التنمر ده كان على ايه وشكله ايه ؟
تقدر تكتسب صفه اللا مبالاه وترمي ورا ضهرك لما تكون فعلا بتحقق قدام نفسك هدفك وتمارس إلي بتحبه ومشغول بنفسك وغير ملتفت للناس.. وتقدر تحط حدود وهيبه لنفسك بمنتهي الاحترام بكلمه أو بنظره علي حسب الموقف ا...
الوسط اللي بتتمرن فيه و الناس اللي حواليك مش كويسين ، المشكلة مش فيك المشكلة في بعض الناس فئة قذرة معينة لا شافت تربية ولا عرفت تهذيب ، من غير ما اطول عليك ، اللي انت فيه مش جديد انا مريت بيه ، بس انا مختلف عندك انا بعرف وقت اللزوم ابقي نوعا ما مصيبة .. نصيحتي ليك غير المكان ده او شوف لك شلة تدخل معاها و يبقوا ملازمينك زي ضلك او تلازمهم ناس شبهك مش في الشكل لكن في الإنسانية ، متدققش في كلام اي حد ، و الافضل تغير المكان ده .. فكر بايجابية .. انت بتاخد حسنات علي قفاهم يا مان 😃 في زمن محدش لاقي فيه حسنات ، دا لازم يكون دافع ليك علشان تبقي من النوع التاني من البشر ..النوع اللي الالم و التعب بيبقوا دافع ليه علشان يوصل ، بس بيفضل روحه حلوة ، و عايزك تعرف ان البشر كانوا بيأذو الانبياء و المرسلين ، مش هيسببوا اذي لبعض ، خد بالك بس انك بقيت مكروه ده معناها انك زي حالاتي بترد علي كل اهانة و مبتسيبش حقك فانا جبت اخر السكة دي و عارف فيها ايه و بقولك بلاش اسمع من اخوك .. خليك انت الاحسن ، و اتجنبهم .. عامل الناس احسن ما بيعاملوك ، اللي هييجي يقول كلمة ، اسمعها و قوله بقت قديمة بتعيد و تزيد فيها انت الشريط بيسف عندك ولا ايه .. بس و انت بتضحك ،علشان ابتسامتك هتحرق اعصابه و دايما ارمي كلمتك و سيبه و امشي ، اضرب و اجري المشكلة اللي هتواجهك انك مش هتسلك في مجال قلة الادب و لو سلكت هتبقي زيهم مش احسن منهم .. اللي بيتكلم عنك او بيتريق دا واحد فاشل و فاضي و غالبا فيه حد حط عليه في حياته و بيطلع عقده علي اللي حواليه و بينقي الضعيف ، او بيستقوي باللي معاه علي حد .. و عمر ما فيه انسان عنده ضمير هيقويه علي معصية او إيذاء .. اصبر يا صديقي انت مش لوحدك .. الناس الحساسة كتير و الاوغاد برضه كتير ، ربنا يريح قلبك و يهديك .
الفكره ان انا اصلا كنت دايما الشخص الواثق الي بيدخل في أي حاجة من غير ما يحسبها ومبيهموش بس هي تراكمات وتسلم ياسطا والله كلامك في الصميم حقيقي فعلا انا حاولت اتغير للأسوء ومقدرتش 😶 وعلى العموم انا سبت النادي ده من فتره بس الي انا عاوز اتأكد منه أن التجاهل ده قوه فعلا زي ما بيقولوا ولا ضعف
فيه حاجه اسمها فن التغافل .. بس مش لاقي الفيديو بس ده فيه نفس المعني ..https://youtu.be/_VPzfgkkieI و ده يوضح لك برضه انا ليه تعبت في حياتي بس انا اخترت انعزل عن الناس و اكتفي ببيتي و اسرتي .. علشان مبعرفش اتغافل .. دايما سابق بخطوة و دايما بقري اللي قدامي زي الكتاب المفتوح و دايما تعبان .. واحيانا بطلع غلط .. التغافل قوة يا سيف قوة لو قدرت عليها .
