انا بتعلم تعلم ذاتي عاوز طريقه الخص فيها فيديوهات يعني كورسات او كده اسمع ازاي الخصه واذاكرو ياريت لو حد يفيدني انا مشترك في المنتور وبشحن الباقه موبايل وبحمل كورسات من الهديه وعلي اليوتيوب كذالك فعاوز اخد كورسات كتير يعني عشان استفيد من اشتراكي في المنصه يعني في كورسات محتاجها حاليا وفي كورسات مش هعرف احصل عليها ومحتاجها كمان فعاوز اعرف ازاي استفيد منها بحاول اني الخص بس بطلع بنتيجه اني بكتب نفس الكلام الي في الفيديو وبياخد صفح كتير بيبقا منظر مش حلو كمان ياريت لو حد فاهمني يجاوبني
السلام عليكم، أولا، بما إنك بتتعلم ذاتيا فاقترح إنك تشوف كورس (تعلم كيف تتعلم) هو على كورسيرا لو تحب تدرسه مفصل وهيفيدك في طريق التعلم الذاتي، ده رابط الكورس https://www.coursera.org/learn/learning-how-to-learn-ar أو ممكن تسمع تلخيصه على يوتيوب، أكثر من قناة منزلة ملخص منهم أحمد أبو زيد. https://www.youtube.com/watch?v=7nmKtI7fEmU ********* ثانيا، بالنسبة لمشكلتك مع الكورسات والتلخيص، فأنت عندك نقطتين عاملين لك اللمشكلة، إنك مشتت نفسك ومش محدد أولوياتك. مش عارف إزاي تستفيد من الكورس. أنا متفهمة جدا نقطة إنك مشترك وعاوز تستفيد من الاشتراك لأقصى درجة وتخلص أكبر قدر ممكن من الكورسات ومتخرجش خسران. عاوزة أقول لك إن حصل معايا ده لما أخدت شهر مجاني من skillshare وبقيت مشتتة ومش عارفة أبدأ من أي كورس وأخلص إيه ولا إيه، وتقريبا الشهر خلص واستفادتي كانت قليلة مقارنة بلو كنت ركزت على أولولياتي ووقفت تشتت بين الكورسات. وكمان وفرة الكورسات على يوتيوب أو مواقع الكورسات بتعمل نفس المشكلة. ** فأنت لازم لازم تحدد أولوياتك. مش مطلوب منك تخلص كل كورسات الموقع عشان تكون استفدت من الاشتراك. لو خلصت كورس أو اتنين بتركيز وفهم وتطبيق هيكون أحسن بكتير من تشتتك ده ومحاولة الاستماع لأكثر من كورس أو إنهاء الكورسات بسرعة دون استفادة حقيقية. ***** يا ريت تعمل قائمة من ٣ أقسام على حسب الأولويات، كورسات ضرورية (التعلم الآن)... خاصة بالمهارة اللي هتشتغل بها حاليا أو الأهم فيهم. كورسات (التعلم لاحقًا)... دي مهمة بس مش أولوية وممكن تؤجلها. كورسات (إطلاع.. ممكن التخلي عنها)... دي كورسات لمهارات بتثير اهتمامك لكن مش هتفيدك بتعلمها ولا محتاجها حالا. ****** بالنسبة للتلخيص: قبل ما تبدأ حدد هدفك من الدرس، يعني متقولش أنا هقعد أخلص الدرس الفلاني من الكورس في ساعة... شوف الدرس عن إيه وحدد الهدف. لنفترض بتدرس كورس عن (كتابة محتوى السوشيال ميديا) مثلا الدرس الأول فيه تعلم كتابة الهوك (الخُطاف- السطر الافتتاحي للبوست) فتقرر إنك هدفك دلوقتي تتعلم إزاي تكتب الهوك. لو الدرس طويل، قسمه لعشر أو عشرين دقيقة. اسمع الشرح الأول بتركيز ومن غير ما تكتب أي حاجة ولو احتجت تعيد جزء رجع الفيديو عادي ومتستعجلش... ممكن كمان تسمع أول مرة وأنت مزود السرعة وتاني مرة استماع هادئ وبتركيز أكبر. خلصت الشرح، هات ورقة واكتب المعلومات اللي فاكرها أو خليها إجابة على الأسئلة دي: إيه الأفكار المهمة اللي قالها؟ إيه الحاجة الجديدة اللي تعلمتها؟ إزاي أطبق اللي شرحه؟ مش لازم تكتب كلامه بالضبط... اكتب اللي فاكره بالعامية ومن تفكيرك أنت... ممكن يكون صعب بالأول لو أنت مش متعود على الكتابة والتعبير عن أفكارك لكن الكتابة والتعبير عضلة بتنمو مع التمرين والاستمرارية. بعد نهاية الدرس خالص، ممكن بقى تعمل صفحة واحدة تلخص فيها أهم المعلومات اللي اتقالت ولو نسيت جزئية ممكن تشغل الفيديو بسرعة وتسمع عشان تتأكد. بعد يوم أو اتنين راجع معلوماتك من غير الفيديو، واقرأ الملاحظات والجزئية اللي تنساها ارجع اسمعها عادي. ********* الفكرة مش في سماع الكورسات خالص ولا الكم اللي خلصته منها، الفكرة في تطبيق اللي بتسمعه. سمعت عشرين كورس ومطبقتش، كأنك مسمعتش حاجة وهتنسى بعد يومين. أي معلومة اتشرحت ولازمها تطبيق على طول طبق بنفسك... التطبيق هيفيدك في تثبيت المعلومات وكمان هيخلي معك نماذج عمل لبورتفوليو قوي إن شاء الله لما تحب تقدم على شغل. *** طولت كتير بس أرجو إن المعلومات دي تفيدك. وبالتوفيق إن شاء الله.
