انا بحب واحد من محافظة تانية وهو ميعرفنيش خالص بس انا عرفت عنه معلومات كتير وانا بحبه اوي اوي وقربت ادخل ع السنتين وانا بحبه فتنصحوني اعمل ايه
دا غير البنات اللي حواليه يعني لو دخلتله هيفتكرني من البنات المايصات دي انا بجد نفسيتي تحت الصفر انا بحبه وهو مش عارف حتى
وانا بصراحة بستحرم فعشان كده مش بدخل
ادوني نصايح او امل او اي حاجة
يا حبيبتي لازم تفهمي إن اللي أنتي فيه ده استنزاف لروحك مش أكتر، فكرة إنك بقالك سنتين بتراقبي حد وتجمعي عنه معلومات وهو أصلاً ميعرفش إنك موجودة ده مش حب خالص ده اسمه تعلق بوهم أنتي اللي رسمتيه في خيالك، والفرق بين الحب والتعلق إن الحب بيبني الشخص وبيخليه مطمن لكن التعلق بيكسر النفس وبيهد الروح، السنتين اللي ضاعوا من عمرك في مراقبته وعرفتي عنه معلومات، كان أولى بيهم نفسك ومستقبلك. أنتي بتدي مشاعرك لشخص "غريب" تماماً عنك. عايزه اقولك ان البنت زي الجوهرة، مينفعش تروح هي تدور على حد يقتنيها. اللي عايزك بجد هو اللي هيخبط على بابك ويسعى يوصل ليكي، مش أنتي اللي تروحي تحاولي تلفتي نظره.عارفة ليه قلبك واجعك ونفسيتك تحت الصفر؟ عشان علقتي سعادتك "بمخلوق" زيك، لا يملك لنفسه نفعاً ولا ضراً. ربنا بيقول: "وَمِنَ النَّاسِ مَن يَتَّخِذُ مِن دُونِ اللَّهِ أَندَادًا يُحِبُّونَهُمْ كَحُبِّ اللَّهِ". لما بنحب حد أكتر من طاعتنا لربنا أو بنخليه هو محور حياتنا، ربنا بيخلي الشخص ده سبب في تعبنا عشان نرجع لربنا تاني، أنتي مش محتاجة نصيحة إزاي توصلي ليه، أنتي محتاجة نصيحة إزاي "توصلي لنفسك" وتتحرري من القيد ده. اقطعي المراقبة لو سمحتي بطلي تدخلي على بروفايله لأن كل مرة بتشوفي فيها صورته كأنك بتجددي الوجع لنفسك.احذفي أرشيف المعلومات: كل اللي عرفتيه عنه ارميه ورا ظهرك كأنه لم يكن عشان تفضي مساحة في عقلك لحاجات أهم.و حبي نفسك لما تحبي نفسك بجد، مش هتقبلي إنك تكوني في دور "المتفرجة" في حياة حد تاني. الدعاء بالبديل: ادعي دايماً "يا رب ارزقني حبك وحب من يحبك وحب عمل يقربني إلى حبك"، ده اللي هيخلي قلبك شبعان بجد. خدي وقتك في النسيان: متستعجليش، بس خدي خطوات بجد، واعرفي إن كل يوم بيمر وأنتي بعيدة عنه هو انتصار ليكي وغالبا هتكتشفي انه فعلا مش حب ،وفوق كل ده أنتي لسه صغيرة والعمر كله قدامك والناس والأيام هيعلموكي إن دي مجرد مرحلة وهتعدي وتضحكي على نفسك إنك ضيعتي وقت فيها، فبدل ما تستهلكي مشاعرك في حاجة مش موجودةاشغلي وقتك: السنتين دول كتير أوي، ركزي في دراستك، في هواية، في أهلك.. خليكي أنتي الجائزة اللي الناس هي اللي تتمنى توصل ليها ربنا يطمن قلبك ويريح بالك
تم النشر الأربعاء، ٢٩ أبريل ٢٠٢٦
السلام عليكم، لو هعطيكِ نصائح فهي إنك توقفي مراقبة وجمع معلومات وتفهمي إن الحب من طرف واحد ده غالبا بيكون تعلق.. البداية كان إعجاب بحاجة شفتيها فيه وبالظاهر اللي باين لك منه ومع الوقت وطول التفكير فيه وتخيلك لسيناريوهات في عقلك تجمعك به تحول الأمر لتعلق وحب لصورة مرسومة جواكِ ممكن جدا تكون أبعد عن واقع الشخص ده. الخطوة الصح اللي عملتِها إنك مستحرمة تكلميه. انا متفهمة مشاعرك وحالتك وعارفة مش سهل أقول لك تخلصي من مشاعر بقالها سنتين هي مش بضغطة زر، بس لو ركزتِ على نفسك ويومك وأعدت برمجة عقلك إنه يخرج من فكرة الحب الأسطوربة هتقدري مع الوقت تتجاوزي التعلق ده. قلتِ محتاجة أمل، بس هقول لك لمصلحتك بلاش تعلقي نفسك بأمل أو تعلق بشخص معين حتى لو مش الشخص ده، النصيب منعرفش فين ومع مين فعشان متتعلقيش وتحسي بخذلان بعد كده لو محصلش نصيب. ** دلوقتي ركزي على نفسك وطوريها واتعلمي مهارات تفيدكِ في مستقبلك وكل حاجة إن شاء الله هتكون تمام. ربنا معك ويكتب لك اللي فيه الخير.💚💚
