بعتذر ان مش عارفة اكتب كلام مترتب و بعتذر جدا علي الإطالة بس بحس اننا شخصية ضعيفة تحديدا مع أهلي و دا مأثر عليا خارجيا بتأثر برأي اللي حواليا بجد عايزة اعرف ازاي اعمل الحاجة اللي بحبها عادي حتي لو غلط و اتعلم واكون علي طبيعتي بشوفهم لما بيعجبوا بناس بيبرروا تصرفاتهم الغلط و بيشوفوهم ناس كويسة مع ان دا نفس الحاجة اللي شايفنها غلط انا كنت هعملها بس ازاي انا كدا غلط يعني مثلا يشوفوا بنت بتعمل محتوي كويس يشكروا فيها و يشوفها اللي هو كل انسان في الحلو و الوحش لكن لو انا عايزة اعمل الحاجة دي لا ، مبرضاش أقول لا لأهلي علي حاجة عشان بحس ان لو معترضة او حاجة اننا قليلة او ان مليش قيمة و انا ببقي عايزاهم دايما حبني وشايفني كبيرة حتي لو علي مصلحة حاجة بحبها يعني انا لو جيت اعمل حاجة بحبها و هما شايفين ان الحاجة اللي هعملها اللي هو بيقولوها بطريقة انتي هتعملي كدا و بنبرة تقليل مع ان ببقي فرحانه ان هعمل الحاجة اللي بحبها الا ان مجرد ما بيعملوا كدا بفضل افكر كتير اننا مثلا وحشة عشان هعمل كدا انا احيانا كتير مببقاش عارفة حاجات اللي انا هعملها كويسة و لا لا بس انا ببقي نفسي اجرب و اعرف و يبقي ليا شخصية علي الرغم ان بشوف اخواتي بيعترضوا عادي و عادي يعني دا مش مقلل منهم في حاجة انا بقي دايما مطيعة و لا عارفة اوصل احساسي و لا ايه اللي جوايا بكبت جوايا و خلاص لأن لما باجي اتكلم و انا متضايقة مثلا مع ان بتكلم بهدوء بس باين في صوتي نبرة الحزن و الخنقة مش بيبقوا حابين يسمعوا عشان مش عايزين نكد بس الحمد لله ان بوصل لهم و بقولهم لما مبيبقوش عايزين يسمعوا اقولهم اننا بنتهم و لازم يسمعوني و انا متضايقة لو مش هما اللي هيستحملوني مين اللي هيستحمل ف بكبت جوايا غير كدا مش عارفة ليه دايما عاملة زي الأم اللي بتخاف علي عيالها و علي كل اللي حواليها شايلة هم كل حد اعرفه لما كنت بتحط في أنشطة كنت ببقي زي الأم اللي خايفة علي عيالها و في البيت كذلك مبقتش حابة العيلة خايفة اسيب امي مع قرايبي دقيقة واحدة لأنهم مبيعرفوش يتفاهموا سوا ف بضطر انا احاول اغطي علي دا عشان محدش يؤذي امي بكلمة تزعلها فبنزل لجدتي كل يوم لأن لو منزلتش هتفضل تشتكي لكل الناس قاعدة في البيت و محدش بيسأل و مشوفناش خلقتك و كلام لا يطاق بالنسبالي و استحمل كلامها علي امي تقعد تقولي امك عملت اكل ميتاكلش و يقرف و غيره كلام كتير ف بقيت احاول علي قد ما اقدر انزل اشوف هتاكل ايه دا غير انها جدتي مشيلة الأخوات من بعض بكلامها عن أمي انا بجد مبحبش انزل لها بس طبعا مبحسسش امي بكدا ابدا بالعكس بحاول اصبرها و اقولها معلش ست كبيرة حاولي تستحملي الساعتين اللي بتنزليلها فيها و كله في ميزان حسناتك لأن والدتي من النوع اللي بيبان في تعبيرات وشها بحاول اقولها حاولي تستحملي بس الساعتين اللي بتنزليهم بس برضه وشها بيبان عليها و جدتي بتبقي مش طايقة منها حاجة و خالاتي لما بيجوا لجدتي بتبقي فرحانة بيهم جدا و مبتعملش معاهم اللي بتعملوا مع امي و دا بيزعل امي اكتر و انا حاليا صدعت من كتر التفكير ان عايزة اشوف حياتي و مبقاش شايلة هم الموضوع دا و بجد معدتش عايزة انزل لجدتي بس للأسف لو منزلتش يوم بتقول للكل ان منزلتش و هما يقعدوا يقولولي ليه و انتي وراكي ايه مانتي قاعدة في البيت مفيهاش حاجة لو نزلتي و انا طبعا مقدرش ان جدتي اسلوبها مش كويس و اللي بتعمله لأن جربت اقول قبل كدا و اتهاجمت انا و امي انا عارفة ان عيلتي مش وحشين يمكن تصرفاتهم دي اللي وحشة بس هما ليهم حاجات حلوة بس دا كان زمان معدتش فيه حاجة حلوة خالص دلوقتي حتي تشفع للحاجات اللي بتحصل دي دا يوم ما حتي فكرت نتجمع علي حاجة حلوة ياريتني ما جمعتهم
