انا ثانويه عامه ودلوقتي بقيت فى فتره مراجعه وكله بيراجع وانا معنديش مشكله انى اقعد بس باجى اقعد الوقت بيجرى بسرعه جدا والوقت بيعدى من غير ما اعمل حاجه لو عملت بتبقى حاجه بسيطه وخلاص ببقى عايزاه انام من ساعه ما بدأت مراجعه وانا كده عدى شهر ولسه شهر مش عايزاه يضيع كده لانى هبقى ضيعت مجهود السنه كله فمعتش عارفه اعمل اى مش عارفه حتى المشكله فين @Mai Mahfouz
السلام عليكم، أولا شكرا جدا إنك وجهتِ لي السؤال وأرجو إني أقدر أفيدك إن شاء الله. بالنسبة لإحساسك إن الوقت بيجري فده طبيعي، غالبا بيكون التوتر والقلق وراء الشعور ده. هو صحيح الأيام بتجري بس ده ملوش علاقة بإحساسك الحالي لأن الإنجاز في اليوم بيخليكِ تحسي إن حتى لو اليوم مر بسرعة فأنتِ استغليتِه. وأول خطوة عشان ده إنك تنسي خالص فكرة الوقت بيجري ومش لاحقة أخلص.. كل تركيزك يكون على المهمة اللي وراك. ولا تفكري في كمية المراجعة أو الحاجات اللي لسه مخلصتيهاش.. ركزي على جزئية جزئية. طول ما أنتِ حاسة إن فيه جبل قدامك مش هتقدري تتحركي وهتحسي إنك واقفة مكانك ووقتك بيجري، لو بس فكرتِ في الخطوة اللي قدامك وبعدين الخطوة اللي بعدها هتتحركي. *** مشكلة النوم دي طريقة هرب من عقلك.. عقلنا مصمم إنه يحمينا من الألم والضغط فأي شعور بالمسؤولية هيولد عندك ضغط وألم وأسهل حاجة التسويف بأي شيء ومنها الهروب للنوم. الفكرة كلها في التحايل على العقل... بمجرد ما تفكري إن المذاكرة تقيلة وواجب صعب وورايا كذا وكذا هتلاقي نفسك عاوزة تنامي أو تهربي لأي حاجة حتى لو الشرود أثناء المذاكرة. فكل اللي أنتِ محتاجاه خدعة نفسية، إنك تتحايلي على عقلك عشان ميحسش إن فيه حمل كبير منتظره. *** فيه طريقة البومودورو اللي هي ٢٥ دقيقة مذاكرة وخمس دقايق راحة... لو هتحسي إن الخمسة وعشرين دقيقة كتير ممكن تقولي لنفسك هقعد ١٠ دقايق بس أو هقرأ الصفحة الفلانية بس من الدرس. صدقيني عن تجربة، أصعب خطوة هي إنك تقعدي على المكتب وتبدأي بعدها مع التركيز هتنسي نفسك. **** فكرة إنك مش بتنجزي كتير، ممكن لسوء تقسيمك للوقت أو إنك بتسرحي أثناء المراجعة أو بتسوفي أو بتراجعي بطريقة بتستهلك وقت ومحتاجة تعدليها لطريقة أذكى.. حاولي النهاردة وبكرة تراقبي سلوكك وتشوفر إيه اللي بيضيع الوقت من غير إنجاز. *** فيه قانون ممكن يفيدك في الإنجاز وعدم المماطلة اسمه ( قانون باركنسون ) وهو إن ( العمل يتمدد ليملأ الوقت المتاح لإنجازه ) بمعنى إن ممكن درس ياخد منك نصف ساعة مذاكرة أو أقل ونفس الدرس لو حددتِ له ساعة أو ساعتين هتلاقيه بيمد معك لساعة وساعتين. ولو حددتِ له نصف ساعة هيقصر معك لنصف ساعة. فجربي كده تقسمي وقت المهام صح عشان متمدش معك. **** فيه طرق ذكية للمراجعة