السلام عليكم ورحمة الله وبركاته
نا عندى ٢١ سنه وخاتمة القرآن بس نسيته وبحاول أراجع بس مش عارفه نفسى اوى اتابع قنوات دينيه واقرأ كتب
بس المشكله انى عندى كسل رهيب بقرأ قرآن فى الاسبوع مره وممكن مقرأش ولما اسمع محاضره دينيه اكسل أكملها
وبفضل بقى مشغله الريلز مقاطع الصغيره وبأخر معاد الصلاه ونا ف تمريض وبقيت مش قادره حرفيا اذاكر كأنها تقيله مش عارفه اي إللى بيحصل بجد
تقريبا لما اشغل دماغى بحاجه بتكون محتاجه تفكير ووقت مبكلمهاش يعنى بيهرب من الضغوطات
عايزه اكون شاطره ومثقفه بس مش قادره
اعمل اي @سارة عادل شريف
عليكم السلام ورحمة الله وبركاته اعتذر عن التأخر في الرد أولًا بحييكي إنك قادرة تحددي المشكلة فين بالظبط، لإنه ده جزء كبير من الحل بإذن الله. الحقيقة إنه مربط الفرس موجود في كلامك ... (الريلز) واللي مع تكرار متابعتها لفترة طويلة بتصيب الدماغ بحاجة اسمها تعفن الدماغ .. وهي باختصار وبوضوح كل اللي انت قلتيه، عدم القدرة على القيام بأي شيء يتطلب تشغيل دماغ سيكة، ولا التركيز مع أي حاجة رتمها بطيء زي المحاضرات وقراءة الكتب والقرآن وما يشابههم فأول حل هنبدأ بيه هو إننا نبعد عن الريلز تمامًا. شيلي التطبيق اللي بتسمعيها عليه سواء فيس بوك أو تيك توك.. وطبعا الوقت بتاعك لازم تشغلي نفسك فيه بشيء ممتع ومفيد في نفس الوقت وإلا هيجيلك شعور بالملل والفتور وبالتالي مش هتتحملي وترجعي تاني لمشاهدتها وأنا عن تجربة باقترح إنه الشهر الأول تكون الأنشطة اللي هتمارسيها خفيفة وسهلة وممتعة علشان النفس بتكون لسه مش متعودة على الضغوط الفكرية .. فممكن نقول إنه لو بتحبي الرسم تجهزي كراستك وألوان إن شاء الله ألوان خشب وتبدأي ترسمي أي حاجة تخطر في بالك، لو مش بتعرفي ترسمي زي حالتي ابدأي دوري على النت عن طرق سهلة لرسم بعض الأشكال أنا مثلا بحب رسمة اسمها جلاكسي، وليها طرق مختلفة للرسم سواء بألوان الاكليرك أو الخشب أو حتى الشمع ممكن لو بتحبي ترسمي حيوانات تكتبي طريقة رسم كذا وهيطلع لك طرق مختلفة تتعلمي بيها أنا عن نفسي بحب الرسم الحر حتى لو هشخبط من الحاجات كمان اللي ممكن تمارسيها قراءة كتب خفيفة جدًا أو روايات بحيث القصص تجذبك وتخليكي تقدري تستمري في القراءة، من القصص الممتعة بالنسبة لي والمفيدة برضوا سلسلة قصص ما وراء الطبيعة للعظيم أحمد خالد توفيق ممكن تتعلمي نشاط يدوي بسيط زي التطريز فيه فيديوهات كتير على يوتيوب مجانية تعلمك التطريز من الصفر للاحتراف ممكن تنزلي صالة رياضية (جيم) وتمارسي الرياضة هناك منه تخرجي من البيت وتمارسي رياضة فيه أفكار كتير لأنشطة مختلفة تقدري تشغلي بيها نفسك يوميا بحيث ما تتفرجيش على