السلام عايكم
ازاي ازود ثقتي في نفسي من ناحية المذاكره وازاي اتجنب الموبايل لأنه شاغل تفكيري جدا وغصب عني بيسحبني من غير ما أحس
ملحوظه انا ف تالته ثانوي ودي اوي مره في حياتي اهتم بالمذاكره ونفسيتي وحشه بسبب قلة المذاكره او اني مش عايزه اذاكر بس بجري ورا هوايا شويه وف نفس الوقت بتصارع مع نفسي في حتة محدش هيدفع تمن فشلك غيرك
و عليكم السلام و رحمه اللّٰه و بركاته هديكي حلول عمليه تخليكي تبعدي عن التليفون أهم حاجه لازم تعرفيها إن المذاكره متبقاش على التليفون نهائي و مش هتنفع خالص حتى لو حاولتي ،لو أنتِ ثانويه عامه ف التابلت أحسن خيار للمذاكره منغير متطلعيه برا المنظومه و في طُرق كتيره لفتح يوتيوب من عليه ،، جربي تخلي تليفونك أبيض و أسود هتحسي إنه ممل و مش هتقعدي عليه كتير ، طالما أنتِ عارفه إن التليفون بيشغلك يبقا لازم تعرفي ايه الي بيشغلك ف التليفون نفسه، مثلاً لو أنتِ من الناس الي بتحب تشوف shorts سواء تيك توك أو انستا أو حتى يوتيوب ف خدي قرار حازم و امسحيهم ، أنا عارفه ان الي جيه ف بالك دلوقتي إن مستحيل ، بس هو مش مستحيل أنتِ بس عشان اتعوِّدتي عليهم ف شايفه كدا لكن هم ف الأصل أضرارهم اكتر من منفعتهم و هتعرفي ده بعد متمسحيهم و هتحسي إن حياتك فرقت للأحسن فعلاً السوشيال ميديا مش أساسيه نهائي لا أساسي يبقا عندك تيك توك ولا أساسي يبقا عندك سناب ولا أي حاجه من الحاجات دي، انا قدك في تالته ثانوي مش أكبر يعني فاهمه و عارفه أنتِ حاسه ب إيه تجاه السوشيال ميديا و بحذرك اوعي تخليها محور حياتك ، المهم بعد ممسحتي السوشيال ميديا ف التليفون مازال شيئ مُشتت ، ف ممنوع تماماً تحطيه في نفس الأوضه الي هتذاكري فيها ، حطيه ف أبعد مكان في الشقه لإنك الطبيعي لما تذاكري و تقعدي هتكسلي تقومي كذا مره عشان تجيبي التليفون ،و مهم تحطي لنفسك قانون إن لو حتى محتاجه التليفون ف حاجه مُهمه ف اعمليها و أنتِ واقفه عند المكان الي حطيتي فيه التليفون ، و لو أنتِ من الناس الي مش هتقدر تقاوم و هتقوم تجيبه كل شويه ، ف سلِّمي التليفون لوالدتك أو والدك و قوليلهم محدش يديهولك غير بليل بعد متخلصي الي وراكي تماماً بالمناسبه لو أنتِ حاسه إن واتساب بيشتتك بس هو مُهم عشان بتعرفي مِنه مواعيد الدروس و غيره ف انتِ بس محتاجه تكسري حاجز و فكره إن "واتساب ده منغيره مقدرش أعيش" و تمسحيه لمُده أسبوع حتى لو هتنزليه تاني بس عشان تعودي نفسك إن حياتك منغيره ماشيه عادي و تكسري روتينك اليومي في الشاتينج ، ف الإسبوع ده اطلبي من صحبتك الي معاكِ ف أغلب الدروس إنها ترنلك لو في درس ملغي أو اتأجل ،، و عشان تنظمي وقتك بين المذاكره و الراحه ف خلي ف وقت راحتك تمارسي هوايه ، منصحش نهائي إن ف الراحه وسط اليوم إنك تاخدي التليفون عشان غالباً هتتشتتي زياده لو مسكتيه ، تقدري تمسكيه بعد متخلصي مُذاكره اليوم كله، طب في حاله معندكيش هوايه و عايزه حاجه تشحن طاقتك بالتليفون ، ف أحسن حاجه تسمعيها وقت الراحه هي بودكاست و مش شرط يكون طويل ، ده حقيقي هيساعدك جدا ،قد تعتقدي إن هو شيئ ممل و لكن هو اكتر حاجه بعد مبتسمعيها بتديكي طاقه تكملي بيها اليوم عموماً ، و بالمناسبه هوايه هنا مش شرط رسم و قراءه ، أقل حاجه تلبسي و تنزلي تشتريلك حاجه بتحبيها ايس كريم مثلاً أو عصير أو حتى تعمليلك أكله بتحبيها المهم تغيري جو عن المذاكره عشان تعرفي تكملي أنا ذَكرت كذا مره في البرنامج طُرق لعمل جداول لإنها فعلاً مهمه لو حابه اقولهالك ، و بالمناسبه الجدول حاجه أساسيه لإنك لو نفسيتك وحشه عشان مش بتذاكري ف الجداول هتخليكي منظمه وقتك و هتيجي ف وقت الراحه مش حاسه ب ذنب إنك مبتذاكريش و لو خارجه مثلاً او حصل ظرف هتبقي عارفه الوقت الضايع ده هتعوضيه امتى و أهم شيئ هو إنك تطلبي العون من ربنا ،و متفوتيش فرض ولا ورد عشان هم دول العامل الأساسي للنجاح سواء دُنيا أو أخره ، و بالتوفيق
