السلام عليكم أول حاجة عايزك تعرفيها وتتأكدي منها: إنتي مش شخصيتك ضعيفة اللي إنتي فيه ده اسمه إنهاك نفسي واحتراق من كتر ما بتيجي على نفسك عشان ترضي اللي حواليكي إنتي شيلتي أدوار مش بتاعتك زى حوار جدتك دا وده طبيعي يخليكي مجهدة ومصدعة ومش طايقة كلمة. إنتي مش مسؤولة عن علاقة مامتك بجدتك الساعتين اللي بتنزليهم عشان تحمي مامتك من الكلام هما هما الساعتين اللي بيسحبوا من طاقتك وبيخلوكي تكرهي النزول. حاولي توازني، لو النزول ده هيأذيكي نفسياً وبقيتي مش طايقاه، قلليه بالتدريج علشان مع الوقت هيحصل تراكم نفسيا وتتأذى نفسيا أهلك بيحبوكي، بس طريقتهم ونبرة التقليل اللي بيتعاملوا بيها دي مشكلتهم هما وأسلوب تربيتهم اللي اتعودوا عليه، مش معناها إنك قليلة أو ملكيش قيمة متخليش رأيهم في أي حاجة بتعمليها يحدد إنتي مين. جربي واغلطي.. دي حياتك: مفيش حد بيتعلم من غير ما يغلط ويمشي في السكة بنفسه لو فضلتي مستنية موافقتهم وتشجيعهم على كل خطوة، مش هتحركي من مكانك. اعملي الحاجات اللي بتحبيها وشايفاها صح طالما مش بتغضبي ربنا حتى لو هما عارضوها في الأول مع الوقت لما يلاقوكي صممتي ونجحتي هيتعودوا ويثقوا فيكي + اتعلمى تقولى لا الكبت اللي جواكي ده غلط وطالما هما مش بيستحملوا نبرة الحزن وبيشوفوها نكد متشتكيش ليهم. أخرجي بره الدايرة دي اتكلمي مع صاحبة بتثقي فيها أو اكتبي اللي جواكي في ورق وفضّي شحنتك بعيد عنهم عشان تعرفي تتعاملي معاهم ببرود أعصاب ربنا يعينك وييسر أمرك
اتمنى تعملى كدا فعلا 🤍 ربنا يوفقك وييسر أمرك 🖤
تم النشر الاثنين، ٦ يوليو ٢٠٢٦
فعلا انا حاسة ان محتاجة اكبر دماغي شوية مش كأنانية بس افكر نفسي دايما ان محاولش امنع حاجات معينة انها تحصل بإني اضغط نفسي و كل دا علي حساب وقتي و مستقبلي و انا اللي هندم بعدين
تم النشر الأحد، ٥ يوليو ٢٠٢٦
شكرا جدا لوقت حضرتك @أحمد سعيد
تم النشر الأحد، ٥ يوليو ٢٠٢٦
بصىى هو فية قرار فيه بعض الأنانية بس الأنسب ... والدتك كدا كدا طول عمرها معاها وطول عمرها بتتعامل معاها ف حاولى تعملى نفسك من بنها فى التعامل ما بينهم لازم تحاولى تقللى دا لأن ضغطك وتعبك ممكن يتراكم مع الوقت ونفسيتك وشخصك هى الأهم من دا كلة
تم النشر الأحد، ٥ يوليو ٢٠٢٦
مش ببطل محاولة بجد دا يوميا حرفيا جدتي بتضايق و بتزيد فيها اكتر ف كبرت دماغي و بقيت بحاول اواسي امي افكرها انها تستحمل معلش هما ساعتين و فعلا امي بتهدي بس ترجع تحكيلي اللي جدتي عملته ف ارجع افكرها انها تعملها و كله في ميزان حسناتها بس لو مكنتش موجودة كل حاجة بترجع تاني لأن للأسف هما موجودين مع بعض علي طول و امي بتبقي مش عايزة تتعامل مع جدتي فتخليني انا اللي اتعامل و لو قررت اروح اخرج اعمل اي حاجة بيأثر علي يومي ان ببقي متضايقة يكلموني و انا مش فاضية فبضغط اكتر
تم النشر الأحد، ٥ يوليو ٢٠٢٦
أصلا 🙂 طب ما تخلى والدتك متتأثرش بالكلام دا وتتعامل بمعاملتها هى مع خالاتك وكدا وانتى لازم تقعدى مع جدتك مره واتني وتلاتة وانتوا رايقين تفهميها ومتمليش من دا فاهمة
تم النشر الأحد، ٥ يوليو ٢٠٢٦
و الله لو زوجة ابنها كان هيبقي اهون عليا لان عارفة ان كتير من الحموات بيبقي ليهم تفكير غريب كدا من ناحية زوجة الإبن و التعلق بالابن بس امي تبقي بنتها و قرايبي من كتر شكوي جدتي شايلين من امي و معدش في تواصل زي الأول احنا كنا عيلة بنخرج سوا و امي و اخواتها كانوا علطول دايما مع بعض دلوقتي يدوب يسلموا علي بعض
تم النشر الأحد، ٥ يوليو ٢٠٢٦
الله يعينك الله يعينك ويؤجرك على ذلك ..... طالما نيتك لله عز وجل استحملى وبجد معظم الجدات كدا فى حتة التقليل من زوجة ابنها بس فى الغالب بيبقى قلبهم طيب ف استحملى لعل ربنا يرزقك أحلامك بعملك دا الله يعينك وييسر أمرك 🤍
تم النشر الأحد، ٥ يوليو ٢٠٢٦
الفكرة انه صعب اقلل نزولي لأن باخد بالي من ادوية جدتي و الدكاترة و كل قرايبي معتمدين عليا في الجزء دا لما بنبقي عند دكتور مبيعرفوش يردوا علي أسئلة الدكاترة غير ان لو حصل اي حاجة او جدتي احتاجت اي حاجة بيكلموني انا اتصرف انا كل دا مش مضايقني دايما الحمد لله بفكر نفسي بأجر دا في الآخرة بإذن الله بس الفكرة في الضغط و طريقة جدتي في التعامل و كلامها عن امي قدام اي حد تشتكي و دا خلى الأخوات يشيلوا من بعض و انا جربت اقول لجدتي قبل كدا متعملش كدا و ان اللي بتعمله دا نتيجته ايه بس و لا اي نتيجة لدرجة تغلط في امي قدام اي حد انا ببقي عايزة اتعصب و ازعق و لكن و لا هيفيد بأي حاجة و هبقي انا كمان اللي غلطانة دا غير ان جدتي متقدرش تعمل حاجة لنفسها فبضطر استحمل و اعديها
تم النشر الأحد، ٥ يوليو ٢٠٢٦
العفو 🤍
تم النشر الأحد، ٥ يوليو ٢٠٢٦
شكرا جدا لحضرتك
تم النشر الأحد، ٥ يوليو ٢٠٢٦
لعرض الإجابة في فدني اضغط هنا