طب قولي يا برنس ازاي استعيد نفسي تاني واقدر ابقى قوي من جوايا واغير شخصيتي تماما وازاي اشيل اي فكره سلبيه او توتر او قلق في موقف معين
- تلاقي شغفك و تهتم بيه لو بتحب التصوير مثلا تابع اخبار المصورين و الفوتوغرافرز العرب و الاجانب علي سوشيال و الخ لو بتحب الجيمنج كذلك لحد اما تقدر تمارس هوايتك و تشتري كاميرا علي قدك او لو جيمرز تقدر تعمل ستريمنج مثلا او ايا كان شغفك تابعه و نميه بس في اوقات الفراغ فقط مياثرش علي حياتك - صلي فروضك كلها و السنن مستحيل نفسيتك تفضل وحشة و انتي بتصلي بانتظام علشان الصلاة دي بتشحن الانسان لو بتصلي بانتظام و بتحاول تكون خاشع و تقري قرآن كل يوم مش مهم قد ايه المهم لو عايز الدنيا و خيرها اقري قرآن لو عايز الاخرة اقري القرآن لو عايز الاتنين برضه اقري القرآن .. لو شاركت ربنا في كل يوم ليك في الحياة ربنا مش هيسيبك ابدا الا لو انت سيبت خليك فاكر دايما ان الدنيا دي مؤقتة ليه اكسب دنيا بس لما ممكن اكسب دنيا و اخرة .. اوعي تغضب .. الغضب بيخلي الانسان عرضة لانه يتعرض للمس من الشيطان او التلبس يعني ايوه تتلبس من جن او شيطان و بيخليك تقول حاجات هتندم قوي عليها و مستحيل تقدر تصلحها ، خد حقك بس بالادب بدون غلط او تغافل لو تقدر . ابعد عن تطبيقات السوشيال قد ما تقدر لغاية ماترجع تاخد حجمها الحقيقي مجرد حتة تطبيق صغير سيف بيديله كام دقيقية من وقته .. مش تطبيقات واكلة عقل سيف و مسيطرة عليه . اقري كتب لو مقدرتش علي تمنها عادي ، نزلها pdf و اقراها ع الموبايل .. اطلب اي كتاب انا مكتبة pdf . حياة كل انسان قصة مختلفة ( انت بطل قصة حياتك يا سيف ) تحب قصة سيف تبقي قصة عن شخص نرجسي ولا عصبي ولا مكتئب علشان فيه من دول كتير ولا تحب قصة سيف اللي من بطولة سيف و حقيقية تبقي عن انسان مختلف و مهذب و راجل بجد مش واحد عايش والسلام .. انت البطل مش حد تاني بس القصة دي مش تمثيل .. دي حقيقية . ركز في اختياراتك .. حياة الانسان فيها شوية قرارات مصيرية .. قرار هتكمل في كلية ولا هتسيب التعليم .. هتختار مدرسة / كلية / ايه و ليه .. تتقعد علي القهوة ولا هتشوف شغل ، هتضغط علي نفسك ولا مش هتستحمل ، هتعمل فلوس و تعمل حساب بكرة ولا هتعيش و خلاص هتتجوز مين .. قبل اي قرار من دول اعمل بروڤا .. يعني اعتبر نفسك و لمدة كام يوم او كام ساعة اخدت القرار و نفذته قبل ما تنفذه و احسب الاحتمالات ايه اللي هينتج عن القرار ده ليك و عليك .. و لما تخلص تفكير هتبقي عارف تعمل ايه .. نقي اصحاب نضيفة تشرفك مش بالشكل لكن التصرفات يا صديقي و بلاش تتعري نفسيا قدام حد سواء غريب او قريب .. بلاش تحكي اسرارك او طفولتك او اجزاء من حياتك او حاجات حصلت لك او مشاعرك قدام اي حد مش ابوك ولا امك ولا زوجتك .. اي حد برا التلاته دول حتي لو اخواتك يبقي بلاش . اللي هتخاف منه اعرف عنه .. بمعني اعرف كل شيء عن عدوك او اللي تقدر عليه قبل ما تفكر انك تعاديه او تحاربه و اعرف حجمك و حجمه و نقاط ضعفه .. شوفت علشان كده قولت لك بلاش تتعري نفسيا قدام حد لانك هتبقي مكشوف و هدف سهل. بلاش تغدر ، بلاش تطعن في الضهر ، بلاش تحكم بالمظاهر .. سيب الناس للي خالقها و انشغل بحالك و بس .. لو جالك فرصة تعفو عن حد اساء ليك اعفو بس برضه خليك حريص اللي سبب لك أذي مرة ممكن يؤذيك تاني .
لعرض السؤال في فدني اضغط هنا