انا كنت بحب بنت عادي بس حبيتها بسرعه وكان اضطراب مشاعر وارتبطنا وكنت شايفها ف الاول كويسه جدا وملتزمه وهاديه وفيها صفات كنت عايزها و ارتبط بيها بعد شهرين من ارتبطنا لقيت انها مش الشخص اللى كنت عايزه او مش الشخص اللى حبيته ف الاول ولقيت تصرفات كتير معجبتنيش مكنتش واخد بالي منها ف الاول المهم حصل مبيننا مشكله وانا نهيت العلاقه عشان حسيت اني اتسرعت وفنفس الوقت هيه كمان اتسرعت فموضوع الارتباط بيا ده والمهم حصل مشكله وقررت انفصل ونبعد والبنت دي ليها صديقه تانيه حاولت تصلح مبيننا بس كنت خلاص ادركت ان انا غلطت لما ارتبط بيها وكان لعب عيال ومش جد خالص ومش دا الشخص اللى انا عايزه او مش دي الصفات اللى شوفتها فبداية العلاقه المهم البنت التانيه صحبتها شافت فيا صفات كتير وحشه كانت لازم تتعدل وحبيت تخليني ابقي شخصيه احسن مع العلم انها محترمه جدا ومش غرضها انها تاخدني من صحبتها بالعكس دي كانت بتحاول تساعدني بس وهيه دارسه علم نفس وادتني مهله عشان اتعالج فيها وابقي شخص احسن ومبقاش عصبي ومبقاش متضزايق و انسي كل اللى عدي عليا من ذكريات كانت صعبه تتنسي المهم انا مع الوقت لقيت البنت دي مثقفه جدا ومتفتحه فالعلم وف الكلام و شخصيتها فعلا كويسه وحسيت ان هيه دي الشخص المميز اللى انا كان نفسي يبقي جمبي ويساعدني فحياتي كلها ويبقي يعدل مني واعدل منه والمهم حبيتها والبنت للاسف بردو كان عندها ماضي وحش مخليها بتتعامل مع الناس كلها بجفاف ومش حابه انها تخلي حد قريب منها بس كنت فالوقت دا بجد عايزها تكمل معايا وتبقي نصي التاني ومكنتش عايز ارتبط بيها دلوقت عشان مغلطش نفس الغلطه الاولانيه واظلمها معايا وكنت عايز بس الوقت يعدي بيننا اشوف هفضل احبها فعلا ودي الشخص اللى انا عايزه ولا لا والمهم انا حبيت البنت دي جامد فعلا وبقيت عايزها حتي بعد م المده تخلص لانو فعلا محدش لي سُلطه على قلبه لما يحب حد ويبقي عايزه جنبه والمهم فاتحتها فموضوع اني اكمل معاها ومش شرط ترتبط بيا بس اكون جنبها حتي لو صحاب وبعد معاناه كبيره البنت وافقت وقبلت انها تديني فرصه نبقي صحاب يمكن مشاعرها تتغير وتحبني مع الوقت ودلوقت انا عايز افضل جنبها بس مش صحاب بس انا عايزها تبقي جنبي علطول مش زي مقولتلها نبقي صحاب بس و حاسس ان هيه الاختيار الصح والشخصيه اللى حبتها بجد
انت متاكد من حبك لها فعلا ... ولا ده مجرد انبهار وهياخد وقته ويروح! لان كتير اوي بينبهر في الاول .. وبيتهيأ ليهم انهم بيحبوا .. وفي نفس الوقت، معامله الشخص اللطيفة وكمان مساعدته ممكن تكون عامل جذب قوي. وفيه حاجه اهم، الخروج من علاقة ودخول في علاقة تانية بالشكل ده بيكون مجرد تعويض وعلاقة بديلة .. للعلاقة القديمة. فيه كذا عامل ممكن يكون موجود .. والمشكلة الاكبر انك متاكد جدا من حبك ليها، على الاقل استنى لما تعرفها كويس ويبقى بينكم مواقف علشان تعرف تحكم صح. وعلشان ده يحصل لازم العلاقة ديه تاخد منحنى تاني وهي الخطوبة. بلاش تغلط نفس الغلطة وترتبط بيها .. وبلاش برضه تعملوا نفسكم صحاب .. ده حرام، وده حرام.. غير ان علاقة الصحوبية ديه بتبقى علاقة مبهمه جدا، تبقى انت بتحبها وهي تبقى عارفه، وتمثلوا على بعض انكم صحاب!! ف ازاي ده؟ ياريت تبقى واضح اكتر ف علاقتك بيها، وزي ما قولتلك العلاقة تاخد منحنى رسمي وشرعي.
