@Mai Mahfouz الموضوع طويل هحاول اختصر لحد ما اقدر ... انا ارتبطت ب واحد عرفته ف وقت كنت ضعيفة فيه جدا عارفة اني ف تالتة ثانوى صغيرة بس بجد انا عارفة بقول اي ...المهم كنا بنتكلم بكل احترام مفيش اي حاجة وكدا مش ببرر اني صح ...ف ماما راحت عرفت من غير ما تسمعنى ضربتني وخدت التلفون وكسرت الهاند فري ومشكلتها انه من الصعيد وانا من الغربية وازاااي تبصي ل واحد صعيدي مع ان عملت مصايب كتير وهو مكانش بيعاملني غير بكل احترام ... وميكانيكي وانتى مقامك ميكانيكي وكدا ...قولت لاختي الكبيرة قولى لامك تديله فرصة راحت ماما قايلة ل بابا واتضربت ومنعوني من الدروس وكدا...ف قام هو عرف رن ع بابا يطلبني ف الحلال ...بابا راح قاله انا صارف عليها ومكلف وبنتى متبقاش بعيد عني وهي هتبقى دكتورة وانت ميكانيكي وكدا وقاله كلام عليا ذي انا مقدرش اقولك بنتى متربية ولا لا وقال كلام خلا حبيبي يدافع عني وكدا انتهى الكلام ان لا .... ف قولتله استنى ادخل الجامعة سنتين تلاتة وتعالى قالى استنى عادي بس هيتقال نفس الكلام وكلمتهم هتمشي عليكي وحكالى ع اللي حصل وكدا.....ف انا مش عارفة الحل اي غير اني اسيبه عشان بجد مش هينفع ...بعتذر طولت .. انا كنت كتباه ف بوست لوحده بس عايزة آخد رأي حضرتك
السلام عليكم، سعيدة إنك وجهتِ لي السؤال وإن شاء الله أقدر أفيدك. أنا قرأت المشكلة لما نزلتِها وكنت ناوية أرد بس للأسف الوقت مكنش مناسب. *** لو عاوزة نصيحتي فابعدي دلوقتي. أولا عشان أنتِ أكيد عارفة إن الارتباط حتى لو الكلام بينكم بكل احترام مينفعش ولا يرضي ربنا وبالأخص كمان مع رفض أهلك. ** ثانيا، عشان أنتِ فترة حساسة سواء من ناحية العمر والمشاعر أو السنة الدراسية اللي أنتِ فيها. قرأت تعليقك لذكية لما قلت تقريبا، إيه المشكلة لما تكوني معه وتركزي برضه على مذاكرتك، والصراحة ده صعب، دخول الحب على الخط بيعطل ويشتت حتى لو أنت فاكرة إنه مش هيحصل. لما تحبي وبالك ينشغل طبيعي جزء كبير من طاقتك يروح في الاتجاه ده وأنت أصلا محتاجة كل تركيزك على مستقبلك. ** أنا فاهمة جدا عمق المسألة بالنسبة لك، وإن اللي أنتِ حاساه دلوقتي حقيقي وصعوبة تخيلك لفكرة البعد عنه وكل ده حقيقي بالنسبة لأنتِ الحالية. أنا مريت بنفس عمرك ففاهمة الفترة دي عاملة إزاي وازاي بنتغير وننضج مع كل يوم وسنة بتعدي، أفكارنا ومشاعرنا حتى أحلامنا وتطلعاتنا للمستقبل ممكن تتغير، فعشان كده بقول لك بلاش تاخدي قرارات محكومة بالعاطفة حتى لو أنت مقتنعة إن اللي أنتِ فيه هو الحب الحقيقي ونصيبك. *** ممكن يكون ردي مش اللي نفسك تسمعيه بس صدقيني لو بتحبي نفسك وعاوزة مصلحتها فعلا اسمعي النصيحة. *** بالنسبة للعلاقة نفسها فأنا شايفة عوائق كتير أولها أهلك وثانيا المستوى التعليمي والمهني. خدي بالك حتى لو أنتِ شايفة إنه إنسان كويس وبيحبك فالتكافؤ أساسي في الزواج. رجالة كتير مش بيحبوا الزوجة تكون أعلى منهم وزواجات كتير فشلت للسبب ده. فتخيلي أنت دخلت كلية كبيرة أو كان لك طموحات عالية، أنت مش ضامنة اللي معك ساعتها حتى لو قال بيحبك مش هيحس بفرق ولا يكره تفوقك عليه، ولا تضمني أنتِ نفسك تفكيرك يتغير بعد كم سنة لما تلاقيكِ في وضع ومستوى معين فتراجعي الواقع وتشوفي إن شريك حياتك لازم يكون في مستواك؟ زي ما قلت احنا بنتغير مع كل يوم وتجارب جديدة في حياتنا. *** أهلك طبعا كان المفروض يتعاملوا بصورة أفضل لكن هم زي أغلب الأهالي متربوش على الأساليب التربوية الصحيحة، بس في الاول الآخر يهمهم مصلحتك وأكيد شايفين الواقع وأبعاده أوضح فشايفين إن مش مناسب لك. *** وأرجو إنك متفكريش تهملي في مذاكرتك عشان متدخليش كلية أعلى منه، أوعي خالص تفكري في حاجة زي كده زي ما بنات تانية عملت، وضحت بمستقبل تعليمي ومهني كويس عشان رجل وفي الآخر ندموا أشد الندم. اختاري الأفضل لك وخلي نفسك أولوية، أي معادلة تانية فيها خسارة لك. *** الأفضل دلوقتي بقى، ابعدي عنه وتألمي شوية أرحم بكتير من لما يزيد التعلق وتلاقي في النهاية برضه مفيش موافقة من أهلك وتتعبي زيادة. ركزي على مذاكرتك وانجحي وطوري من نفسك وتفكيرك وافهمي أكتر يعني إيه زواج وعلاقات سوية متوازنة وإزاي تختاري شريك الحياة الصح، وساعتها هتعرفي تقيمي العلاقة دي فعلا مناسبة لك وهتنجح لو قررتم تاخدوا الخطوة الرسمية ولا لأ. وادعي ربنا يكتب لك اللي فيه الخير من غير ما تعلقي نفسك بشخص معين (أنتِ مش عارفة النصيب فين ولا الخير فين ولا حتى بكرة مكتوب فيه إيه) متغضبيش أهلك واسمعي كلامهم عشان ربنا يرضى عنك ويوفقك. ويا ستي لو بعد كم سنة فضل هو متمسك بك وعاوزك، من غير ما تعملي حاجة هيتقدم لأهلك ويحاول أكتر من مرة لحد ما يقنعهم. وفي الآخر لو لكم نصيب مهما حصل هتجتمعوا ببعض فمتشغليش بالك بده وركزي على الأولوية واختاري نفسك ومصلحتك وبس. أرجو كلامي ميكونش زعلك ويكون وضح لك الصورة شوية ويساعدك تاخدي القرار الصح إن شاء الله، وربنا معك ويوفقك للي فيه الخير.💚💚
تم النشر الثلاثاء، ٣ نوفمبر ٢٠٢٦
لعرض السؤال في فدني اضغط هنا