اولا السلام عليكم ورحمة الله وبركاته
انا عندي مشكله كبيره بالنسبالي إني مش بعرف أحضن امي مهما عملت بحس بشعور اني مش قادره أقرب وحتى لو امي حاولت تحضني تلاقيني تلقائيا ببعد.
حاولت أكثر من مره أكسر الحاجز ده بس فشلت 💔
انا قاعده في سكن جامعي بروح لأهلي كل أسبوعين . امي بتبقى مستنيه اني آجي احضنها 😭 💔 بس انا مش بعمل كده بالرغم من اني انا نفسي اعمل كده جدا وكتير ما ببقى محتاجه حد يحضني .
فالنهارده رجعت من السكن و امي مش كانت ف البيت ف لما جات من بره استقبلتها على الباب بابتسامة وسلمت بأيدي عادي فقالت لي حد بيسلم كده قلت لها بأسلوب بارد عكس اللي جوايا انت عيزاني اسلم عليكي إزاي فكانت لسه هتجادل معايا ولكن جم اخواتي وعملوا دوشه وامي انشغلت معاهم . ففي وسط الكلام اخواتي بيقولو لي حاسين ان بقالك فتره طويله بعيده عننا مش اسبوعين عكس كل مره كنا مش بنحس بغيابك ، كنا بنحس انك بتيجي بسرعة فبسأل امي لو كان الكلام ده صح فأكددت لي أن كلامهم صح .
ودي مش اول مره قبل كده من سنه قعدت شهر الامتحانات كله مروحتش البيت فأمي حضنتني وجت تبوسني فبعدت بسرعه جدا بشكل محرج.
انا جرحت مشاعر امي واحرجتها أنا قرفانه من نفسي ومش طيقاني
الموضوع ده كسرني جدا جدا من جوايا دموعي بتنزل لوحدها و انا بكتب
امي احسن ام في الدنيا كلها ضحت كتير علشان انا نفسي اعوضها ولو بشيء بسيط
انا مش عارفه انا ليه بعمل كده
وعليكم السلام ورحمة الله وبركاته ، أنا اخوكى عبدالله عندى 17 سنة ، قصتك مشابهة لقصة اختى امى توفيت وانا فى أولى ثانوى أنا فى تالتة دلوقتي ،امى كانت اغلى حاجه عندى كانت نور عينى ولغايت دلوقتي اول ما بشوف قبرها والله العظيم بضحك تلقائيا ، المهم اختى كانت بتحب ماما جدا بس نفس حالتك دى كانت مبتحضنهاش ابدا ونفس حالتك بالظبط ، المهم عاوز اقلك دا مسبب ليها وجع نفسى يمكن مش باين عليها بس انا عارف اختى اكويس ، بعد ما توفيت امى حست بالندم بس خلاص فات الأوان ، واللى عاوز بجد اوصلهولك متخلئش حاجه تمنعك ولا كبريائك ولا نفسك ولا شيطانك لأن حزنك وحسرتك هتبقى أشد وأشد 100 مرة من دلوقتي لو توفيت ربنا يطول فى عمرها مقصدش بس بالله عليكى فكك من كبريائك دا واحضنى امك والله دلوقتي وفى كل لحظة بتمنى لو يرجع بيا الزمن علشان افضل حاضنها مع انى كنت بحضنها وبساعدها فى شغل البيت والمطبخ ودا كلو بس حزين على أختى أنها مش قدرت تبقى كدة وبما انك اختى فى الإسلام فبالله عليكى ما تغلطي نفس الغلطة حضن الأم دفا للقلب وزال للهم وراحة لا تعادلها راحة 🤎
تم النشر الأربعاء، ٣ ديسمبر ٢٠٢٥
ده يمكن ناتج من علاقتك بيها سابقا لكن حاولي تحسسيها بحبك ليها حتى لو هتتصنعي ده بس من باب البر بالوالدين يعني ممكن تكوني خجوله زياده أو مش بتحبي حد يلمسك بس في الأول وفي الآخر دي مامتك وطالما آنتي فعلا بتحبيها حاولي بقدر الإمكان تحسسيها بده وادعي إن ربنا يعينك على ده
تم النشر السبت، ٦ ديسمبر ٢٠٢٥
@Reham Mohammed هو ده نفس اللي بيحصل معايا
تم النشر الاثنين، ٨ ديسمبر ٢٠٢٥
وانا، بس دا علشان انا مش متعوده من صغري فلما بيعملوا كدا وانا كبيره بحس بشعور غريب وعايزه ابعد واحرج