تم النشر الخميس، ١١ يناير ٢٠٢٤
اثبت عند مبدأ عدم تكرار فكرة الارتباط ولما تكون جاهز لشىء رسمى.. قولها انك عاوز تتقدم لها لانك حابب هى تكون شريكة حياتك. بس ياريت تكون متأكد من مشاعرك لان احساس انك تنجذب للشخص اللى دعمك وساعدك تتخطى الم او ساهم ان شخصيتك تكون أفضل ده احساس مش شرط يكون حب.
تم النشر الخميس، ١١ يناير ٢٠٢٤
انا من رأي احساسك نحيه الاولى والتانيه ميتسماش حب اصلا . مشاعرك نحيه الاولى مكنتش حقيقيه وانت عارف دا والتانيه انت حبيت اهتمامها بيك بس وكمان مش ضامن هيا بتحبك ولالا هيا عايزه تعيش دور المنقذ بس وتطبق عليك الكام كلمه الي هيا قرياهم ف علم النفس الحب مفيهوش حاجه اسمها هعالجه واغير منه او انت تغير منها زي مبتقول
تم النشر الأربعاء، ١٠ يناير ٢٠٢٤
ادعي كتير بالخير وربنا هيرشدك
تم النشر الجمعة، ١٢ يناير ٢٠٢٤
أولا اهنيك جداا انك عرفت غلطتك الاولى وتسرعك وادركت ان دي علاقه مش لعب وقررت انك تتعامل بحذر وتتأكد من مشاعرك الاول والاهم من ده انك متتسرعش والجميل كمان انك ادركت ايه الجوانب السلبيه اللي فيك وغيرتها وصدقني الانسانه اللي تساعدك وانت تايه وتوصلك لأنك تبقى احسن هي دي اللي تستاهل انها تكمل معاك متتخلاش عنها ابدآ واتمسك بحبك وقبولها انكم تبقوا اصحاب ده مبدءيآ شئ مبشر حاول معاها كتيير ومتيأسش وصدقني طول ما انت بتحبها بالطريقه دي هي مع الوقت هتحبك والست متتمناش غير راجل يحبها بجد ويهتم بيها كأنها بنته واقدر اقولك اخي العزيز طريقك لقلب حبيبتك الأهتمام اهتم بكل حاجه تخصها حتى اتفه الاشياء بس اهتم بطريقه تجذبها ليك طريقه محببه مش تخنقها بيها لأن البنات بتخاف من فقد الحريه او التحكمات اتعامل معاها بطريقة مميزه أظهر لها حبك في حنيتك عليها والغيره طبعاً شئ اساسي من اساسيات الحب بس لو حصل موقف غيرت فيه حاول تتحكم في اعصابك ومتتهورش وتحرجها وفي نفس الوقت متخفيش غيرتك لأ اظهرها وخليها تحس بيها وتشوفها وتشوف معاها كمان انك متحكم في غيرتك وعصبيتك لأنك مشتري خاطرها وطبعآ الاساسيات عند الست دلعها فرحها خليك انت الشخص الوحيد او من الأشخاص المميزه عندها اللي يعرفوا يرسمه الابتسامه على وشها ازرع نفسك في يومها بأي طريقه علشان تبقي جزء من حياتها ولو غبت تحس انها مفتقداك واه صحيح شد وارخي يعني قرب اووي وتعالى في مره ابعد شويه واشغل نفسك بأي حاجه لأن عنصر الأشتياق مهم جدآ في العلاقه واخيرا حسسها انها بنتك الوحيده عاملها كأنها طفلتك المميزه وصدقني لو عملت بالنصايح دي ابقى اعزمني على الفرح مشوارك صعب بس مش مستحيل اسفه على الاطاله
تم النشر الخميس، ١١ يناير ٢٠٢٤
لعرض السؤال في فدني اضغط هنا