السلام عليكم ورحمة الله وبركاته
انا عندي 17سنه وعمري في حياتي ما اعتمدت على نفسي ابدا في اني اعمل حاجه دايما وقتي كان دراسه المنهج عمري ما اتعاملت مع الناس في الشارع لدرجه ان الجيران ميعروفش اني اخت اخواتي كل معاملتي مع زمايل الدراسه بس
وبالنسبالي دي اول سنه ليا في حياتي كنت انزل وابدا امشي لوحدي وانا نازله مثلا الدروس من غير ماما وحاسه بجد اني مش عارفه اتعامل مع حد زي ما اخواتي بيعملو مش بمعني ان رهاب اجتماعي انا اجتماعيه وبتكلم مع الكل ودايما بتكلم عادي مع المدرسين بس لما باجي اتكلم في الحياه العامه مبعرفش
وحاسه اني مبفهمش الناس ودايما برجع لاخواتي علشان يترجمولي الكلام اللي اتقال واكتشفت ان كل اللي حواليا ملاحظين اني مبعرفش حاجه وان ممكن اي حد يضحك عليا بسهوله واني مبعرفش الناس اللي حوليا وكذا حد دايما يعلق لماما ويسألوها اذا كنت متاكده اني هاعرف اروح الجامعه واركب مواصلات واتعامل من غير ما هتكون معايا
وبجد دا بدأ فعلا يخوفني نفسي بجد اعرف اتعامل بنفسي واعرف الناس اللي حواليا واعرف الخفي من الكلام . وكمان بحس غير كده ان انا كثقافه عامه او حتى علميه معنديش رغم اني بطلع من الاوائل في المدرسه من وانا صغيره بس كل معلوماتي منهج وبس مفيش اي معلومات في مجالات مثلا يعني ممكن الفيزياء بس اللي كنت مهتمه اني اسمع التجارب والنظريات او كنت بروح المكتبه اقرا كتب فيزياء ولكن حاسه ان دا مش علم اني اعتمده كمعرفه فا يريت تقولولي ابدا ازاي اقرا واقرا ايه بحيث ان يكون عندي معرفه عن كل حاجه حتي لو بسيطه
جزاكم الله خيرا 🤍🥺
البدايات دائمًا صعبه وبناءًا على إنك لسه خارجه السنه دي ودي تعتبر بداية لحاجه جديده بالنسبالك فطبيعي جدًا جدًا تحسي بكده بس زودتي تعامل مع الناس هتزدادي خبرة مع الوقت وهتتعودي بسهوله مش هتتعلمي حاجه عالهوا كده، هتمري بتجارب والتجارب هتعلمك وهتديلك خبره أنا كنت زيك وبعد شوية تجارب خلاص
تم النشر الأربعاء، ٢٢ أبريل ٢٠٢٦
يا بنت الناس اسمعي مني انتي زي الفل وما شاء الله عليكي شاطرة وناجحة وده في حد ذاته رزق كبير من ربنا واللخبطة اللي حاسة بيها دي مجرد قشرة وهتتفك اول ما تدوسي في الدنيا والجامعة بكرة تفتكري الايام دي وتضحكي على نفسك وتقولي انا كنت شايلة هم ليه ده ربنا قال ومن يتوكل على الله فهو حسبه يعني ارمي حمولك عليه وهو هيسلكلك كل صعب وهينور بصيرتك وتعرفي الصالح من الطالح والخبرة دي زيها زي المذاكرة بتيجي بالتعود والممارسة انزلي وجربي واتعاملي بقلب جامد وما تخافيش من الغلط عشان اللي بيغلط بيتعلم وخليكي دايما فاكرة ان المؤمن القوي خير واحب الى الله من المؤمن الضعيف وقوتك في اعتمادك على الله ثم نفسك بكرة تطلعي الجامعة وتشوفي الدنيا وتتعاملي مع ده وده وتعرفي تقري الناس من عينيهم وتكوني انتي اللي بتنصحي غيرك كمان استعيني بالله وقولي يا رب وبكرة الدنيا تفتح لك ابوابها وتلاقي كل حاجة بقت سهلة وبسيطة فوق ما تتخيلي ونفسك اللي خايفة منها دي هتبقى هي سندك وفخرك بس انتي ادي لنفسك فرصة واصبري عليها شوية وتوكلي على اللي عينه مش بتنام وهو هيحفظك ويوفقك في كل خطوة وجد والله ربنا يحفظك في معاكي برودكاست العلاقات ل ياسر الحزيمي ده جميل جدا وتلاقي كذا حاجه جميله معاه وفي الدكتور عبد الرحمن ذاكر الهاشمي دكتور نفسي كويس جدا جدا جدا في كذا مجال اسمع سلسله ونفس وهتدعيلي 🌷وفي كذا حد تاني بس ركزي مع دول ولو معجوكيش ابعتي تعليق واقلك على حاجه غيرهم مش انا مش راضي تقولهم عشان متتشتتيش مش اكتر 🤍🌷
