السلام عليكم، متفهة مشاعرك وصدمتك لكن متخليش ده يؤثر في علاقتك بأخوكِ ونظرتك له. "كل بني آدم خطاء وخير الخطائين التوابون" كلنا بنغلط وكلنا بنحاول نبطل نقع في ذنوب معينة ونتوب ونرجع لها ونندم ونتوب. مش ببرر لأخوكِ أكيد ولا بقلل من ذنبه وإنه حرام لكن الوباء ده للأسف أصاب شباب كتير.. لو بحثتِ هنا على التطبيق هتلاقي مشاكل كتير وأصحابها بيعانوا من الندم والتعب النفسي في سبيل التعافي من الإدمان. مش عارفة مدى قربكِ من أخوكِ وهل يسمح لك تكلميه في ده وتنصحيه بس بطريقة لطيفة من غير ما تحسسيه إنه وحش ونزل من نظرك؟ إذا فيه إمكانية مثلا بطريقة غير مباشرة زي إنك تشاركي فيديوهات عن إدمان الإباحية وآثارها والتعافي منها. ممكن أرشح لك 3 فيديوهات على قناة أستاذ وليد طه عن الموضوع ده. الجزء الأول: متخربش مخك وحياتك بإيدك https://www.youtube.com/watch?v=WGgCY7dEvF8 الجزء الثاني: https://www.youtube.com/watch?v=_qMTk1Jy_Rw الفيديو الثالث: كيف يحدث التغيير؟ https://www.youtube.com/watch?v=sDBX7awuxrA *** ملحوظة أخيرة، (رصيده من الستر خلص) مش بحب الجملة دي ولا مقتنعة بها خالص. اللي حصل مش دليل خالص إن أخوكِ ربنا غضبان عليه وعشان كده فضح ستره. فيه ناس كتير بتموت وهم مرتكبين جرائم وكبائر ومع ذلك سترهم مترفعش أبدًا. وفيه ناس تانية ممكن تقرر ترتكب ذنب وتتكشف من الأول.. ده ملهوش علاقة برصيد ستر. ممكن الستر يترفع عشان ربنا بيحب الشخص ده وأراد يكون ده درس وصفعة تفوقه عشان يرجع لربنا وميكملش في طريق سيء مفيش منه رجعة. وده حصل مع ناس.. ممكن يكون ابتلاء، ممكن استمرار الستر رغم كل شيء إمهال للعبد يخليه يتمادى في ضلاله. فعشان كده دي مش قاعدة وبلاش تحكمي بها على أخوكِ. ممكن على فكرة هو لسه بادئ في الموضوع ده ويكون اكتشافك تنبيه عشان يساعده ميكملش في طريق وحش ويكون رجوعه أصعب، وممكن يكون بقاله فترة بس تكون رسالة صعبة له عشان لو كمل هيخسر ناس غالية عليه ونظرتهم ليه. أعتقد هو هيعرف من مسح التاريخ واللي عملتِه في التابليت إنك أو حد من الأسرة عرف، فمين عارف يمكن ده يخليه يفوق لنفسه. ** ادعيه له كتير ربنا يهديه ويرده إليه مردًا جميلًا.
جزاكم الله كل خير ♥️
تم النشر الأربعاء، ١١ يونيو ٢٠٢٥
لو ينفع تبعتي له الفيديوهات أو تشيريها على صفحتك وتعملي إظهار البوست له هو لوحده بحيث يشوفه لو مش هتعرفي تخليه ظاهر للأصدقاء... خدي بالك إن فترة الثانوية والضغط اللي بيزيد مع قرب الامتحانات بيخلي ده مهرب له فممكن قوي يكون بيتفرج كنوع من الهرب من الضغط النفسي... أنا فاهمة قلقك وخوفك لأنها للأسف مشكلة منتشرة بين الشباب وحتى البنات.. مش هنقدر نتجسس طبعًا عشان نتأكد من حاجة زي كده وبلاش ندور ونفتح أبواب الشك على نفسنا طالما مفيش حاجة ظاهرة لنا فاحنا نتعامل بالظاهر.. ادرسي أخلاق خطيبك وكلامه في فترة الخطوبة وبلاش العاطفة تتدخل في الفترة دي عشان تقدري تحكمي كويس وصلي استخارة لو فيه خير في زواجك منه ربنا يتمم لكم على خير لو فيه شر ربنا هيبعده.. دورك تنصحي لو مش مباشرة ممكن زي ما قلت تحذري من المشكلة على صفحتك أو تشيري الفيديوهات وتكوني عملتِ دوركِ من الناحية دي وتدعي لأخوكِ وخطيبك وأقاربك اللي انتِ خايفة عليهم والهداية في الأول والآخر بيد الله... صلي وادعي لهم كتير. عمومًا انتظري آراء الخبراء هنا ممكن يفيدوكِ أكتر في النقطة دي وازاي تتعاملي مع أقاربك الشباب في المشكلة دي وممكن تبحثي في التطبيق شوفي نصائح الخبراء على الشباب ممكن تفيدك برضه.
تم النشر الأربعاء، ١١ يونيو ٢٠٢٥
حاجة كمان أنا بقا عندى قلة ثقة فى كل الناس ال حواليا ، انا مخطوبة وقلقانة خطيبي يكون بيعمل حاجة زى دى هو كمان ، عندى ولاد اختى ، قلقانة عليهم يكونو بيشوفو حاجات زى دى هما كمان ، بقا عندى خوف ورهبة على كل الشباب ال حواليا سواء خطيبي او ولاد اختى او اخويا . مش عارفة اتخطى خوفى دا وعملى ضيق ف صدرى وخنقة . أفيديني بالله عليكي
تم النشر الأربعاء، ١١ يونيو ٢٠٢٥
انا كنت بفكر اتكلم معاه بس انا مش حاسة بخوف وف نفس الوقت مش عايزة اعرف حد تانى من اخواتى ، بفكر أتكلم معاه من نقط زى انت بتعمل حاجات كتير كويسة زى انك بتصلي في المسجد دايما وبتنصح اصحابك يبعدو عن الحاجات الحرام وبتطلع صدقة وكنت بتقرأ قرآن وبتقيم ليل ، الحاجات دى هتأثر عليك في دينك وهتخليك لا تقيم ليل تانى وتكسل تروح الصلاة وواحدة واحدة هتبعدك عن طريق ربنا ، وبفكر اتكلم معاه انها مدخل للشيطان علشان يصرفه عن مذاكرته وهو داخل على امتحانات ثانوية عامة يعنى المفروض يكون مهتم بمذاكرته أكتر وقريب لربنا علشان ميضيعش مجهود وتعب السنة وعلشان ربنا يوفقه ، واتكلم من نقطة انها هتأثر عليه جنسيا بعد كدا في علاقته الجنسية بزوجته ف المستقبل وان المشاهد دى كلها ضرر من الناحية الصحية والنفسية والدينية والاجتماعية كمان بتخلى الانسان عايز يفضل قاعد لوحده ويبعد عن الناس وبتخلى في مشاكل كتير بين الازواج . كل الكلام دا ف دماغى بس حاسة انى مش عارفة اخد الخطوة دى ازاى واروح اتكلم .
تم النشر الأربعاء، ١١ يونيو ٢٠٢٥
لعرض الإجابة في فدني اضغط هنا