السلام عليكم، سعيدة إنك وجهتِ لي السؤال وإن شاء الله أقدر أفيدك. أنا قرأت المشكلة لما نزلتِها وكنت ناوية أرد بس للأسف الوقت مكنش مناسب. *** لو عاوزة نصيحتي فابعدي دلوقتي. أولا عشان أنتِ أكيد عارفة إن الارتباط حتى لو الكلام بينكم بكل احترام مينفعش ولا يرضي ربنا وبالأخص كمان مع رفض أهلك. ** ثانيا، عشان أنتِ فترة حساسة سواء من ناحية العمر والمشاعر أو السنة الدراسية اللي أنتِ فيها. قرأت تعليقك لذكية لما قلت تقريبا، إيه المشكلة لما تكوني معه وتركزي برضه على مذاكرتك، والصراحة ده صعب، دخول الحب على الخط بيعطل ويشتت حتى لو أنت فاكرة إنه مش هيحصل. لما تحبي وبالك ينشغل طبيعي جزء كبير من طاقتك يروح في الاتجاه ده وأنت أصلا محتاجة كل تركيزك على مستقبلك. ** أنا فاهمة جدا عمق المسألة بالنسبة لك، وإن اللي أنتِ حاساه دلوقتي حقيقي وصعوبة تخيلك لفكرة البعد عنه وكل ده حقيقي بالنسبة لأنتِ الحالية. أنا مريت بنفس عمرك ففاهمة الفترة دي عاملة إزاي وازاي بنتغير وننضج مع كل يوم وسنة بتعدي، أفكارنا ومشاعرنا حتى أحلامنا وتطلعاتنا للمستقبل ممكن تتغير، فعشان كده بقول لك بلاش تاخدي قرارات محكومة بالعاطفة حتى لو أنت مقتنعة إن اللي أنتِ فيه هو الحب الحقيقي ونصيبك. *** ممكن يكون ردي مش اللي نفسك تسمعيه بس صدقيني لو بتحبي نفسك وعاوزة مصلحتها فعلا اسمعي النصيحة. *** بالنسبة للعلاقة نفسها فأنا شايفة عوائق كتير أولها أهلك وثانيا المستوى التعليمي والمهني. خدي بالك حتى لو أنتِ شايفة إنه إنسان كويس وبيحبك فالتكافؤ أساسي في الزواج. رجالة كتير مش بيحبوا الزوجة تكون أعلى منهم وزواجات كتير فشلت للسبب ده. فتخيلي أنت دخلت كلية كبيرة أو كان لك طموحات عالية، أنت مش ضامنة اللي معك ساعتها حتى لو قال بيحبك مش هيحس بفرق ولا يكره تفوقك عليه، ولا تضمني أنتِ نفسك تفكيرك يتغير بعد كم سنة لما تلاقيكِ في وضع ومستوى معين فتراجعي الواقع وتشوفي إن شريك حياتك لازم يكون في مستواك؟ زي ما قلت احنا بنتغير مع كل يوم وتجارب جديدة في حياتنا. *** أهلك طبعا كان المفروض يتعاملوا بصورة أفضل لكن هم زي أغلب الأهالي متربوش على الأساليب التربوية الصحيحة، بس في الاول الآخر يهمهم مصلحتك وأكيد شايفين الواقع وأبعاده أوضح فشايفين إن مش مناسب لك. *** وأرجو إنك متفكريش تهملي في مذاكرتك عشان متدخليش كلية أعلى منه، أوعي خالص تفكري في حاجة زي كده زي ما بنات تانية عملت، وضحت بمستقبل تعليمي ومهني كويس عشان رجل وفي الآخر ندموا أشد الندم. اختاري الأفضل لك وخلي نفسك أولوية، أي معادلة تانية فيها خسارة لك. *** الأفضل دلوقتي بقى، ابعدي عنه وتألمي شوية أرحم بكتير من لما يزيد التعلق وتلاقي في النهاية برضه مفيش موافقة من أهلك وتتعبي زيادة. ركزي على مذاكرتك وانجحي وطوري من نفسك وتفكيرك وافهمي أكتر يعني إيه زواج وعلاقات سوية متوازنة