تم النشر الأحد، ٢٦ أكتوبر ٢٠٢٥
بصى ياست البنات يا أشطر واحده فى المجال اللى انتى حباه وعيزاه وهاتدخليه بإذن الله بس قبل ما اقولك اى حاجه عايزه اقولك انك متضغطيش نفسك وتشيليها أكبر من طاقتها ولازم تكونى عارفه ان الفتره دى مش نهايه العالم ولا نهايه المستقبل لأن بإختصار شديد مفيش نهايه للعالم غير يوم القيامه وطول ما العالم منتهاش ف فى فرصه للنجاح والتقدم ودلوقتى انتى عايزه تزودى ثقتك فى نفسك من ناحية المذاكره ودى بتتبنى على انك 1-تقنعى عقلك باللى انتى عايزاه يحصل ازاى انا اقولك عندنا العقل اللاواعى بينفذ ويطبق اللى بيتقال ليه بمعنى انك لو فضلتي تقولى انا مش هاعرف او نش هاقدر او انا مش قد الفتره دى ف أبشرى لأن بالفعل ده اللى هايحصل حتى لو قدراتك عكس كدا طب ايه الحل الحل هو اقناع العقل اللاواعى بما هو مراد تحقيقه يعنى افضل اقول لنفسى انها شاطره وقويه وذكيه والدليل ان كان فى شخص محكوم عليه بالإعدام ف فى مجموعه من الأطباء حبو انهم يعملو تجربه علميه وجابو المحكوم عليه بالإعدام وقالولو انت هايتم لدغك عن طريق نوع من العقارب الساعه المميته ووضعو غطاء على عينه وتم شكه بكبره عاديه جدا والمفاجأة انه مات لمجرد ان العقل اللاواعى اقتنع انه هايتم لدغه بعقرب سام وإن اللدغه دى هتأدى للوفاه 2-لازم يكون لدماغى حدود بمعنى ان مينفعش فى الفتره دى ولا فى اى فتره من فترات حياتى ان دماغى تكون مفتوحه لكل حاجه وكل حاجه تكون واخده حجم أكبر من حجمها لأن ده هيأثر عليكى 3-متحطيش نفسك فى اى مقارنه مع حد والحاجه الوحيده اللى تقارنى نفسك بيها انهارده هى نفسك امبارح قارنى بين اليوم والامس وشوفى هل فيه تغيير ولا لا ولو كان فيه يبقى انتى كدا ماشيه صح لكن لو فضلتي تقارنى بينك وبين الناس والله كل الناس هاتتقدم وانتى هاتفضلى مكانك ف اعملى لنفسك قوقعه متشوفيش فيها غيرك وبس 4- متخليش على المذاكره وانتى مضايقه ومخنوقه وفى نفس الوقت اكيد لازم نذاكر طب ايه الحل الحل اننا نخلق لنفسنا الجو اللى احنا عايزين نذاكر فيه ومفيش مشكله اننا لما نفهم ناخد نفسنا وننزل نشترى ليها اى حاجه بتحبها ونكافئها انها لسه بتعافر وتكافح عشان توصل للى هى عايزاه وبلاش تاخدى المذاكره على انها إجبار خديها على انها رحله بتكتشفى فيها حاجات جديده وبعد كل درس تخلصين سجلى بيه فيديو كأنك أستاذ بيشرب لطلابه 5-بالنسبه بقى للتليفون ف الحل الأمثل هو Digital Detox وده تطبيق حلو اوى بيقفل التليفون ويمنعك من فتح اى تطبيق على التليفون وبيكون على حسب عدد الساعات اللى انتى عيزاه 💞(الحاجه اللى جايه دى بقى هى جوهر الحل كله وعشان كدا حبيت اختم بيها وهى الصلاة على وقتها والصدقه والله ماتخافى على مستقبلك طول مانتي قريبه من رب العالمين وبتسعى انك تعملى اللى يرضى ربنا والصدقه هى حل لكل المشاكل واى مشكله مع الصدقه بتتحل وجبر الخواطر انك تجبرى خاطر إنسان ف تأكدي أن ربنا هايجبر خاطرك)💞 اتمنى اكون قدرت تفيدك بالتوفيق يافخر بلدك وأهلك فى المستقبل وفى اى وقت💞💞
تم النشر الثلاثاء، ٢١ أكتوبر ٢٠٢٥
"ابدئي بخطوات بسيطة زي تنظيم وقتك وابعاد الموبايل وقت المذاكرة، وخلي كل يوم هدف صغير تحققيه. لما تشوفي نفسك بتنجحي في حاجات بسيطة، ثقتك هتكبر. خدي فترات راحة قصيرة وافتكري دايمًا إن تعب النهارده هو اللي هيصنع مستقبلك 🌸" وابدئي من غير ما تضغطي على نفسك، زي تحديد وقت قصير للمذاكرة كل يوم وزيادته تدريجيًا وكافئي نفسك بعد كل إنجاز بسيط.