تم النشر السبت، ٦ ديسمبر ٢٠٢٥
علاقتي ب أبويا مش حلوه بس بتعامل معاه بمايرضي الله
تم النشر الجمعة، ٥ ديسمبر ٢٠٢٥
هحاول إن شاء الله
تم النشر الخميس، ٤ ديسمبر ٢٠٢٥
بصي هي مرة لو عملتيها هتتعودي عادي بصي أول لما ترجعي من السكان الجامعي وأمك تفتح الباب احضنيها بجد حاولي معلش هتكون صعبة أول مرة بس لو عملتي كدا هتلاقي نفسك مرة ورا مرة بقى الحضن عادي جداً🤍✨
تم النشر الخميس، ٤ ديسمبر ٢٠٢٥
وربنا يصلح ما بينكم ويصلح حالك
تم النشر الأربعاء، ٣ ديسمبر ٢٠٢٥
هقول لك على طريقه تبتدي بها في الكلام معاها الاول اعرفي حاجه هي بتحبها قوي تجيبيها لو هي حاجه قليله هاتيها لها برده الحاجات الثانيه ودي الاهم حاولي تغيري من طريقتك حاولي ما تبقيش سباقه بالغلط يا شيخه هي لو حتى غلطت فيك مش مشكله يعني حاولي ان انت يعني ايه ما تبقيش غليظه في التعامل معاها ماشي اهم شيء انك تحسسيها انك مهتمه باي بيها باي شيء فيه المكان عشانها او اي حاجه مهتميه بيها هي حاجتها او اي حاجه مخصصه بها او ليها كده يعني كده يعني الحاجه الثالثه لو عرفت تبقي فاضيه في يوم او الوقت اللي انت بتكوني فاضيه فيه قضيه مع مامتك اقعدي معاها افتحي التلفزيون شوفي طلبات البيت خشي المطبخ وخلصيه كده يعني يعني ساعه اما تيجي تكون موجوده ريحيها اعمل لها كوبايه شاي يعني شوف الحاجه اللي بتحبها تعملها اعمليها لها حاولي تبقي المهتميه بيها بس اهم شيء وانت راحه ليها هاتي لها هديه اهم شيء الهديه هي ممكن يعني تعمل لك 20% من الحكايه دي وممكن تجيب لك 70% وانت عليك الباقي بس اهم شيء حاولي تهتمي بوالدتك شويه وبطلي الطريقه اللي انت بتعامليها بيها حاولي تتحسني معاها في المعامله قولي لها انت الحاجه اللي زعلانه مني فيها كلميني فيها لوحدنا الحاجه اللي حباها قوليها عادي بس برده بيننا وبين بعض انت يعني انت ووالدتك بس اهم شيء ما يكونش قدام حد وربنا يصلح ما بينكم بس اهم شيء وصيه من اخ صلي وادعي ليها بدوامل الصحه والحال
تم النشر الأربعاء، ٣ ديسمبر ٢٠٢٥
طب ده يعتبر خجل بلا داعي وده بسبب انك في شعور سلبي من تأنيب ضمير وكره نفس .. فالشعور السلبي ده بيخلي الإنسان متجمد وخايف حد يقرب له أو يسلم عليه .... يعني انا كاره نفسي فشايف ان اي حد هيقرب مني او يسلم علي هيكتشف حقيقتي الكريهة فببدأ احط حواجز بيني وبين الناس ... فالشخص لازم يحب نفسه أولا عشان تنهار كل الحواجز دي
تم النشر السبت، ٦ ديسمبر ٢٠٢٥
لو في خلل في علاقتك بالأب فده سبب كبير بيأثر على الشخصية .. فإيه علاقتك بيه ؟
تم النشر الجمعة، ٥ ديسمبر ٢٠٢٥
ممكن تكون حاجة حصلت ما بينكوا في الماضي وعقلك مش مستوعبها -حاولي تروحي لدكتور نفسي
تم النشر الخميس، ٤ ديسمبر ٢٠٢٥
والله بهتم بكل تفاصيلها والحاجات اللي محتاجها واللي بتحبها قدر الإمكان. انا بتعب جدا لما يكون نفسها في حاجه ومقدرش اجيبهالها يعلم ربنا والله بحاول ابرها قدر الإمكان. + علاقتي ب امي قريبه جدآ هي مصاحباني مبتتكلم معايا في كل حاجه وانا مش بخبي عليها حاجه بس عند نقطه اني احضنها دي بعجز تمام بحس اني قلبي هيوقف و هعيط واني مقدرش اعمل كده
تم النشر الخميس، ٤ ديسمبر ٢٠٢٥
لعرض السؤال في فدني اضغط هنا