السلام عليكم، مشاعرك الحالية طبيعية جدا، أنتِ لسه بتمري بمرحلة صدمة بعد النتيجة. اعطي نفسك فرصة للتعافي ومتاخديش قرارات دلوقتي وأنتِ ما زلتِ في صدمة. *** ومتفكريش خالص في أهلك دلوقتي، إحساسك بالذنب ناحيتهم أو تفكيرك في مشاعرهم وفقدان ثقتهم ده هيزود مشاعرك السلبية ويوفقك فترة أطول في مكانك. اللي هينسيهم ويغير تفكيرهم الوقت وإنك تثبتي جدارتك ونجاحك في المستقبل إن شاء الله وتثبتي لهم إن دي كانت مجرد عثرة في طريقك لكن مكسرتكيش. *** خدي فاصل مع نفسك، وقت للتعافي استغليه في إنك تعيدي برمجة أفكارك ناحية النتيجة والحياة. بلاش أفكار سلبية لأن عقلك الباطن بياخد أي فكرة تقوليها له ويحولها لحقيقة، فخلي كلامك مع نفسك دائما إيجابية. لو فضلتِ تكرري عليه إنك بقيتِ كسولة وخاملة وفاقدة الشغف ده هيتقرر في عقلك الباطن ويخليكِ فعلا حاسة كده طول الوقت. ** دخلي عادة الامتنان في روتينك، خصصي نوتة جميلة كده وأقلام ملونة واكتبي فيها كل يوم على الأقل ٣ حاجات بتشكري ربنا عليها، إنجازات عملتِها أو حاجات خلال اليوم فرحتكِ مهما كانت صغيرة. ده هيخليكِ تدركي النعم الكتير في حياتك واللي ممكن مشاعرك السلبية دلوقتي عامياكِ عنها. وامشي خطوات صغيرة، مش لازم تحاولي ترجعي شغفك بالقوة أو تفكري إنك لازم تعملي حاجات كبيرة وأنتِ مش عندك طاقة لحاجة. امشي واحدة واحدة. ** استعيني بالله ولا تعجزي، وإذا كنتِ مسلمة فأنصحك من دلوقتي تبدئي في الالتزام بأذكار الصباح والمساء وقراءة سورة البقرة يوميا (ممكن تقسميها على الأيام لو صعب عليكِ تقرأيها مرة واحدة) كمان رددي كتير ذكر (لا حول ولا قوة إلا بالله العلي العظيم) وإن شاء الله ربنا هيبعد عنك الخمول والكسل ويمنحك القوة عشان تتجاوزي المرحلة دي وتغيري حالك للأفضل. وبالتوفيق إن شاء الله.💚💚
العفو، بالتوفيق دايما.💚
تم النشر الاثنين، ١٠ أغسطس ٢٠٢٦
شكرًا يا دكتورة
تم النشر الأحد، ٩ أغسطس ٢٠٢٦
لعرض الإجابة في فدني اضغط هنا