ممكن تبحثي عنها وتختاري اللي يناسبك. شوفي المقال ده فيه نصائح هتفيدك إن شاء الله. https://www.for9a.com/learn/أفضل-النصائح-لإتقان-فن-المراجعة-للامتحانات https://aladwaa.com/ar/541994/ذاكر-بذكاء-وليس-بكمية/ *** لو هنصحك بحاجة من تجربتي مع الامتحانات فهو إنك: كل درس تراجعيه هاتي أسئلته من امتحانات السنين السابقة وحليها. جربي طريقة المراجعة المتقطعة (التكرار المتباعد) هتفيد جدا في تذكر المعلومات.. ده فيديو عنها https://www.youtube.com/watch?v=Z-0OpHiw5DU نامي كويس ليلة الامتحان عشان تروحي فايقة ومركزة.. لو مذاكرة ٥٠٪ بس نايمة كويس هتحلي أفضل من لو مذاكرة ١٠٠٪ ومش نايمة كويس. لو انت مسلمة، من هنا للامتحان حاولي تواظبي على سورة البقرة يوميا (قسميها على الأيام عادي لو صعب تقرأيها كاملة) وهيفرق جدا معك لو فصلت بين فقرات المذاكرة بقراءة آيات من القرآن (زاحمي المذاكرة بالقرآن ربنا هيبارك إن شاء الله. ******** حاولت قدر الإمكان أجاوبك وأرجو أكون أفدتك. لو عندك نقاط عاوزة تستفسري عنها أو أسئلة تانية قولي لي وهجاوب إن شاء الله. بالتوفيق.❤️❤️
تم النشر الخميس، ٢٣ أبريل ٢٠٢٦
أنا برضو نفس النظام و ثانوية عامة و كنت لسه بحاول مع نفسي احاول احل نفس المشكلة و الوضع كان وحش لدرجة إن كل ما اقعد و افتح فيديو الشرح أنام علي المكتب و بعدت من المكتب و قعدت علي الأرض برضو كنت بنام اكن دخلت غيبوبة و بصحى فجأة بس الي بدأت اعمله إن بقيت احاول أن استوعب الوضع الي بقيت فيه وأن خلاص و أن في ناس واثقة فيا لازم ابذل كل طاقتي حطي كل الحاجة عاوزة تعمليها قدامك و نظمي نومك و الافضل انك تنامي بدري و تصحي بدري الموضوع هيفشل ف المره الاولى حاولي تاني و تالت لحد ما تضبط و بالنسبة لأن الوقت بيجري هو بيجري فعلا بس طول ما انتي قاعدة و خلاص نويتي تذاكري متبصيش في الوقت و متبصيش للكم إن كان قليل مجهودنا كلنا قليل بس لازم نسعى فرحي نفسك على الأقل حاولتي عاوزة تنامي كل ساعة قولي لنفسك هخلص الجزئية دي وهنام ساعة مشيها كده عشان مش تيأسي و تبطلي تحاولي أنتي شطورة انك بتحاولي و بتحاولي تلاقي حل لمشكلتلك و مش مشكلتلك إنك بتنامي كتير عقلك بس عشان مش قادر يستوعب كل الكم و أن خلاص مراجعات و كده لالالا متديش لعلقك فرصة للتفكير دا و كل يوم حاولي مره واتنين و تلاتة لحد ما تضبط معاكي و ربنا يوفقك يا كتكوتة و يراضيكي و يحقق مناكي و خليكي دائما فاكرة أن أنت كل مره بإيدك تحاولي عشان توصلي للي عاوزة و اتمنى اكون فدتك و هدعيلك في صلاتي و صح ركزي علي الاذكار كل يوم علي قد ما تقدري و أقرئي سورة البقرة هتحسي بفرق في اليوم والله 💗
تم النشر الجمعة، ٢٤ أبريل ٢٠٢٦
لعرض السؤال في فدني اضغط هنا