---أولا ماقاله الإخوه كفا ووفا جمّعي الكلام ده والكنوز دي وحطيهم نصب عينيكِ & لازم لازم لازم يكون عندك هدف لقدام يحركك ---ثم لازم لازم لازم. الاهداف اليوميه مينفعش السنه تمشي بالبركه ومينفعش يومك يمشي بالبركه (يعني هدف +مهام يوميه) ---الضغط( الجسدي) ف المذاكرة لاشيء بدليل انك ممكن تعملي مجهود كبير جسدي وعادي جدا زي شغل او تمارين حتى لو كان معاه ألم بيروح بعدها بساعات -اما الضغط النفسي اللي بيحصل من المذاكره بالذات أو الخوف من مواد متراكمة ده بيعمل بلاوي حرفيا وهيكرهك ف عيشتك ونفسك ويخليكي تهربي من المذاكره عن طريق تصفح السوشل ميديا أو النوم الكتير ودي اكتر وسائل الهرب من الضغط---والحل انك تكوني هادئة وثابته ومطمنه مهما حصل من تراكمات أو من مقارنه أو أي حاجه لازم تكوني قوية نفسيا ومش بتتأثري بمقارنة أو مراكمة وطالما نفسيتك كويسه لمؤاخذه طظ ف أي حاجة ف المجموع وف تالته ثانوي وكل حاجه حرفيا لو طلعتي ب 50 ونفسيتك كويسه احسن من طب بس متدمرة نفسياً ---نصيحة من ذهب : خلي وقت ثابت ف يومك أساسي المذاكرة أيا كان امتى وقد ايه لكن تتعودي عليه كل يوم هتلاقي نفسك مركزه ف الوقت دا علطول حتى لو قليل وتزويد باقي اليوم او تنقضي حسب المهام اللي عليكي -وتخلصي أول بأول ولو راكمتي عادي لكن دوسي بنزين في الحالة دي . ---الموبايل ثم الموبايل ثم الموبايل لازم تحطي قيود وحدود عن طريق انك تمسحي اللي تقدري علية أو تستخدمي التابلت أو تخلي حد من أهلك يشرف على استخدامك ممكن تخلي وقت للموبايل ف اليوم تشوفي الرسائل او تصفح شوية لكن تحت إشراف ومتابعة ومتستخدميش الموبايل قبل النوم بساعةولا بعد الاستيقاظ بساعة ---المتابعة - لو تقدري تدخلي حد من أهلك يتابع تقدمك ف المواد اعملي كدا ومتضايقيش ولا تتخنقي من الموضوع ده لو حد عمل كدا من غير إرادتك -ولو تقدري تتابعي تقدمك مع نفسك ممتاز ---ولو هتسمعي من أخوكي فبالله عليكي لاتتركي الصلاة ولا تأخريها اقسم بالله لو اخرتي الصلاة ربنا هيأخر عليكي حياتك ---ورد القرآن مش هقولك أهم من مذاكرتك أهم من حياتك شخصيا والتزمي بقيام الليل ثم قيام الليل للصبح -وصلاة الضحى تساوي 360صدقة - و12 ركعة تطوع (النوافل ) يبني الله لك بيتا في الجنه -وسورة الإخلاص تعادل ثلث القرآن ـولاحول ولا قوه الا بالله كنز ف الجنة ومفتاح الرزق وسعادة الدنيا والآخرة في الاستغفار وذكر الله و الصلاة على نبيه ---وهتدعيلي لما تشوفي معجزات الذكر بعينك اذكري الله من قلبك واستغفريه بندم وصلي على النبي باشتياق- --وربنا قريب و(يا) نداء البعيد ف لما تيجي تدعي ربنا قولي رب وفقني رب ارزقني أو اللهم وهاتان طريقتا الدعاء المذكورة في القران وتليها إجابة فورية إن شاء الله - بس كدا دي كانت خطة لمرحلة جديدة سعيدة انشاء الله من حياتك معرفش انتي عملتي ايه في حياتك علشان ادخل التطبيق اللي مفتحتوش من شهور واكتب كل دا لكن أتمني اكون قدرت أفيدك ولو ب 1% من أي حاجه أو يمكن كنت محتاج دعوة منك يمكن تصلح حالي انا ونكون كسبانين كلنا اسأل الله أن يوفقنا جميعا
@mostafa . "شكراً جداً على نصيحتك، أنا استفدت منها كثيراً وفرقت معايا أكثر مما تتخيل. كلامك فعلاً حركني من جوايا وده خلاني أشوف الأمور بنظرة أوضح للمستقبل. و كلامك عن الصلاة كان اكبر تحفيز ليا بجد أنا ممتنة لك، وربنا يجعله في ميزان حسناتك، ومش هنسى كلامك اللي فرق معايا. جزاك الله خير الجزاء، ورفعك إلى أعلى درجات الجنة.
تم النشر الاثنين، ٤ مايو ٢٠٢٦
لعرض الإجابة في فدني اضغط هنا