تم النشر الخميس، ٣٠ أبريل ٢٠٢٦
بصي هو ما دام حاوليه بنات مايصات و بيتكلم معاهم عادي ايزي بيزي ف ابعدي عنه اكرملك لانه هيشوفك زيهم حتي لو كنتي غير كده و هيعاملك مش احسن حاجة و مش هيقدر مشاعرك خاصة لو انتي بادرتي و افصحتيله بمشاعرك هيشوفك بنت سهلة و مش هتكوني اول اختياراته لما يفكر بجد يتجوز و لو هو بجد حواليه بنات هل انتي متأكدة انه انسان كويس؟ راجل يعتمد عليه؟ مش ولد بتاع بنات لان في فرق وانتي اللي هتتعبي... عارفة النار اللي جواكي دلوقتي بس صدقيني اصبري عليها و هتهدي لوحدها و تبدئي تحكمي عقلك اكتر دايما اعملي حساب نفسك قد اي الفايدة و قد اي الضرر قبل ما تحسبي حساب اي حد تأتي لان بمجرد ما تاخدي خطوة في موضوع زي ده التراجع مش سهل ابدا و ليه عواقب كبيرة...و بعد خمس سنين مش دلوقتي مش هتحسبي المعادلة بنفس الطريقة مش هقولك انك هتبطلي تحبيه بس هتبدئي تقدري نفسك أكتر و تحكمي قلبك قبل مشاعرك و تعملي حساب المستقبل اللي مش دايما وردي خدي خطوة تشكري نفسك عليها بعدين.
تم النشر الخميس، ٣٠ أبريل ٢٠٢٦
يا حبيبتي، أول حاجة أقولك إن اللي بتحسي بيه ده شعور طبيعي جداً، وكتير بنات زيك وقعوا في حب من طرف واحد، بس الجميل إنك ملتزمة بقيمك الإسلامية ومش عايزة تخالفي شرع ربنا – ده يثبت إن قلبك طيب ونفسك سليمة ❤️. نصايح عملية عشان تطلعي من الدائرة دي: اقفلي الصفحة دي خالص : متابعة معلوماته هتزود ألمك بس. احذفي أي حاجة تذكرك بيه، وركزي طاقتك على حياتك. (ده أول خطوة للشفاء، صدقيني). طوري نفسك : ابدئي هواية جديدة زي الرياضة، تعلم مهارة (كورس أونلاين في الطبخ أو التصميم مثلاً)، أو ركزي في دراستك/شغلك. لما تشغلي نفسك، الهوى ده هيروح لوحده. الدعاء والتوكل على الله : صلي، وادعي ربنا يرزقك اللي أحسن لكِ في الدنيا والآخرة. قولي: "اللهم إن كان خير لي فاقدره، وإن مش خير فاصرفه عني". ربنا كريم وقادر يغير القلوب في ثواني! ابحثي عن شريك حقيقي : خلي أهلك يدورولك، أو اشتركي في تطبيقات زواج شرعية موثوقة. الحب الحقيقي بيبدأ بعد التعارف الشرعي، مش من بعيد. نفسيتك تحت الصفر دلوقتي، بس هترتفع إن شاء الله😊 جربي كمان تمشي يومياً نص ساعة، وكلي أكل صحي عشان الجسم يساعد الروح. لو عايزة نصايح أكتر، ابحثي في فدني عن "حب من طرف واحد" هتلاقي إجابات كتير، أو روحي على صفحة الخبراء https://www.fedni.net/experts وخدي استشارة من خبيرة نفسية أو زواجية. أنتِ قوية وهتقدري، ربنا معاكِ! 💪 دعي لي بركة.
تم النشر الأربعاء، ٢٩ أبريل ٢٠٢٦
أولا إنتي لازم تتخلصي من التعلق ده علشان ربنا مايغضبش منك ، وعلشان نفسك اللي هتتبهدل لو التعلق بقا أعمق ، وعلشان زوجك المستقبلي ذنبه إيه إن مشاعرك المفروض ليه تديها لغيره ، ده غير إنك مش هتستمتعي لا لوقتي لإنه حرام ولا بعدين عشان قلبك هيكون أرهق لو كملتي ، ما ينفعش نبقى بجحين مع ربنا يعني نوقع نفسنا في تعلق ومستنيين إن ربنا يخلص قلوبنا من التعلق ده وإحنا كل يوم بتتابع الشخص واخباره، اتق الله في قلبك ،وربنا هيخلصك من التعلق ده بس لما يشوف منك صدق في التغير ولما تبعدي نفسك عن الخطوات اللي بتزود التعلق
تم النشر الخميس، ٣٠ أبريل ٢٠٢٦
انتي عرفتيه ازاي وهو من محافظة تاني وازاي عرفتي أن فيه بنات حوليه
تم النشر الأربعاء، ٢٩ أبريل ٢٠٢٦
لعرض السؤال في فدني اضغط هنا