تم النشر الأحد، ٩ أغسطس ٢٠٢٦
يا صاحبي، فهمتك كويس جدًا. اللي بيحصل معاك شائع جدًا لما بنحاول نلخص فيديوهات أو كورسات، بنلاقي نفسنا بنكتب كل حاجة زي ما هي، والنتيجة صفحات طويلة ومش منظمة. الهدف مش إنك تنسخ الكلام، لكن إنك تفهم الفكرة وتعيد صياغتها بطريقتك عشان تثبت المعلومة في دماغك وتوفر وقت. جرب الطريقة دي خطوة بخطوة عشان تستفيد من اشتراكك في المنصة ومن الكورسات اللي بتحملها: أول مرة تشوف الفيديو، ما تكتبش حاجة خالص. ركز بس على الاستماع والفهم العام، ولو لقيت نقطة مهمة أو مثال، وقف الفيديو وسجلها بكلمة أو اتنين بس (مش جمل كاملة). بعد ما تخلص الفيديو، خد 5-10 دقايق واكتب ملخص بكلامك أنت. استخدم نقاط قصيرة أو عناوين فرعية، وركز على "الفكرة الرئيسية + مثال عملي + الخطوة اللي أقدر أطبقها". ده هيخلي الملخص أقصر وأوضح. لو الكورس طويل، قسمه لأجزاء صغيرة (مثلاً كل 15-20 دقيقة) واعمل ملخص لكل جزء لوحده، بعدين اربطهم في صفحة واحدة في الآخر. عشان تستفيد من الكورسات الكتير اللي عندك، حدد أولوياتك: ابدأ بالكورسات اللي محتاجها دلوقتي عشان تطبقها فورًا، وبعدين خزن الباقي لوقت لاحق. كده مش هتحس إنك بتضيع الاشتراك. لو جربت الطريقة دي أسبوعين وما زلت محتاج تعديل، ابحث عن أسئلة مشابهة على فدني عشان تشوف تجارب ناس تانية. أنت قادر تطور المهارة دي، وهتلاقي النتيجة أحسن بكتير مع الوقت. لو عايز تفاصيل أكتر عن طريقة معينة، قولي.
تم النشر الأحد، ٩ أغسطس ٢٠٢٦
ثالثاً بخصوص التلخيص فجوجل عمله موقع جميل جدا اسمه نوت بوك ال ام Notebook lm أرفع المحتوى سواء بي دي اف او رابط او فيديو واختاري عاوزة خرائط ذهنية ولا اسئلة ولا ملخص بوربوينت ولا فيديو وهيعمله ويفضل لو تعمليه من على الكمبيوتر او اللاب ولو مش متاح فمتاح برده على التليفون.
تم النشر الاثنين، ١٠ أغسطس ٢٠٢٦
اولا جميل جدا التعلم الذاتي وفي كورس قصير عمله صاحب قناة علي وكتاب هيفيدك إن شاء الله اسمه التعلم الذاتي،ثانيا متشتتش نفسك بأكثر من كورس لأن الحكمة بتقول من خرج لأصطياد أرنبين رجع دون أرانب
تم النشر الاثنين، ١٠ أغسطس ٢٠٢٦
مهو في فيديوهات في منصات الكورسات مينفعش اعمل كده وغير كده انا مش عاوز اعتمد علي التكلنوجيا في كل حاجة الاشياء المهمه بس
تم النشر الثلاثاء، ١١ أغسطس ٢٠٢٦
لعرض السؤال في فدني اضغط هنا