وإزاي تختاري شريك الحياة الصح، وساعتها هتعرفي تقيمي العلاقة دي فعلا مناسبة لك وهتنجح لو قررتم تاخدوا الخطوة الرسمية ولا لأ. وادعي ربنا يكتب لك اللي فيه الخير من غير ما تعلقي نفسك بشخص معين (أنتِ مش عارفة النصيب فين ولا الخير فين ولا حتى بكرة مكتوب فيه إيه) متغضبيش أهلك واسمعي كلامهم عشان ربنا يرضى عنك ويوفقك. ويا ستي لو بعد كم سنة فضل هو متمسك بك وعاوزك، من غير ما تعملي حاجة هيتقدم لأهلك ويحاول أكتر من مرة لحد ما يقنعهم. وفي الآخر لو لكم نصيب مهما حصل هتجتمعوا ببعض فمتشغليش بالك بده وركزي على الأولوية واختاري نفسك ومصلحتك وبس. أرجو كلامي ميكونش زعلك ويكون وضح لك الصورة شوية ويساعدك تاخدي القرار الصح إن شاء الله، وربنا معك ويوفقك للي فيه الخير.💚💚
آمين يا رب، ربنا يصلح أحوالك ويوفقك.💚
تم النشر الأربعاء، ٤ نوفمبر ٢٠٢٦
تايهة اوي ولله ربنا يقدم اللي فيه الخير
تم النشر الأربعاء، ٤ نوفمبر ٢٠٢٦
العفو يا قمر🥰، إن شاء الله اكون أفدتك فعلا. بالنسبة للأهل وخوفك من ضغطهم على قراراتك، أنت لما تركزي على نجاحك وتطوير نفسك ونضجك الذاتي وتفكيرك هتعززي ثقتك بنفسك وتفهمي حقوقك كويس ووهتقدري ساعتها تواجهي أي حاجة مش عاجباك أو مش في صالحك ومن غير شد أو خلاف مع الاهل هتقدري أصلا تقنعيهم برؤيتك الخاصة واختياراتك إن شاء الله. في نقطة الفلوس، لا تفترضي إن الأهل ماديين أو طماعين وهمهم الفلوس، أنت لسه صغيرة (ومش قصدي بها نقد أو حاجة وحشة) هم أكبر ومسؤولين عن المصاريف وشايفين الوضع الاقتصادي عامل إزاي والدنيا ماشية إزاي وعارفين إن الحب فعلا مش بيأكل عيش وجو "هنعيش سوا حتى لو على عيش وملح بس ونحارب الدنيا عشان حبنا" ده مش حقيقي ولا واقعي وتجارب كتيرة جدا أثبتت ده فهم أكيد باصين للأمور من زاوية تانية وعاوزين لك مكانة وحياة معينة متبهدليش فيها. زي ما قلت، مشاعرك اللي حاساها حاليا حقيقية لكن صدقيني الواقع حاجة تانية، الحب مش كل حاجة ومينفعش يكون هو المحرك وأساس قراراتك الحياتية ولا الأساس الوحيد اللي يفوم عليه الزواج دون عمل حساب للاعتبارات التانية، القلب متقلب والمشاعر غير ثابتة والواقع بيفرض شروطه حتى على الحب فلازم اختياراتك تكون عقلانية عشان تختاري بحكمة وعشان تنجحي في علاقتك مع شريك حياتك مستقبلا. سيبيها على الله وركزي في مذاكرتك وصدقيني مع الوقت وزيادة وعيك ونضجك هتعرفي وقتها تقرري إيه الصح وتعمليه.
تم النشر الثلاثاء، ٣ نوفمبر ٢٠٢٦
مش عارفة اشكرك ازاي ولله ...بس انا هسيبها ل ربنا وهو اللي بيتحكم ف القلوب و قدام يحلها ربنا ...الفكرة اللي مخوفاني كمان ان بردو قدام اهلى يضغطو عليا في الحوارات دي وميبقاش في قرار ليا ...بس اكيد مش هعمل حاجة غصب عني عشان هما بيدورو ع الفلوس مستقليين ب شغله وانا الصراحة بحبه
تم النشر الثلاثاء، ٣ نوفمبر ٢٠٢٦
لعرض الإجابة في فدني اضغط هنا