دلوقتي انا عندي٢٣ سنه واتخرجت من سنه، وقت مشروع التخرج في واحد دخل يتكلم معايا (عن المشروع) وفجأة لقيته قالي انه عايز يرتبط (قال انه شافني وعارفني من اولى وكنا مع بعض ف اللجنة وغير كدا هو وصفني، وطلب صورة ابعتهاله بس انا موافقتش بحيث انه عارفني فا ملهاش لازمة الصور)
ولما رفضت الارتباط كان بيتحايل كتير لدرجة انه حاليا ف الجيش وكل ما ينزل اجازة يبعتلي انه عايز ييجي يتقدم بس الاول نرتبط، انا برضو رفضت موضوع الارتباط وقال انه هييجي يتقدم قولتله تمام بس حابة نعرف شخصيات بعض الاول (لاني مش حابة اتخطب لواحد معرفهوش ولا قدر الله لو محصلش نصيب مش هكون حابة ان خطوبتي اتفشكلت غير ان التعلق عندي زيادة حبتين)
هو وافق وشرط بعدها بشهر ييجي يتقدم عشان يخطب وبعد الخطوبة ب٢٠ يوم نكتب الكتاب وبعدين الفرح ييجي براحته (الحقيقة انا مش فاهمة ايه السرعة دي وغير كدا حاسة اني غلطانة لما قولتله نعرف شخصيات بعض الاول لان كدا هنتكلم واحنا منجوزش لبعض او مفيش حاجة رسمية بينا )
هو قال ان عنده شقة وتقريبا لسه متشطبتش وغير كدا هو لسه ف الجيش بس كلها كام شهر وهيخرج
أنا أكيد هصلي استخارة وادعي لو فيه خير بس انا محتاجة حد يفيدني ويلفت نظري لو في حاجة
مش حاسة اني مقتنعة بس اصراره عليا الي مخليني افكر كتير فالموضوع
انا اكيد حابة اتخطب اتجوز بس الموضوع هنا سريع اوي وغير كدا كل ما افكر ف الجواز احس اني مش مستعدة لحياة جديدة زي دي ومع حد جديد حاسة انه هيبقا مفروض عليا
ياريت تفيدوني انا لسه مقولتش لاهلي واسفة لو طولت عليكو
السلام عليكم، لو مبدئيا تعرفي عنه معلومات كافية فممكن تصلي استخارة وتخليه يتقدم، وبلاش خالص خالص تعارف في الشات بدون خطوبة رسمية، الخطوبة معمولة عشان التعارف ده وهتدرسيه فيها براحتك وبدون أي ذنب، أما الكلام في الشات او دون خطوبة حتى لو بغرض التعارف قبل الخطوبة الرسمية مش شايفة فيه فرق بينه وبين الارتباط وممكن يحصل تعلق من ناحية أي طرف وينتهي الكلام ما بينكم بلا أي خطوة رسمية وتتعبي أو تحصل مشاكل. *** لو هو جاد يتقدم رسمي، ولو السرعة قلقاكِ يبقى اطلبي تطويل فترة الخطوبة لحد ما تكوني درستِ أخلاقه وشخصيته كويس واطمنتِ إنه الشخص اللي يستحق يكون شريك حياتك، لقيتِ بعد فترة إنك لسه مش مرتاحة ولا مقتنعة به ولا إنه الزوج اللي عاوزة تكملي معه حياتك يبقى انهي الخطوبة عادي. *** الله أعلم هو مشاعره إيه ناحيتك وهل بيحبك قوي لدرجة تخليه متسرع كده ولا عنده أسباب تانية، ممكن تبقي تتكلمي معه في النقطة دي وتفهمي أسبابه، لو هو أصر على إن فترة الخطوبة تكون قصيرة جدا ومحترمش رغبتك ومخاوفك يبقى بلاش تيجي على نفسك وتضغطيها وتاخدي أي قرار متسرع تندمي عليه بعد كده. *** صلي استخارة، واستجابة الاستخارة مش معناها تحسي براحة أو نفور، الاستجابة بتكون بتيسير الأمر لو فيه خير لكِ وتعسيره لو كان شر. فتوكلي على الله وخدي قرارك أيا كان بعد الصلاة واستشارة أهلك. *** لو حصل نصيب واتخطبتِ، فأولا زي ما قلت طولي الخطوبة لحد ما تطمئني وتتأكدي من قرارك، ثانيا، بلاش تورطي مشاعرك في فترة الخطوبة وخليها بضوابط شرعية، يعني بلاش كلام حب والجو ده عشان التعلق وأنتِ مش عارفة هتكملوا ولا لأ وعشان الحب بيعمي العقل وممكن يخليكِ متشوفيش العيوب الواضحة أو تتجاهليها أو تاخدي قرارات مش في صالحك. *** بالتوفيق إن شاء الله وربنا يكتب لك اللي فيه الخير.💚💚
تم النشر الاثنين، ٢٨ سبتمبر ٢٠٢٦
أولاً، أقدر إنك بتشاركي كل التفاصيل دي بصراحة، وده بيظهر إنك بتفكري بعقل وبتحاولي تفهمي مشاعرك. اللي بيحصل طبيعي إنك تحسي بالتردد، خاصة إن الموضوع سريع جدًا وأنتِ لسه في مرحلة انتقالية بعد التخرج. إحساسك إنك مش مستعدة لحياة جديدة مع شخص جديد ده مش ضعف، ده وعي بذاتك، ومهم جدًا ما تتجاهليهوش. بالنسبة لشخصيته، الإصرار الشديد ده ممكن يكون علامة على الجدية، لكنه كمان ممكن يكون ضغط غير مباشر. الرجل اللي بيحب يبني علاقة صحية بيحترم الوقت اللي الطرف التاني محتاجه عشان يتعرف ويطمئن، مش بيحاول يسرّع الخطوات عشان يثبت نفسه. كمان، إنك قلتِ "نعرف شخصيات بعض الأول" فكرة كويسة، لكن زي ما قلتِ، لازم يكون في إطار رسمي عشان ما يحصلش تعلق بدون التزام. أفضل طريقة دلوقتي إنك تفتحي الموضوع مع أهلك، حتى لو بشكل مبدئي، عشان يشاركوا في التقييم ويلاحظوا اللي أنتِ مش شايفاه. من ناحية الاستعداد، الجواز مش بس قرار عاطفي، ده قرار بيغير نمط حياتك كلها، فلو حاسة إنك لسه مش جاهزة، خدي وقتك في التفكير بدون ما تسمحي للإصرار يأثر عليكِ. صلي الاستخارة زي ما قلتِ، وادعي إن ربنا يبعد عنك أي حاجة فيها ضرر. لو عايزة تفهمي أكتر عن شخصيات الناس، راقبي ردود أفعاله لما تقولي "أنا محتاجة وقت أكتر"، وشوفي هل هيحترم ده ولا هيحاول يقنعك تاني. جربي تبحثي عن أسئلة مشابهة على فدني عشان تشوفي تجارب بنات تانيين، ده ممكن يديكِ منظور أوسع. خدي قرارك بهدوء، ومتستعجليش على حاجة مش مريحة لكِ. لو حابة تتكلمي أكتر عن أي جزء، أنا هنا.
تم النشر الاثنين، ٢٨ سبتمبر ٢٠٢٦
لعرض السؤال في فدني اضغط هنا