السلام عليكم، هو منين قلت إن ربنا كاتب عليك تبقى فاشل أو تفضل في الحالة اللي أنت فيها حاليًا؟ هل اطلعت على الغيب وقرأت اللي مكتوب في قدرك؟ بنفس المنطق الكافر بيتحجج إن ربنا كتب عليه الكفر رغم إنه لم يطلع على الغيب واستمر في طريقه متحجج بقدر مسبق هو أصلا مقرأهوش. كل الأفكار السلبية دي بسبب ضغوط الثانوية مش أكتر وإنك شايل حمل توقعات أهلك فطبيعي كل ما تسمح للأفكار تسيطر عليك كل ما رؤيتك للواقع والمستقبل هتكون سوداء وهتحكم على نفسك فعلا بالفشل وبعد كده ترمي اللوم إن ربنا كاتب عليك كده. ** تفتكر أنت لوحدك اللي عاصي؟ كلنا عصاة وكلنا خطاؤون وكل واحد فينا له ذنب أو معصية معتاد عليه وبيرجع له، بس الفكرة كلها في التوبة باستمرار بعد الوقوع. "ما مِن عبدٍ مؤمنٍ إلَّا وله ذنبٌ يعتادُه الفَينةَ بعدَ الفَينةِ أو ذنبٌ هو مقيمٌ عليه لا يُفارِقُه حتَّى يُفارِقَ وإنَّ المؤمنَ خُلِقَ مُفْتَنًا توَّابًا نَسَّاءً إذا ذُكِّرَ ذكَر" الرسول عليه الصلاة والسلام في الحديث منزعش صفة الإيمان عن المذنب. ليه انت تحكم على نفسك بالهلاك بقى؟ ما دام عارف أساس المشكلة يبقى قوم ونفذ، مش بتصلي ارجع للصلاة، علاقتك بربنا بقت مش كويسة ارجع وقرب حتى لو بخطوات بسيطة. اقرأ شرح الحديث عشان يوضح لك أكتر https://dorar.net/hadith/sharh/120839 **** وبعدين مين قال إن الثانوية العامة هي اللي هتحدد مستقبلك؟ احنا اللي للأسف خلينا الثانوية في مجتمعنا تحديد للمصير مع إن ده أكبر غلط وأكبر. ناس كتير محققوش إنجاز في الثانوية لكن بقوا أنجح بكتير من ناس تفوقت في الثانوية عادي... أنت اللي بتحدد معنى نجاحك وانت اللي بتحققه مش مجرد محطة في حياتك هي اللي هتحدد مصير مستقبلك كله. *** وافتكر دايما قول الله تعالى في الحديث القدسي: "أنا عند ظن عبدي بي؛ فإن ظن بي خيرًا فله، وإن ظن بي شرًا فله" فبلاش تخلي ظنك بالله سيئ إنه كاتب عليك الفشل أو إنه مش هيغفر لك مهما أذنبت ووقعت... لأن ظنك بالله خير بيتحقق وظنك السيئ بيتحقق فاختر أنت. *** استعن بالله ولا تعجز، وأنصحك تبدأ في الرقية الشرعية وتلتزم بها يوميًا مع قراءة سورة البقرة أيضًا يوميا حتى لو قسمتها على 3 أيام، الموضوع هيبقى صعب عليك في الأول لكن إن شاء الله مع الأيام هيكون أسهل وأي وساوس أو أفكار سلبية مسببة لك الحالة دي هتروح بإذن الله. بالتوفيق.
ما التفكير السلبي ده في حد ذاته يعتبر سوء ظن حتى لو بتعمله لاشعوريًا... نفسك اللوامة والشيطان عمالين يضخوا الوساوس والظنون دي فتزداد يأس في نفسك... الوسواس علاجه التجاهل، اعتبره شخص زنان جنبك تجاهله لحد ما يزهق ويسكت من نفسه... الموضوع صعب بس افتكر إن مهما كان الوضع صعب وابتلاءك شديد فـ(لا يكلف الله نفسًا إلا وسعها) يعني ربنا عالم إنك تقدر تنجح في الابتلاء ده. أنا فاهمة حالتك وإحساس الذنب وعدم ثقتك في التغير، ممكن يكون خوف وعدم ثقة وممكن كمان يكون من الشيطان أو حسد أو عين وغيرها فتحسبًا لكل ده امشي على الرقية الشرعية وسورة البقرة كل يوم وتوكل على الله وأحسن الظن. اعمل ورد يومي من ذكر (لا حول ولا قوة إلا بالله العلي العظيم) وردده بكثرة على قد ما تقدر.. هيفرق كتير مع بإذن الله. بالتوفيق.
تم النشر الخميس، ٩ أكتوبر ٢٠٢٥
انا مش عندي سوء ظن بالله بس نظرا للبعمله دلوقتي انا مستحقش حاجه من ربنا انا عايز اتغير وبحاول بس كل شويه بتجيلي افكار دي وبتخليني محبط وبحس ان مفيش فايده
تم النشر الأربعاء، ٨ أكتوبر ٢٠٢٥
لعرض الإجابة في فدني اضغط هنا