كان في بنت زميلتي في المدرسة و اول سنة أعرفها فيها حبيتهاو كنت عاوزة ابقى صديقة مقربة ليها و عملت عشانها حاجات كتير عشان اقدر اقرب منها ذي مثلا اني كنت بنصحها و بساعدها و كنت بهتم لكلامها جدا لدرجة انه مرة من المرات كانت بتتكلم عادي و بتقول انها خست اوي الفترة دي عشان كان عندها اكتئاب و انا روحت علطول بعتلها طرق تتخلص منها من الاكتئاب و قولتلها لو عاوزة تتكلم معايا في اي وقت انا موجودة و مش مرة واحدة اقولها كده بل قولتلها كده اكتر من مرة و كنت بنصحها اذاي تتعامل مع واحدة صحبتها و هي بتحبها اوي بس البنت دي مش بتعاملها كويس و بتبعدها عنها و عملت حاجات تانيه كتير عشان اقرب منها بس هي اصلا اتعرفت على زميلة تانية غيري و قربت منها جدا بعد كده اكتئبت جدا بسببها و بسبب حاجات تانية و أدركت وقتها انها مش مهتمه بوجودي اصلا و ان انا عندي تعلق مرضي مش اكتر و بعد كده تفهمت الموضوع كله و تقبلت فكرة انها مش شايفاني كصديقة ليها و قولت خلاص عادي نفضل زملاء و كنت برضو بتعامل معاها كويس و لما بتسألني في حاجة بساعدها لكن هي حتى كزميلة ما احترمتنيش يعني مثلا كنت بروح معاها قبل كده الحصص بس هي بعد كده كانت كل مرة قبل ميعاد الحصة بشوية تبعتلي و تقولي انها هتتأخر شوية و اني اروح انا الحصة بصراحة وقتها فكرت انها ممكن تكون مش عاوزة تمشي معايا بس بعد كده فضلت ألتمس لها العذر يعني مثلا ممكن تكون كانت عاوزة تروح متأخر شوية عشان انا بنزل بدري عن الحصة بنص ساعة و كده و الدنيا مشت و كله تمام و كنا بنروح مع بعض بعد الحصص هي و زميلة تانيه و الزميلة دي هي البنت الي قربت منها و كده بس في مرة كنا خلصنا الحصة و مروحين راحت قالت قدامي للبنت التانية " انا عاوزاكي في موضوع لوحدينا ينفع نمشي لوحدينا؟" بإسلوب الي هو كأنها عاوزة تخليني اضايق او اغير او ايا كان بس عموما كان سلوك متعمد مليون في المية و كان بطريقة بجد وقحة جدا و ردة فعلي على السلوك ده اني مشيت و سيبتهم من غير اي كلمة و من وقتها بدأت اني أكرهها لأن هي عملت حاجات تانيه قبل الموقف دي ذي ان في الحصة كنا مثلا نقعد جمب بعض و نتكلم و كده و اول ما تيجي الزميلة التانية الي قربت منها تروح تقوم من جمبي و تقعد في حتة تانية مع زميلتها و انا قولت عادي يمكن هي بتحب تقعد جمبها و كده و الموضوع عدى بعد كده برضو كانت دايما اول ما تقابل زميلتها تفضل تتصرف بشكل الي هو انا عاوزة اغيظك ان عندي صديقة مقربة و انتي لا يعني تفضل تتكلم و تتصرف و تضحك بصوت عالي بشكل في نوع من الكيد (مش عارفة اشرح اذاي كان تصرفها بس اي حد مكاني كان هيحس بكده برضو) و انا مهتمتش برضو و مع كل المواقف دي بدأت اكرهها و مبقتش بستحملها
