انا بنت يمكن عندي 18 سنة بس مريت بحاجات تشيب -
انا اول مرة احكي دا وعمري ماحكيته لحد وانا عندي 9 سنين صحيت مرة بالليل ادخل الحمام اعزكم الله لقيت صوت تلفزيون طلعت الصالة لقيت ابويا قاعد لازق في التلفزيون وبيتفرج علي حاجات مش كويسة خالص
وبقيت بصحي كل يوم في نفس الوقت الاقيه على نفس الحالة بس مكنتش فاهمة اي دا بس الاكيد انها حاجه قليلة الادب وكنت حتى خايفة اقول لماما ومرة كمان بمسك موبايله دخلت علي اليوتيوب علشان أسمع كرتون لقيته منزل فيديوهات قذرة جدا
ولما وصلت 6 ابتدائي انا بلغت وجسمي بدأ يتغير وماما مكنتش مهتمية بحاجة زي كدا وانها تجبلي اللبس المناسب بس انا في الوقت دا بدات أخاف منه ومن اخويا انهم يتخيلوني مكان البنات اللي كان بيتفرج عليهم
وفي مرة اخويا كان هيتحرش بيا او مش عارفة اذا دا كان تحرش ولا لاء بس هو جه في مرة وقعد يكلمني وفي وسط الكلام حاول يلمس منطقة الثدي فانا خفت وبعدت وقولتله هقول لماما فخاف وحصل حاجات تاني تشبه كدا بس انا مكنتش فاهمه بس كنت خايفة ودايما ببعد وبعد سنين عرفت يعني ايه تحرش وفهمت ان اللي كنت بشوفه دا كانت افلام اباحية للاسف
حرفيا بقيت مرعوبة بلبس واسع في البيت وطويل كمان لغاية ما كنت في 2اعدادي وماما جالها كانسر انا اكبر بنت في انا اللي شلت المسؤلية كاملة من اكل وتنضيف وغسيل ومواعين واحمي اخواتي الصغيرين وأسرح لهم لان والدتي عملت 3 عمليات وبعدها اخويا كان بيتجوز فانا كمان بيقيت شايلة كل التجهيزات علي دماغي من عمال وتشطيب الشقة لغاية ما الفرح خلص وبعد الفرح بشهر واحد اتخانقت انا واخويا علشان كنت بشجع الاهلي بصوت عالي
فنزل ضربني وضرب وشي في الحيطة ومكنتش قادرة احرك فكي وحرفيا كانوا الجيران هياخدوني المستشفي الساعة 1 بالليل وفي الوقت دا ابوه كان بايت في الشغل وماما عن تيتا وفي نفس الوقت لقيتهم بيقولوا ان ماما في العناية المركزة وفضلت شهر كامل فيها كانت خالتي دايما معاها بس انا كنت بروح الصبح لغاية بالليل وخالتي تروح تنام وترتاح وتيجي بالليل
وجيت في مرة روحت مرات اخويا بدأت تتخانق فيا بسبب اخواتي هي وام ابويا والاتنين ما شاء الله من خليفة ابليس راح اخويا بردو ضربني
المهم امي للاسف توفت وهنا بدا العذاب ام ابويا عاشت معانا حرفيا كانت بتشيل الاكل من قدامنا وتقولنا وفرولوا خليه يعرف يتجوز ومعاملة خدم اقسم بالله وسرقتني وقالت اني بسرق الفراخ وانا بطبخ وحاجة اخر قرف وحتى قبل يوم الاربعين بيوم مرات اخويا اتخانقت فيا روحت انا مشيت روحت عند اهل ماما وخليت خالي يكلمه اني هبات
تاني يوم روحنا المقابر وانهرت فعلا وهبطت وانا ماشية لقيت ابويا واخويا ومراته وافقين يبصولي بتوعد ولالليل لما الختمة خلصت تيتا قالت لاخويا روح قول لابوك اختك تعبانه ومنهارة هاخدها عندي كام يوم راح طلع لقينا ابوه داخل زعق في تيتا وقالها لاء راحت قالتله دي تعبانه قالها لاء تموت يطلع فيها عيار متتكلمش واللي يتحط قدامها تطفحه حتى لو سم واللي تمسك مصروف البيت هي اللي تبقي ست البيت