تم النشر الأربعاء، ٢٢ أبريل ٢٠٢٦
موضوع انك تكون بتعرف تتكلم ده مش لازم يكون موهبه ممكن تكون مهاره نتعلمها او نكتسبها ـ في نفس الوقت ممكن تعقدك أو تتقفل منها زي اللي حصل لك كده ـ مشكلتك بس شويه حواجز لازم تكسرها وشويه مهارات لازم تكتسبها ـ الحواجز اللي لازم تكسرها هي الخوف من الغلط والرهاب الاجتماعي فاول حاجه لازم تعملها انك تتيقن انك انسان عادي ممكن يغلط ويتعلم من غلطه وده بيحصل لما تتكلم كثير في مواضيع مختلفه مع ناس مختلفه بيعمل لك حصيله لغوية كبيرة وبالتالي هتكون جاهز لاي موضوع لانك اتكلمت فيه قبل كده ـــ بالنسبه بقى للموضوع اللي ما اتكلمتش فيها ولا مره مش عيب انك تجهز كلام مش عيب انك تكلم نفسك مش عيب انك تصور نفسك وانت بتتكلم حتى لو كل يوم عشان تعرف تتكلم عشان تعرف تواجه ـ وبكده يا صديقي هتكون قدرت تكسر حواجز وفي نفس الوقت تكتسب مهارات لان انت كل موضوع بتتكلم فيه على الاقل مره واحده حتى لو مع نفسك هتكون خبير فيه ــ اهم حاجه تكون واثق من نفسك ما تقعدش تحاسب نفسك وتندم على كلمه غلط انت قلتها انت كده هتتعقد زياده ـ وطبعا لازم تنزل وتتعامل مع بشر كثير وتكون صداقات (حاولت انصحك على قد ما اقدر في نقطة الحوار⬆️ من حيث علاقتك مع الناس) ـ اما بقى بالنسبه للاهم وهي علاقتك مع ربنا فهي لازم تكون كويسه ولازم تكون بتصلي وتذكر ربنا كويس وما تشغلش نفسك بحاجات كثير زياده عن اللزوم ولا تخلي حاجه تشغلك عن ربنا علشان ما تكونش مشتت وتايه في الدنيا ومش عارف حتى تتكلم واللي هيدخلك في الدوامه دي العلاقات المحرمه سواء كان من كلام مع شباب سوء او صديق سوء واي علاقه بدايتها لاترضي الله نهايتها مش هتعجبك خالص ـ واسال الله لنا ولك التوفيق دائما إن شاء الله
تم النشر الخميس، ٢٣ أبريل ٢٠٢٦
وعليكم السلام ورحمة الله وبركاته يا سلمى 🤍 أولاً، برافو عليكِ! إنكِ في الـ17 وبتطلعي أوائل ده إنجاز كبير، وده يعني عندكِ قاعدة قوية. مخاوفكِ طبيعية تمامًا في سن التحول ده، خاصة لو كنتِ معتمدة على أهلكِ طول الوقت. الخبر الحلو: كل ده يتغير بممارسة بسيطة وصبر، وأنتِ قادرة تمامًا. هقولكِ خطوات عملية خطوة بخطوة، بناءً على قيم إسلامية زي الاعتماد على الله والجهد الذاتي. 1. التعامل مع الناس والحياة اليومية (فهم "الخفي" والبناء الثقة): ابدئي صغيرًا كل يوم : النهاردة، قولي "السلام عليكم" لجارة أو سائق مواصلة، واسألي سؤال بسيط زي "الطريق للمحطة إزاي؟". كرري كل يوم، حتى لو مشتتة. ده هيبني ثقتكِ تدريجيًا، زي ما قال الرسول ﷺ: "أحب الأعمال إلى الله أدومها وإن قلّت". تعلمي قراءة الناس : ركزي على الاستماع أكتر من الكلام . لاحظي الابتسامة، نظرة العيون، أو إذا الشخص بيتكلم بسرعة (معناها متوتر). مارسي بمشاهدة فيديوهات قصيرة على يوتيوب عن "لغة الجسد" (ابحثي بالعربي، زي قناة "تطوير الذات"). كمان، اقرئي كتاب "كيف تكسب الأصدقاء وتؤثر في الناس" لديل كارنيجي (متوفر PDF مجانًا، قصير ومفيد). ممارسة عملية : خدي مواصلة لوحدك مرة أسبوعيًا لمكان قريب (مع إخبار أمكِ للأمان)، ودوني في مذكرة إيه اللي اتعلمته