عارفين الشخصية الي تحسوا انها تقيلة او بتسحب طاقتكم منكم او بتحسوا بعدم الارتياح حواليها؟ هي كانت كده بالنسبة ليا و قررت وقتها اني اقعد عنها لانها مش اول و آخر زميلة عندي و اتعرفت على زملاء غيرها و غير البنت الي قريبة منها و بعدت عنهم و بجد و الله العظيم و ربنا عالم اني مش بكذب اول ما بعدت عنها حسيت انه حياتي بقت اكتر سعادة من قبل كده و ان بقيت مرتاحة اكتر و راضية عن نفسي اكتر من قبل كده و خلاص بقيت بتعامل معاها كأنها مش موجودة و زميلاتي الي عارفينها بدأوا يلاحظوا اني بتجاهلها و مش طيقاها فمرة واحدة منهم سألتني انا حساكي مش طايقة فلانة روحت قولتلها اه و قولتلها كل الي ذكرته فوق بالإضافة ان كمان كانت بتغير مني لأني متفوقة في الدراسة و جميلة و ده مش رأيي عن نفسي بل ده رأيي الناس و المدرسين فيا عشان كنت بتكرم كتير من المدرسين و كمان الناس بتعجب بشكلي و تمدحني و كده و كانت كل مرة اروح فيها الحصة تفضل تقولي بطريقة الي هو هزار بس في نفس الوقت اي حد يقدر يعرف من طريقتها انها غيرانة او بتحسد و كانت بتقولي " طبعا مذاكرة و هتقفلي الامتحان ذي كل مرة" و كل مرة تفضل تقول الجملة دي يعني حتى لو هزار كانت هتقول كده مرة مرتين بالكتير لكن دي كل مرة كده و بطريقة غيرة و حقد و كمان ده مش رأيي انا بس عنها بل كمان زميلاتي الي يعرفوها كانت بتتعامل معاهم كده برضو ذي مثلا انها تاخد زميلتها التانية قدامهم و تمشي و تسيبهم ذي ما عملت معايا و ذي انها بتحسد و بتغير من درجاتهم و كده و في مرة برضو كنت قاعدة و لقيتها هي و زميلتها قعدوا جمبي و انا مبقتش برتاح لما اقعد جمبهم فقومت ببساطة و قعدت جنب زميلة ليا غيرهم راحت قالت لزميلتها و انا سامعاها سيبيها تلاقيها غيرانه اننا مقربين و برضو في مرة هي في امتحان جابت أعلى مني بدرجة راحت قالت لزميلتها بطريقة و كأنها عملت انجاز "انا جبت أعلى منها" و انا سامعاهم و كل حاجه مدحتني فيها قبل كده اتحسدت فيها ذي ان بشرتي بيضة و صافية و اني بعرف استنتج معلومات من الدروس و اني شاطرة كل ده اتحسدت فيه و فضلت فترة ما يقارب ٣ شهور او شهرين مكتئبة و مش بذاكر إطلاقا و درجات قلت جدا و طول الوقت نايمة و مش بعمل حاجه و من دكتور لدكتور و حاليا بعد ما الحمد الله اتحسنت جدا جدا و درجاتي رجعت لمستواها و أعلى و بشرتي اتحسنت تاني و بعدت عنها و اتعرفت على غيرها كتير هي مازلت بتحاول تقرب مني تاني ذي ان لما بتكلم مع زميلاتي تروح تنط في الكلام و تتكلم معانا و انا بتجاهلها و ذي انها بتحاول ترجع تهزر و تتكلم معايا تاني و كأنها معملتش اي حاجه و كمان برضو زميلاتي الي كانت بتعمل معاهم نفس الي عملته معايا بقت بتحاول تتكلم معاهم تاني و كمان كانت في مرة بتكلم زميلتي و تقولها انا اتخزوقت (الي هو حد خذلها و كده) و فضلت تحسبن قدامي و زميلتي راحت قالتلي بعد كده انا حاسة انها قصدها عليكي و المشكلة انها اصلا مش بتعتذر يعني انتي غلطي و عارفة انك غلطانة لكن بدل ما تعتذر عايشة دور الضحية الي كل الناس بتخذلها و انا مش عارفة اتصرف معاها اذاي لأني تجاهلتها كتير و رغم ده هي مازالت بتحاول ترجع تتكلم معايا تاني فإيه افضل طريقة اتعامل فيها مع اشخاص ذيها؟ و اسفة جدا على الكلام الكتير ده