الريلز لمدة 30 يوم كاملين وأهم نقطة انه هدفك ده يتكتب ويتعلق قدام عينك (مش عايزة اتفرج على الريلز لمدة 30 يوم) وتحطي خطة كاملة لل 30 يوم دول هتعملي ايه كل يوم وتعملي جدول كده لكل يوم تعلمي صح على اليوم اللي قدرتي تنهيه من غير ما تتفرجي على الريلز هتقعي في النص أكيد، ولكن الأهم إنه لما تقعي مش تيأسي وابدأي تاني يوم عادي جدًا، ما حدش بينجح من أول مرة، وبإذن الله هتقدري تعدي 30 يوم من غير ما تدخلي على الريلز تماما أو تشوفيها مجرد ما تتخلصي من مرض الريلز صدقيني كل حاجة هتتحسن بسلاسلة ويسر باذن الله أنا مش هكتر كلام أكتر من كده، وهستناكي ترجعي بعد 30 يوم تقولي لي تخلصت من الريلز بفضل الله، علشان ندخل على الخطوة التانية في طريق جعلك من المتفوقين والنوابغ بإذن الله
تم النشر السبت، ١٤ مارس ٢٠٢٦
قراءة سورة البقرة قدر امستطاع كل يوم وقراءة سورة يس وحاول الانظباط الانظباط انك تعملي شي سيط كل يوم وكل يوم ضيفي مهمه لحد ما تنتظمي وافتكري انك لو ملحقتيش نفسك دلوقتي هتلاقي ناس بتاخد مكان المفروض هو بتاعك انتي الصلاة بقي استغفري كتير احذفي التطبيقات اللي بتلهيكي وادعي وان شاء الله تكوني احسن من الاول
تم النشر الأربعاء، ١٨ مارس ٢٠٢٦
انتي عارفه محتاجه ايه محتاجه تفصلي ع حاجات كتير وتركزي ع نقطه نقطه عشان ترجعي تقفي ع رجلك انتي فهماني
تم النشر الاثنين، ١٦ مارس ٢٠٢٦
الفيديوهات القصيره أسوأ شي ممكن يعمله الشخص في نفسه واحد نفسيتك حتكون بالأرض تنين مزاجك رح يكون متقلب حتشوفي فيديو مضحك هتتضحكي فيديو مبكي رح تبكي وإلى آخره في نفس الوقت جسمك لما يتعود ع الدوبامين السريع بصير يمل لما يعمل شي طويل المده أنصحك توقفيهم ولو اول اسبوع رح تعيشي اعراض انسحابيه بس بعده رح تكوني ابسط بكتير من قبال
تم النشر الأحد، ١٥ مارس ٢٠٢٦
السلام عليكم ورحمة الله وبركاته. بالنسبة لمراجعة القرآن الأفضل تشوفي معلمة وتتابعي وتمشي علي خطة وإن شاء الله الأمر يسير ما دام كنتي حافظة.. اما سماع الدروس فأنا أنصح حضرتك بالاشتـراك في دورات م. علاء حامد ده هيربطك بالسماع غير انك هتلاقي صحبة تشجعك لو حصل فتور.. وبالنسبة لتضييع الوقت في الريلز استحضري انك هتسألي عن كل ثانية بتعدي وهتقفي بين يدي الله وهتشهد عليكي جوارحك فاستغلي وقتك في طاعة الله وامسحي البرامج دي وفقنا الله وإياكم وأسأل الله أن يجعل في كلامي الفائدة لكي بإذن الله.
تم النشر الثلاثاء، ١٧ مارس ٢٠٢٦
لو الحالة مستمرة فكدا الموضوع أصبح معقد ويحتاج طبيب متخصص نفسي
تم النشر الخميس، ١٩ مارس ٢٠٢٦
انا نفسي اختم اوي اوي
تم النشر الثلاثاء، ١٧ مارس ٢٠٢٦
لعرض السؤال في فدني اضغط هنا