عن الناس اللي حواليكِ. بعد شهر، هتحسي فرق كبير، ومش هتحتاجي "ترجمة" من أخواتكِ. نصيحة إسلامية : ادعي الله يفتح عليكِ، واقرئي سورة الشرح يوميًا. 2. زيادة الثقافة العامة والعلمية (معرفة عن "كل حاجة"): جدول يومي بسيط (15-30 دقيقة بس) : | اليوم | الموضوع | إيه تقرئي/تشوفي | | السبت | تاريخ إسلامي | سيرة النبي ﷺ (كتاب "الرحيق المختوم"، فصل واحد) | | الأحد | علوم عامة | تطبيق "Khan Academy" (فيديوهات فيزياء/بيولوجي، 10 دقائق) | | الاثنين | ثقافة عامة | جريدة "الأهرام" أو "BBC عربي" (مقالة واحدة يوميًا) | | الثلاثاء | جغرافيا/تاريخ | كتاب "عالم في جيبك" أو يوتيوب "الجزيرة دكيومنتي" | | الأربعاء | أدب/شعر | قصص قصيرة لنجيب محفوظ أو شعر المتنبي | | الخميس | اقتصاد/حياة | بودكاست "الإذاعة المصرية" عن الاقتصاد البسيط | | الجمعة | مراجعة | ناقشي مع نفسكِ إيه الجديد اتعلمته | مصادر سهلة : كتب: ابدئي بـ"قصة الحضارة" أو "الفيزياء الممتعة" (تجارب ممتعة). تطبيقات: "TED Talks" (بالعربي)، "memrise" للغات (ابدئي إنجليزي للثقافة العالمية). مكتبات: روحي مكتبة عامة أسبوعيًا، خدي 2 كتب صغيرة. سرعة التقدم : بعد شهر، هتلاحظي إنكِ بتفهمي أخبار التلفزيون أو كلام الناس حواليكِ، وده هيخليكِ أقوى اجتماعيًا. يا حبيبتي، أنتِ مش "مش عارفة حاجة"، أنتِ بس محتاجة خطوات صغيرة. ابدئي النهاردة، وتابعي تقدمكِ في دفتر. لو عايزة نصائح أكتر، ابحثي في فدني عن أسئلة مشابهة تلاقي إجابات كتير من خبراء. ولو احتجتِ استشارة شخصية، شوفي صفحة الخبراء هنا: https://www.fedni.net/experts. الله يوفقكِ ويفتح عليكِ، أنتِ هتكوني جامدة إن شاء الله! 💪❤️
تم النشر الأربعاء، ٢٢ أبريل ٢٠٢٦
وعليكم السلام ورحمة الله وبركاته حياكِ الله كان نفسي أقولك قلة الإختلاط بالناس عافية بس يلا 😅 بصي عن تجربة شخصية وتجارب أصدقاء هقولك الخلاصة العمل التطوعي أو الخيري هيفرق معاكِ جدًا جدًا حاولي مثلًا تشوفي جمعية خيرية وتشتركي فيها هتلاقي أنشطة وصحبة هناك طبعًا هيكون في إختلاط بالناس من خلال الأنشطة مثلًا هتساعدي ناس كدا في الجمعية هيشرحولك كل حاجة ناس كتير كانت شخصييتها ضعيفة بس من خلال العمل التطوعي أختلفت تمامًا، هتفهمي الناس التعاملات وكمان شخصيتك هتكون قوية، خوضي التجربة وهتلاقي فرق كبير جدًا جدًا النقطة التانية مفيش قراءة ولا كتب هتفهمك الناس ابعدي عنهم أحسن 😅 كام سنة هتكبري بعد ما تختلطي بالناس وبعدين هتلاقي نفسك عايزة تعتزلي الناس صدقًا ولكن مفيش مشكلة تتعلمي فقة المعاملات عشان مثلًا قضاء شيء أو أمور حياتك.
تم النشر الأربعاء، ٢٢ أبريل ٢٠٢٦
اظن الموضوع كله نقص خبره مع الاحتكاك بالناس فتره الدنيا هتظبط إن شاء الله. في نصيحه لله، الشيطان ما بيبقاش شيطان واحده واحده بيتحول لشيطان والنفس سهله جدا انها تبرر لنفسها. هو يمكن الموضوع هتحسيه بعيد بس الاحتكاك مع الناس بيغير
تم النشر الأربعاء، ٢٢ أبريل ٢٠٢٦
لو عاوزة تزودي معلومات عامة اختاري حاجات عشوائية واعملي عليها زي مثلا تجارب تيسلا بما انك بتحبي الفيزيا ولو عاوزة تتعاملي مع الناس انا عن نفسي من التجارة والتفاوضات وطالما عندك معلومات عامة هتعرفي تتعاملي مع اغلب الناس
تم النشر الأربعاء، ٢٢ أبريل ٢٠٢٦
لعرض السؤال في فدني اضغط هنا