ازيك عاملة ايه يارب تكوني بخير🤍 أولا قبل اي حاجه عايزاكي تعرفي معلومة ان كلنا و احنا بنات في سنك مرينا بال بتمري بي و نفس احساس تملك و تحكم من الاهل بس لما كبرنا فهمنا أن ده كان خوف منهم علينا من الي بيحصل حوالينا في دنيا و بقينا نشوف الدنيا من وجهة نظرهم و فهمنا ان طريقة تربيتهم لينا الي كانت ساعات كتير اوي بتدايقنا كانت دي محاولة منهم من انهم يحمونا من الدنيا، بس في نفس الوقت مقدرش اقول انها طريقة صح بس الي اقدر اقوله ان كل واحد بيربي أولاده علي قدر معرفته و جيله يعني انتي ان شاء الله لما تكبري و تتجوزي و تخلفي هتربي أولادك بطريقة مختلفة تماماً زي أمهات الجديدة دلوقتي كده بيقرأوا في التربية الحديثة و علم نفس و في توعية رهيبة دلوقتي بكل شئ لكن امهاتنا احنا الي هما من جيل مامت حضرتك مختلفين تماماً انتي لازم تبقي واعية بالنقطة دي علشان كده مامتك لما بتقوليلها دكتور نفساني هي في دماغها ان دكتور ده هيجننك لان ده للأسف المفهوم الغلط الي كان منتشر زمان. ف أول حاجه عايزها منك تفهمي ان في فجوة كبيرة بينك و بينها في الأجيال و مصطلحات و المفاهيم، طب الحل؟ ان اغير مفهاميها بعد السن الي هي وصلتله ده؟ أن اجي اقولها الصح و الغلط؟ لا خالص و اوعي تعملي كده اول حاجه هتيجي في بالها انك مش بتحترميها و بتعدلي عليها و كل كلام ده الي اكيد سمعتي مية مرة، الطريقة الوحيدة لحل موضوع انك تعرفي ازاي توصلي معاهم لوضع يرضيكي و يرضيهم و تتناقشي معاهم بطريقة الصحيحة الناضجه الي من غير عناد، و ده هينقلنا للنقطة العند انتي قولتي انك حد عنيد جدا جدا و ده يبرر طريقة تصرف الي بياخدوها معاكي الي هي بتأذيكي نفسياً و جسدياً كمان. بصي انا مش هقولك هما صح و استحمليهم لا اعرفي أن مش صح حد يمد ايده عليكي او يهينك و ده حقك من ناحيتهم، بس بردو استني حقهم الي عندك فين بقا؟ زي ما هما مش من حقهم يضربوكي و يعاقبوكي بالطريقة دي، انتي كمان مش من حقك تعندي و تتعبيهم معاكي مش من حقك تأذيهم فيكي. بصي هما دي طريقتهم في الحفاظ عليكي و علي مصلحتك يعني بابا عايزك تلبسي الحجاب ماليزي غصب عنك ليه؟ علشان شايف ان ده بيقربك من ربنا و بيحافظ عليكي و بيسترك بس هو مش عارف يوصلك كده فبيوصله بطريقة أمر انه بيأمرك بكده و خلاص مفيش نقاش طب هل هو كده غلطان؟ ايوة بس لو بصينا لسنه و لجيله و النقطة الي كلمتك بيها فوق هتلاقي نفسك فهمتي وجهة نظره و راعيته و عرفتي كمان تتعاملي معاه. بصي انا فاهمه كويس إحساسك بالتحكم ده و انك مش عايزه تحسي ان حد ميسيطر عليكي و ده احساس كلنا مرينا بي و احنا في سنك و الي هو سن المراهقة فده احساس طبيعي بس خلينا نبص كده لكل حاجه في الدنيا و هنغير اسم الشخص الي بيتحكم فينا ل ولي أمرنا اي حد بيتولد سواء ولد او بنت مش بيبقا لي ولي امر؟ طب لقدر الله بعد فترة ولي امر الي هو الأب توفي؟ الأم تروح تعمل وصية علي بنتها يعني هي المسئولة عنها قدام القانون لحد ما تم ٢١ سنة و تبقا وصية علي نفسها طب ده في قانون الدنيا طب عند ربنا بقا؟ ربنا هيحاسب ماما و بابا عليكي ربوكي تربية صالحة ترضي ربنا ولا لا، طب مامتك و باباكي دول مش كانوا زيك بردو و ليهم ام و أب و بيأمروهم و بينهوهم؟ لو بتكلمي عن الامر و نهي في ده شئ مفروغ منه علشان احنا كلنا مش بمزاجنا ان نسمع كلامهم ولا لا ربنا أمرنا بكده لو عايزين رضي ربنا يبقا نراضيهم و اكيد سمعتي كتير عن عقاب ربنا لعقوق الوالدين، ربنا أمرنا منقولهمش حتي أف بس كده طب تفتكري بقا انتي لما تصبري علي الحجاب الي باباكي أمرك بي علشان ترضي ربنا طبعا أول حاجه ثم ترضي باباكي كده انتي ملكيش اجر عند ربنا؟ طب تفتكري ان اصلا اي وجع او ألم انتي حاسه بي دلوقتي ربنا مش حاسس بيكي او مش بيديكي عليه اجر علشان انتي صابرة علشان ترضيهم؟ صدقيني ربنا رحيم اوي و حاسس بيكي و بكل معاناة الي في قلبك قربي من ربنا و صلي و احكيله كل الي مدايقك، و صلي قيام ليل ركعتين كده قبل الفجر واحكي لربنا علي كل الي مدايقك و نفسك فيه و مستحيل ربنا يردك صدقيني بيعمل معجزات والله و عن تجربه
كلامك كله صح ونا فعلا م مديه ربنا حق عبادته
تم النشر الأحد، ١٧ ديسمبر ٢٠٢٣
لعرض الإجابة في فدني اضغط هنا