بها من إحساس الخذلان ولوم النفس والأسف على الماضي. اخرجي برا الفقاعة دي واسمحي لنفسك تشوف الامور من زاوية جديدة وتحس بشعور النجاة وإنها كانت محظوظة بنجاتها من علاقة سامة كانت هتدمرها تماما. فالألم اللي بتحسي به حاليا كان هيبقى أضعاف مضاعفة لو استمريتِ مع شخص مؤذي... فكرري الكلام ده على نفسك لحد ما ينغرس جواها وتعتنقه كحقيقة وتفوق للواقع والمستقبل. استعيني بالله وابدئي، وربنا يوفقك ويكتب لك اللي فيه الخير. 💚💚
لعرض الإجابة في فدني اضغط هنا