انتى حاطاها محور الحياه ليه انتى قررتى خلاص انها متستاهلش تكون قريبة منك.....فالافضل تخلى مسافه بينك وبينها وتوقفى انتى ترجمة اى حاجة منها على انها ليكى او تربطيها باى حاجة تخصك وحتى لو حبيتى تختصرى واجهيها ..قوليلها لو تقصدينى بكلامك فمفيش داعى استمرارك بالشكل ده هيتعبك على الفاضى
تم النشر الأربعاء، ١٧ يناير ٢٠٢٤
بصي دي انسانه مؤضيه وزباله كانت عايزك تخليكي فاشله وتزعلك واول ما ققرتي تبعدي عنها وتشوفي حياتك ونجحتي فيها قررت ترجعلك تاني ولابسه دور الضحيه اياكي ترجعي تكلميها ولا تعبريها لان لو كلمتيها هتتقرب منك وسنه سنه هتبعدك عن كل صحابك اللي حواليكي وتتطمن انها استفردت بيكي بعدها هتمارس عليكي اساليبها المدمره دي اياكي ترجعي تعبريها ركزي في حياتك وفي صحابك الكويسين
تم النشر الخميس، ١٨ يناير ٢٠٢٤
موضوع وانتهى .. طلعيها بقى من دماغك تماما. ومش كل حاجه تاخديها عليكي منها علشان هتتعبي على الفاضي ومشاعرك هتستنزف. استمري في تجاهلك ليها واي كلام يدور بينها وبين اي حد كأنك ولا سامعه ولا شايفة. كأنها مش موجودة.
تم النشر الأربعاء، ١٧ يناير ٢٠٢٤
كل واحد عنده عيوب ومشاكل نفسية واجتماعية، ظاهرية وباطنية، هي بتعمل تصرفات سيئة بتسيء اليكي وبتجرحك ومشاعرك بس هي بعدين هتندم ضميرها هيوجعها وهتيجي تعتذر ايا كان، بس عادي احنا بنتعلم والناس بتغلط وبتبقى واقعة في فتنة بس هيوعوا لا محالة .. خدي موقف صلب منها وشوفي غيرها رافقيه وامشي معاه، وخلي العلاقة سطحية وأنصحك ماتعتمديش على حد انه دايم، دي نصيحة
تم النشر الثلاثاء، ١٦ يناير ٢٠٢٤
العفو بالتوفيق ي حبيبتي ♥
تم النشر الثلاثاء، ١٦ يناير ٢٠٢٤
شكرا جدا💖
تم النشر الثلاثاء، ١٦ يناير ٢٠٢٤
لازم برضو التجاهل الداخلي ابعديها عن تفكيرك وخليكي واثقه انك طالما معملتيش اي حاجه غلط ف انتي مش الطرف السئ ولا حاجه
تم النشر الثلاثاء، ١٦ يناير ٢٠٢٤
انا بعمل كده فعلا بتجاهلها بس هي معايا في أغلب الحصص و كل مرة مش برد عليها و بتجاهلها بحس اني الي غلطانة او ان انا الطرف السيء في الموضوع
تم النشر الثلاثاء، ١٦ يناير ٢٠٢٤
التجاهل ثم التجاهل وتجاهل خارجي وداخلي ركزي علي نفسك ومستقبلك وحياتك الصحاب كتير اختاري الي تناسب اخلاقك وشخصيتك وحاولي الابتعاد عن البنوته دي وصحابها واماكن تواجدها
تم النشر الثلاثاء، ١٦ يناير ٢٠٢٤
لعرض السؤال في فدني اضغط هنا