ومن اللحطة دي فهمت تجمعهم الصبح راح خالي دخل اخد تيتا ومشيوا راح رجالة عيلته كلمهم دخلوا بقي بيزعقوا فيا كلهم والله ومحدش واخد باله اني منهارة ومكسورة لان ماما الله يرحمها كانت شخصية قوية وعمرها ما سمحت لحد انه يغلط فيا انا في الوقت دا انهرت دخلت اوضتي وجبت شريطين برشام من بتوع ماما وبلعتهم ونمت على اساس مش هصحي تاني بس للاسف صحيت بعدوا عني صحبتي الوحيدة اللي كانت جمبي في كله دا اخدوني مني الموبايل ولما روحتلها قعدوني من المدرسه وانا كنت في تانية ثانوي تاني يوم علطول اخويا وابوه كانوا في الشغل انا قومت من النوم مسكت موس حلاقة وقطعت شراييني
اختي الصغيرة جريت سحبت من ايدي الموس ومرات اخويا صوتت ولمت عليا الجيران بس طلع جرح سطحي لما اختي شدته من ايدي لكن دا كمان ماثرش فيهم والدنيا زادت اكثر سوء وامه اللي ربنا ينتقم منها ما سبتش حاجه وحشة الا لما قالتها عليها
وبعد سنه كنت عايشة فيها حرفيا مع صهاينة روحنا عشنا عند جدتنا ام ماما راح اللي المفروض ابويا راح كلم وحدة من ورا جوزها وطلقها وراح هرب معاها واتجوزها من ورا اهلها راحت العيلة بتاع مراته كانوا عايزين يخطفوني وحد منهم يعتدي عليا لاني انا البنت الكبيرة ففضلت 4شهور متواصلين مطلعش برا البيت مفتحش حتى الباب لو حد خبط
ونلاقيه كاتب لمراته البيت اللي كنا عايشين فيه اللي نصه باسم ماما اصلا وهو اصلا ورثها من باباها وكاتبلها 6قيراط ارض وقايمة ب450 الف وجاب ب200الف دهب مع العلم ان الست دي معاها 5 عيال وبنتها مخلفة وهي اصلا سمعتها زبالة وابوها واخواتها تجار مخدرات وسلاح ومش بيصرف علينا وبيصرف عليها هي وبنتها
وكل شوية يدفع شيك لابوها ب250 الف جنية مع العلم واحنا عايشين معاه والله كان بيسبنا من غير اكل وكنت بشحت من الجيران علشان اوكل اخواتي الصغيرين وكل ما تيتا تقولوا عايزة ولاد بنتي يقولها لاء عايزة الناس تعايرني
دلوقتي انا الحمد لله رجعت تعليمي وفي 3 ثانوي رافضة اني اشوفه او اكلمة خالص انا حرفيا بكرهه جدا مش بطيق اسمع اسمه كارهة نفسي اني بنته بكره اسمه اللي بعد اسمي انا حالتي النفسية بقت زفت خالص مع اني بعيدة عنه بس سيرته بيدايقني وكل شوية محاكم لاننا رفعنا نفقة في مرة روحت عند حد وقابلته بس قولتله اطلع برا حياتي انت بالنسبالي مت وقولت كلام قاسي جدا انا مش قادرة اسامحه ولا هقدر هو اهمل امي واذاها واذاني انا كمان جدا
هل كدا ربنا هيعاقبني؟ @Eman Ebrahem
