السلام عليكم، أولا ربنا يصلح أحوالك ويقويكِ وتتخطي الوضع ده على خير إن شاء الله. مش معنى إنك بتقعي كل شوية إن مفيش أمل فيكِ أو مش هتتغيري. الفشل الحقيقي لما توقفي محاولات وتستسلمي للأفكار السلبية اللي عمالة تردديها على نفسك. *** كلنا بيجي علينا فترات ننتكس ونقع ونرجع لعادات قديمة افتكرنا إننا تخلصنا منها، عادي احنا بشر، فترفقي بنفسك وبلاش جلد ذات زيادة. تفهمي طبيعة الفترة اللي بتمري بها، لو راجعتِ الفترة اللي فاتت أكيد هتلاقي إنك مريتِ بضغوطات وتراكمات أدت لإرهاق نفسي وصلك للحالة اللي أنتِ فيها دلوقتي. فتفهمي إن نفسك وجسمك محتاجين فاصل وإعادة شحن ومتحاوليش تجبري نفسك ترجع زي ما كانت أو تحاولي ترجعي للنسخة القديمة بأسرع وقت ولا تحاولي تغيري كل حاجة في نفس الوقت. *** امشي خطوة خطوة، وأول خطوة إنك ترجعي تقربي من ربنا، متتقليش على نفسك بالعبادات لو مقصرة فيها كلها حاليا. ظبطي الصلاة وبعدين ابدئي دخلي الأذكار وبعدها اعملي ورد قرآن حتى لو خمس دقائق بعد كل صلاة أو حسب ما تشوفي. ** وانتبهي للأفكار اللي بتردديها على عقلك الباطن لأنه دوره ينجحك في اللي بتقوليه، هتفضلي تقولي له أنا فاشلة أنا مفيش أمل، مستقبلي ضاع، هيترسخ جواه كل ده وهينجحك فيه ويخليكِ تحققيه على أرض الواقع. فاستبدلي كل ده بأفكار إيجابية حتى لو أنتِ حاليا مش مصدقاها فمع الوقت نفسك هتصدقها وهتصبح واقع. *** هاتي ورقة وقلم واكتبي كل فكرة سلبية واعملي قصادها سهم وانفيها بفكرة إيجابية عكسها مع إثبات للفكرة الإيجابية. يعني الفكرة تقول لك أنتِ فاشلة.. اكتبي قصادها إنك ناجحة والدليل واحد اتنين تلاتة؛ قبل كده عملت كذا وكذا ونجحت في الحاجة الفلانية، وهكذا. *** خصصي نوتة لعادة الامتنان ونوتة تانية سجلي فيها إنجازات كل يوم مهما كانت صغيرة أو في نظرك ملهاش أي قيمة ولا تأثير. أي إنجاز مهما كان صغير وتافه في نظرك هو أكيد عمل فرق حتى لو مش شايفة الفرق ده. الامتنان وتسجيل الإنجازات هيخلوكِ تبطلي تركيز على نصف الكوب الفارغ والجوانب السلبية وتبدئي تركزي على الإيجابيات في حياتك وتستشعري كل النعم والإنجازات حتى الصغيرة منها. *** فأنتِ مش فاشلة خالص ولا ميؤوس منك، هي مجرد فترة صعبة وكبوة إن شاء الله هتعبريها بسلام بس بلاش يأس واستعيني بالله وإن شاء الله كل حاجة هتكون بخير. *** حاولي تشغلي الرقية الشرعية كل يوم والأفضل برضه لو قرأتها بنفسك مع سورة البقرة يوميا حتى لو حسيتِ بتعب أو كسل، الزمي نفسك بها عشان لو في حاجة هي السبب في حالتك دي غير الضغط النفسي تكوني عملتِ اللي عليكِ وربنا يحفظك من أي سوء ويصلح كل أحوالك. بالتوفيق. 💚💚
لعرض الإجابة في فدني اضغط هنا