"أحبب حبيبك هونًا ما عسى أن يكون بغيضك يومًا ما" المشكلة إنك لما بتعملي صحاب بتتعلقي بهم جدًا وبتخليهم أولوية في حياتك لدرجة بتنسي نفسك فلما يحصل مشكلة بينكم أو خصام أو حتى يمشوا من حياتك بتتعبي. الحل إنك تدربي نفسك وتعوديها إنها متتعلقش، صاحبي عادي واتعرفي على صحبات جداد لكن خليكِ وسط، لا تحبيهم قوي لدرجة تنسي نفسك وتتعبي لو حد منهم آذاكِ ولا تشكي فيهم وتكوني باردة في تعاملك معهم. الوسط حلو في كل حاجة. كل ما تركزي على نفسك وإنك تطوريها كل يوم كل ما هتقل حاجتك إنك تثبتي نفسك من خلال الناس اللي حواليكِ، هتبقي بتستمدي ثقتك في نفسك منك أنتِ. تعلقك بالناس وإنك على طول تبقي مركزة إنهم يكونوا بيهتموا لك ويبادلوكِ مشاعركِ ده بيخليكِ من غير ما تاخدي بالك ممكن تعملي تصرفات تنفرهم منك. البكاء والحالة النفسية اللي انتِ فيها سببها إنك مش مهتم بنفسك في جوانب كتيرة، اقعدي مع نفسك وهاتي ورقة وقلم وراجعي حياتك، ابدئي بعلاقتك بربنا وشوفي أنتِ قريبة من ربنا ولا لأ؟ محافظة على صلاتك وعباداتك وفاهماها ولا لأ ولو بتصلي وتقرأي قرآن هل بتكون مجرد عبادات شكلية من غير ما توصل للقلب؟ مدية اي وقت تتعلمي دينك ولا لأ. بعدها شوفي كل جانب في حياتك، علاقتك بأهلك، دراستك، صحتك وجسمك. شوفي أنتِ مقصرة في إيه وابدئي خطوة بخطوة صلحي المشاكل، خلي تركيزك إنك كل يوم تكوني أفضل من اليوم اللي قبله ولو بنسبة بسيطة جدا، تكوني تعلمتِ حاجة جديدة، قربتِ من ربنا خطوة جديدة. كل الحاجات دي هتفرق جدًا في حياتك ونفسيتك. *** ممكن تبحثي عن فيديوهات بتشرح عجلة الحياة وإزاي تعملي تقييم لحياتك عشان تخليها متوازنة. شوفي كمان الفيديو ده وتابعي فيديوهات د. أسماء على قناتها هتفيدك جدًا. https://www.youtube.com/watch?v=8xO-FS0IJKs&ab_channel=dr_AsmaaElkady بالتوفيق إن شاء الله.
لعرض الإجابة في فدني اضغط هنا