تم النشر الاثنين، ٢٠ أكتوبر ٢٠٢٥
وعليكم السلام ورحمة الله يا غالية، أشعر تمامًا بما تمرين به، خاصة في المرحلة الحساسة والمهمة زي ثالثة ثانوي، والضغوط اللي بتحسي بيها مع المذاكرة والهواتف وتأثيرهم على نفسيتك. خليني أساعدك خطوة خطوة: زيادة الثقة في النفس للمذاكرة تحديد أهداف صغيرة وواضحة: خلي هدفك يومي أو أسبوعي بسيط، مش لازم تكون أهداف ضخمة. لما بتحققي هدف صغير بتحسي بالرضا والثقة تزيد. الاحتفال بالإنجازات: لما تذاكري مادة أو جزء معين، خدي وقت تشجعي نفسك، حتى لو بكلمة بسيطة "أنا قدرت". تذكري نجاحاتك السابقة: فكري في مواقف قبل كده نجحتي فيها سواء في المدرسة أو حياتك الشخصية، ده بيعزز ثقتك بقدرتك على النجاح. كيفية المذاكرة الصحيحة قسمي الوقت: استخدمي تقنية مثل "25 دقيقة مذاكرة – 5 دقائق راحة" (تقنية بومودورو) عشان تضمني تركيز عالي. ابدأي بالمادة الأصعب: ساعات لما تبدأي بالحاجة اللي بتخوفك أو بتكلّفك، هتكوني أخدت أكبر جزء من التحدي من بدري. استخدمي وسائل مساعدة: زي الملخصات، البطاقات التعليمية، أو الفيديوهات التعليمية على الإنترنت. اعتمدي على الفهم مش الحفظ فقط: لما تفهمي الموضوع بتثبتيه جوه دماغك أكتر. كيفية تقليل إدمان الموبايل ضعي جدول واضح: حددي أوقات معينة فيه تستخدمي الموبايل وهتلتزمي بها. استخدمي تطبيقات للتحكم في وقت الشاشة: في تطبيقات ممكن تجبر الموبايل يعمل "قفل" بعد وقت معين. خلي الموبايل بعيد عنك أثناء المذاكرة: خلي هواتف بعيدة عن عينك ويديك. اشغلي نفسك بحاجة ممتعة بعد المذاكرة: كنوع من المكافأة، زي سماع موسيقى، أو اقرأ كتاب تحبيه. تحسين النفسية أثناء المذاكرة صلي وابتهلي لله، واطلبي العون منه: الدعاء هو أنقى دعم لنفسيتك. نوعي نشاطاتك: لو بقيتي دايمًا في حالة توتر، ارسمي، اكتبي، أو اطلعي مشي بسيط خارج البيت. تحدثي مع نفسك بإيجابية: لما تلاقي خيالك بيحبطك أو يأملك بالفشل، واجهيه بكلام مثل "أنا أستطيع"، "أنا قادرة أنجح"، "الفشل تجربة مش نهاية". تذكري: المعركة الكبرى هي مع نفسك فقط، وقولي لها "أنا أستحق أن أكون ناجحة وسعيدة". خدي كل يوم كفرصة جديدة وطريق خطوة بخطوة. لو حابة، ممكن برضه تتابعي خبراء في تنظيم الوقت والمذاكرة في موقع فدني، هتلاقي نصائح ودعم محترف بنفس الوقت. أنا هنا معاكِ لكل سؤال أو دعم تحتاجيه، لا تترددي تسألي دايمًا. ربي يوفقك ويمدك بالقوة. 🌸
تم النشر الاثنين، ٢٠ أكتوبر ٢٠٢٥
أعتقد أي حلول قبل حل .. الإعتناء بالقلب والعمل عليه من ناحية تطهيره من أي علائق .. سيكون أمرا صعبا أو ضربا من الخيال .. أقصد بكلامي الأمر قد يحتاج لبعض العزلة والتفكير ومحاولة فهم دوافع النفس والعيوب ونقاط ابضعف ومسببات الأفعال
تم النشر الثلاثاء، ٢١ أكتوبر ٢٠٢٥
لعرض السؤال في فدني اضغط هنا