فعلاً كلنا بنمر بالفترة دي من وقت للتاني حتى لو كنا ماشيين كويس جداً فجأة بنعطل ومابنبقاش فاهمين السبب أو ايه الحاجة الغلط اللي عملناها عشان ندخل ف الحالة دي بل يمكن بنقع ف الحفرة دي بعد فترة إلتزام مُعتبرة.. ************************************** ومن وجهة نظري وتجربتي الشخصية كبنت زي كل البنات بختبر تقلبات مزاجية كتير لكوننا بنمر بتغيرات هرمونية متكررة بطبيعة الحال ف بقيت بشوف ان الفترة دي هي فترة تعبير جسمي عن احتياجه للراحة .. بمعنى لو جسمي قادر يتكلم هيقولي أنا محتاج أرتاح شوية من الجري والإنتاجية والإنجاز والإلتزام بالقواعد الصارمة كل ده جميل بس ريحيني شوية يا شيخة عايز افصل نفسسسي أفصل وأرتاح شوية 😅 وبصراحة انا ف الأول ماكنتش بفهم ده بسرعة وكنت بفضل أفرك وأحاول أقوم بكل حاجة بالشكل الطبيعي المعتاد وأتجاهل مشاعري ، بس كنت بفشل كل مرة وبستسلم للراحة ف النهاية ، بس بعدين بقا فهمت الفولة وبقيت متصالحة مع الحالة دي وبسمي الأيام اللي بتحصل فيها أيام العشوائية الهادفة لأنها فعلاً هادفة عشان نقدر نفرغ الضغط ونشحن طاقتنا مش مجرد وقت هنضيعه وخلاص ف الكسل والاستمتاع ، و في الأيام دي بقعد أقول لنفسي فيها ايه لما أخرج عن القاعدة وفيها ايه لما أعيش يوم من غير ما عيني تبقى ملاحقة عقارب الساعة ، فيها ايه لما ييجي ف دماغي فكرة حلوة هتبسطني واقوم دلوقتي أنفذها مش أقول بعدين و لما أفضى و لما أخلص الشغل الفلاني ولما أحقق التارجت العلاني ، بقيت برحب جداً بمشاعر الضعف والركود والإعياء ف الأيام دي وبتسامح معاها جداً ومع طبيعتي البشرية ما أنا بردو مش آلة ده حتى الآلات أوقات بتعطل بسبب حِمل زائد أو سوء إستخدام! ف بقيت رحيمة بنفسي أكتر وبفضل أدلل فيها وأعترف بإنجازاتها ونجاحاتها مش بنكرها وبحاول أفكر نفسي بيها واقولها كلام حلو و يطمن من غير ذرة لوم أو إجبار و يادوب بلتزم بأبسط قدر من الضرورات اليومية خلال الأيام دي زي الصلاة والنظافة الشخصية وهكذا.. ، وكمان بحاول قدر الإمكان ماقضيش كل الوقت لوحدي وبنتهزها فرصة بحاول أعوض بيها إنشغالي عن أهلي وصحابي طول الفترة اللي فاتت وبجرب أشاركهم أي لحظات لطيفة حتى لو كنت out of mood بقول لنفسي أكيد هتنبسطي ولو شوية وهتغيري جو وهتحسي بالونس جربي مش هتخسري حاجة وفعلاً مش بندم وبضحك من قلبي معاهم وبفضفض عن اللي مضايقني إذا أمكن وبتخلص من معظم الطاقة السلبية اللي عندي . ************************* ودي كانت تجربتي والخطوات البسيطة اللي بعملها وبتفرق معايا أتمنى إنها تفيدك وتفرق معاك ولو بقدر بسيط 💌✨️
شكرًا لكِ، شيماء، على إجابتك الرائعة والمُلهمة. لقد لمستِ جوانب مهمة تتعلق بتجربة الفتور والفراغ التي يمر بها الكثيرون. فهمك لاحتياجات النفس وإعطائها فرصة للاسترخاء يعكس وعيًا عميقًا وتجربة قيمة. إن تذكير الآخرين بأن المرور بفترات من الضعف ليس عيبًا، بل هو جزء من طبيعة الإنسان، هو رسالة إيجابية ومحفِّزة. أتمنى أن يستفيد الجميع من نصائحك ويجدوا فيها العون للتغلب على تحدياتهم. بارك الله فيكِ وجزاكِ خيرًا على مشاركتك. 🌼✨
تم النشر الأربعاء، ٢٥ ديسمبر ٢٠٢٤
العفو ده شيء بيسعدني والله وأتمنى حقيقي إن كلامي يكون بيأثر بشكل إيجابي ف أي حد يقرأه.. وبشكرك لذوقك 🌸
تم النشر الأربعاء، ٢٥ ديسمبر ٢٠٢٤
شكرا جدا ليكى لاجتهادك وتعبك فى الاجابة وانك مااستخسرتيش مجهود انك تفيدى غيرك ..🙏
تم النشر الأربعاء، ٢٥ ديسمبر ٢٠٢٤
لعرض الإجابة في فدني اضغط هنا