عليكم السلام ورحمة الله وبركاته اعتذر عن التأخر في الرد أولًا بحييكي إنك قادرة تحددي المشكلة فين بالظبط، لإنه ده جزء كبير من الحل بإذن الله. الحقيقة إنه مربط الفرس موجود في كلامك ... (الريلز) واللي مع تكرار متابعتها لفترة طويلة بتصيب الدماغ بحاجة اسمها تعفن الدماغ .. وهي باختصار وبوضوح كل اللي انت قلتيه، عدم القدرة على القيام بأي شيء يتطلب تشغيل دماغ سيكة، ولا التركيز مع أي حاجة رتمها بطيء زي المحاضرات وقراءة الكتب والقرآن وما يشابههم فأول حل هنبدأ بيه هو إننا نبعد عن الريلز تمامًا. شيلي التطبيق اللي بتسمعيها عليه سواء فيس بوك أو تيك توك.. وطبعا الوقت بتاعك لازم تشغلي نفسك فيه بشيء ممتع ومفيد في نفس الوقت وإلا هيجيلك شعور بالملل والفتور وبالتالي مش هتتحملي وترجعي تاني لمشاهدتها وأنا عن تجربة باقترح إنه الشهر الأول تكون الأنشطة اللي هتمارسيها خفيفة وسهلة وممتعة علشان النفس بتكون لسه مش متعودة على الضغوط الفكرية .. فممكن نقول إنه لو بتحبي الرسم تجهزي كراستك وألوان إن شاء الله ألوان خشب وتبدأي ترسمي أي حاجة تخطر في بالك، لو مش بتعرفي ترسمي زي حالتي ابدأي دوري على النت عن طرق سهلة لرسم بعض الأشكال أنا مثلا بحب رسمة اسمها جلاكسي، وليها طرق مختلفة للرسم سواء بألوان الاكليرك أو الخشب أو حتى الشمع ممكن لو بتحبي ترسمي حيوانات تكتبي طريقة رسم كذا وهيطلع لك طرق مختلفة تتعلمي بيها أنا عن نفسي بحب الرسم الحر حتى لو هشخبط من الحاجات كمان اللي ممكن تمارسيها قراءة كتب خفيفة جدًا أو روايات بحيث القصص تجذبك وتخليكي تقدري تستمري في القراءة، من القصص الممتعة بالنسبة لي والمفيدة برضوا سلسلة قصص ما وراء الطبيعة للعظيم أحمد خالد توفيق ممكن تتعلمي نشاط يدوي بسيط زي التطريز فيه فيديوهات كتير على يوتيوب مجانية تعلمك التطريز من الصفر للاحتراف ممكن تنزلي صالة رياضية (جيم) وتمارسي الرياضة هناك منه تخرجي من البيت وتمارسي رياضة فيه أفكار كتير لأنشطة مختلفة تقدري تشغلي بيها نفسك يوميا بحيث ما تتفرجيش على الريلز لمدة 30 يوم كاملين وأهم نقطة انه هدفك ده يتكتب ويتعلق قدام عينك (مش عايزة اتفرج على الريلز لمدة 30 يوم) وتحطي خطة كاملة لل 30 يوم دول هتعملي ايه كل يوم وتعملي جدول كده لكل يوم تعلمي صح على اليوم اللي قدرتي تنهيه من غير ما تتفرجي على الريلز هتقعي في النص أكيد، ولكن الأهم إنه لما تقعي مش تيأسي وابدأي تاني يوم عادي جدًا، ما حدش بينجح من أول مرة، وبإذن الله هتقدري تعدي 30 يوم من غير ما تدخلي على الريلز تماما أو تشوفيها مجرد ما تتخلصي من مرض الريلز صدقيني كل حاجة هتتحسن بسلاسلة ويسر باذن الله أنا مش هكتر كلام أكتر من كده، وهستناكي ترجعي بعد 30 يوم تقولي لي تخلصت من الريلز بفضل الله، علشان ندخل على الخطوة التانية في طريق جعلك من المتفوقين والنوابغ بإذن الله
ان شاء الله
تم النشر الاثنين، ١٦ مارس ٢٠٢٦
لا شكر على واجب يا جميلة، احنا اخوات وأنا موجودة بإذن الله وقت ما تحتاجيني، ومنتظراكي ترجعي لي بعد شهر بإذن الله وتكتبي إنك قدرتي ما تسمعيش ريلز فيهم علشان ندخل على الخطوة التانية باذن الله
تم النشر الأحد، ١٥ مارس ٢٠٢٦
متشكره جداا والله بجد نا كنت مستنياكى ترد لان بكون عايزه حد يفهمني ويقوللى ع الصح لما ابدا أقرأ قرآن واذاكر التزام يعنى بقع فى ثوانى مش بعرف ارجع تانى التزام بيكون فتره صغيره فدا مشكله بجد نا حبيتك اوى شكرا بجد ع النصايح
تم النشر الأحد، ١٥ مارس ٢٠٢٦
لعرض الإجابة في فدني اضغط هنا