السلام عليكم أول حاجة عايزك تعرفيها وتتأكدي منها: إنتي مش شخصيتك ضعيفة اللي إنتي فيه ده اسمه إنهاك نفسي واحتراق من كتر ما بتيجي على نفسك عشان ترضي اللي حواليكي إنتي شيلتي أدوار مش بتاعتك زى حوار جدتك دا وده طبيعي يخليكي مجهدة ومصدعة ومش طايقة كلمة. إنتي مش مسؤولة عن علاقة مامتك بجدتك الساعتين اللي بتنزليهم عشان تحمي مامتك من الكلام هما هما الساعتين اللي بيسحبوا من طاقتك وبيخلوكي تكرهي النزول. حاولي توازني، لو النزول ده هيأذيكي نفسياً وبقيتي مش طايقاه، قلليه بالتدريج علشان مع الوقت هيحصل تراكم نفسيا وتتأذى نفسيا أهلك بيحبوكي، بس طريقتهم ونبرة التقليل اللي بيتعاملوا بيها دي مشكلتهم هما وأسلوب تربيتهم اللي اتعودوا عليه، مش معناها إنك قليلة أو ملكيش قيمة متخليش رأيهم في أي حاجة بتعمليها يحدد إنتي مين. جربي واغلطي.. دي حياتك: مفيش حد بيتعلم من غير ما يغلط ويمشي في السكة بنفسه لو فضلتي مستنية موافقتهم وتشجيعهم على كل خطوة، مش هتحركي من مكانك. اعملي الحاجات اللي بتحبيها وشايفاها صح طالما مش بتغضبي ربنا حتى لو هما عارضوها في الأول مع الوقت لما يلاقوكي صممتي ونجحتي هيتعودوا ويثقوا فيكي + اتعلمى تقولى لا الكبت اللي جواكي ده غلط وطالما هما مش بيستحملوا نبرة الحزن وبيشوفوها نكد متشتكيش ليهم. أخرجي بره الدايرة دي اتكلمي مع صاحبة بتثقي فيها أو اكتبي اللي جواكي في ورق وفضّي شحنتك بعيد عنهم عشان تعرفي تتعاملي معاهم ببرود أعصاب ربنا يعينك وييسر أمرك
تم النشر السبت، ٤ يوليو ٢٠٢٦
أول حاجة، أنا فاهمة إحساسك تمامًا ومش هقولك "متفكريش كده" لأن اللي بتمرّي بيه حقيقي ومؤلم. إحساس إن شخصيتك ضعيفة قدام أهلك، وإنك مش قادرة تعبري عن نفسك أو تجربي حاجة تحبيها بدون ما تحسي بالذنب أو التقليل، ده بيخلّي الواحدة تحس إنها محاصرة. بس الحقيقة إن الشخصية مش بتتغير بين يوم وليلة، وإنك قادرة تبنيها خطوة بخطوة بدون ما تخسري علاقتك بأهلك أو تحسي إنك "قليلة". ابدئي بخطوات صغيرة جدًا عشان متضغطيش على نفسك. مثلاً، لما تحبي تعملي حاجة (حتى لو بسيطة زي لبس معين أو نشاط)، قولي رأيك بهدوء وباختصار بدون ما تبرري كتير. قولي "أنا بحب أجرب كده" أو "هعمل كده وأشوف النتيجة". المهم إنك متستنيش موافقتهم الكاملة، لأن موافقتهم مش هتيجي فجأة لو هما متعودين على الطاعة المطلقة. ولو قالوا كلام فيه تقليل، ردّي بهدوء "أنا فاهمة رأيكم، بس هجرب". ده مش عصيان، ده تعبير عن نفسك، وفي الإسلام ربنا أمرنا بالبر بالوالدين لكن مش على حساب إننا نكبت نفسنا أو نضرّها. تاني حاجة مهمة: مارسي قول "لا" في مواقف صغيرة أولًا. ابدئي بـ"مش هقدر أنزل النهاردة" أو "عندي حاجة تانية". لو حسيتِ بالذنب، فكّري إنك مش بتأذي حد، إنتِ بس بتحمي طاقتك. وبالنسبة لجدتك وأمك، أنتِ مش مسؤولة عن سعادة الكل. حاولي تحطي حدود واضحة، زي إنك تنزلي يومين في الأسبوع بس، وتقولي لأمك إنك محتاجة وقت لنفسك. ده مش أنانية، ده توازن، وربنا بيحب التوازن. أخيرًا، ابدئي تكتبي يوميًا 3 حاجات عملتيها عشان نفسك (حتى لو صغيرة). ده هيساعدك تشوفي إنك ليكِ قيمة مستقلة. ولو عايزة تتكلمي أكتر عن مواقف معينة بتحصل معاكِ، أنا هنا. ابحثي كمان عن أسئلة مشابهة على فدني عشان تشوفي تجارب بنات تانيين. أنتِ مش ضعيفة، إنتِ بس محتاجة تمارسي القوة بهدوء وثبات.
تم النشر السبت، ٤ يوليو ٢٠٢٦
تاخدي الشجاعه كده وتقولي للحاجه اللي مش عايزه تعمليها لا انا مش عايز اعمل كده
تم النشر السبت، ٤ يوليو ٢٠٢٦
انا الصغيرة احنا بنتين و ولدين @Yasmine Tawfik
تم النشر الأحد، ٥ يوليو ٢٠٢٦
ترتيبك الكام فى اخواتك ؟ واخواتك بنات ولا ذكور ؟
تم النشر السبت، ٤ يوليو ٢٠٢٦
لعرض السؤال في فدني اضغط هنا