مساء النور. حبيبتي انتي كدا فطرتك اللي ربنا خلقك عليها سليمه ودا الأصل ان ميكونش ليكي اي علاقه برجال اجانب عنك ، هم مش حابين دا .. يبقى عيب فيهم مش فيكي . ولكن فرقي بين حاجتين وهم الخجل المذموم زي انك تكسفي ترفضي حاجه مش مريحاكي او متعرفيش تتكلمي كويس مع الناس وشخصيتك ضعيفه مثلا فهنا محتاجين نصلحها ، أما لو اللي عندك حياء وبعد عن مواطن الاختلاط وكثرة الكلام مع الرجال بدون سبب فدي صفه محموده وتدل على إيمانك . النقطة التانيه وهي الزواج .. لازم تفهمي وتفهمي اهلك انه رزق من اللّه ومكتوب فوقت محدد إن شاء اللّه وان تدعي ربنا بالزوج الصالح وانتي تصلحي من نفسك وكدا تبقي اخدتي بالأسباب . فمتزعليش خالص، اللي يتكلم يتكلم ، لأن الناس مش بتسكت فأي حال من الأحوال وخلي اعصابك تلاجه ولو حد كلمك تقولي دا رزق من اللّه وربنا هيكرمني في الوقت المناسب بالشخص المناسب . بخصوص العرسان فلو مش مرتاحه للأول ومش حابه شكل التاني فارفضي الإتنين عادي لأن القبول من أساسيات الزواج اللي لا غنى عنها ، ومتقبليش بأي حد غير اللي تحسي براحه تجاهه لأن دا عمر مش لعبه . ربنا يكتبلك الخير .
لعرض الإجابة في فدني اضغط هنا