في البداية اسمحي لي اقولك ان فكره انك تخرجي كل اللي جواكي. وتتكلمي فيه. دي حاجه صعبه جدا وفي نفس الوقت. مش سهل عليك خالص. خليني اقول لك برده ان كل الظروف والمواقف اللي مرت بها. واثرت عليك. دي مش مواقف سهله ولا بسيطه. فالضغط النفسي اللي انت تعرضتي له كان سبب رئيسي في انك تحاولي انك تنتحري اوتخلصي من الوضع اللي انت فيه باي شكل. بس انك صامده لحد دلوقتي وانك قادره تكملي وفي مرحله ثانويه عامه. فانا بقول لك انتي شخص قوي وشجاعه. اللي مرتي بيه كان ليه رد فعل. وردود افعالك بسبب ان ما كانش فيه حد بيحتوي الموقف او حد ممكن تتكلمي معاه غير صديقتك اللي بعدوها عنك والموضوع ده ما كانش بايدك. يمكن في الوقت ده ردود الافعال دي انتي ما كنتيش تعرفي اذا كانت صح ولا غلط اذا كانت حلال ولا حرام انت في وقتها اتصرفتي انك عايزه تخلصي وخلاص. فما تحاسبيش نفسك على انك تصرفتي كده حتى لو كان تصرف غلط. دلوقتي او خلينا نقول ان احنا في المرحله دي محتاجين ان احنا نسترجع قوتنا من تاني. بمعنى. انك تقدري تركزي في مرحلتك في مرحله الثانويه العامه. وانك تذاكري كويس جدا عشان توصلي لهدفك اللي نفسك تحقيقيه وطبعا قبل كل ده. انك تلجاي لربنا وانك تواظبي على القران وتواظبي على الصلاه وتطلبي من ربنا انه يفك الكرب ده. ودائما تكوني محافظه على صلاتك لانها هتفرق في حياتك وفي يومك بشكل كبير. مرحله الثانويه العامه مش مرحله سهله محتاجه تركيز محتاجه شغل محتاجه حاجات كتير. يا رب حاليا تكوني في مكان تقدري انك تسترجعي في طاقتك بتسترجعي في نفسك من تاني وتقدري انك تذاكري. علشان. كل اللي مريتي بيه ولو انت استسلمتي هتفضلي واقفه مكانك وهترجعي ورا. فعشان تغيري الواقع ده هتقدري تغيريه بايدك انك تشتغلي كويس تذاكري كويس. ويكون عندك ثقه في ربنا. وانك دائما تستغفري. لان الاستغفار لي اثر رائع في حياه البني ادم. فانا بطلب منك. انك ما تيأسيش واحتسبي كل حاجه عملتيها من مسؤوليه و اي حاجه تعرضتي ليها. احتسبيها عند ربنا ربنا يجازيكي كل الخير. وربنا يكتب لك كل الخير. انت شخص قوي وجميل. وتعب جدا في حياته من وهو صغير. فكل ده ليه اجره عند ربنا؟ وان شاء الله يكون اللي جاي بالنسبه لكي افضل واحسن وتكون حياه انت حابه ان انت تكملي فيها. ربنا يعوضك في نجاحك في الجامعه اللي نفسك فيها في شغلك ويكرمك بزوج وبناس وباصدقاء يعوضوكي عن كل اللي مرتي بيه. واخيرا حابه اني اقول لك ان الدعم النفسي مهم جدا. لازم يكون في حياتك حد يدعمك نفسيا وتحبي انك تتكلمي معاه وتحبي انك تتعاملي معاه سواء دكتور نفسي او لايف كوتش او صديقتك تقدري ترجعي لها تاني الموضوع هيفرق كتير معكي ربنا معاك وربنا يجازيكي كل الخير. ومتترديش انك تبعتيلي اي سؤال هكون معاكي 🩷
تم النشر الاثنين، ١٧ نوفمبر ٢٠٢٥
للاسف انا تالتة ثانوي ف مش هقدر اعمل دا
تم النشر الاثنين، ١٧ نوفمبر ٢٠٢٥
انتى بنت قويه انك صبرتى على كل ده وإن شاء الله ربنا هيعوضك بس انتى دلوقتي حاولى تتخطي واعملي حاجات جديده وغيري حياتك يعنىي مثلا اشتغلي الشغل حاجه مهمه ثانياً اقرأي روايات وكتب أو مثلا لو انتي ينفع تعملي قناه يوتيوب وتعملي فلوجات وكده وافكار جديده ده كله مع الوقت هيبقى ليكي اهتمامات ولما تعملي حاجه بتحبيها هتحسي بالسعادة
تم النشر الاثنين، ١٧ نوفمبر ٢٠٢٥
لعرض السؤال في فدني اضغط هنا