السلام عليكم، إن شاء الله الأعضاء اللي بيدرسوا تمريض هنا يفيدوك بإجابات متخصصة أكتر. فأنا هنصحك عمومًا، ابدأ من دلوقتي ومش لازم تكون البداية ممتازة، لأنك لو فضلت واقف بتفكر تبدأ إزاي ومنين وهتلم المتراكم كله إزاي، طيب واللي اتشرح وفاتك، هتفضل تفكر وتحس بيأس وخلاص. فأنت الأول استعن بالله وجدد نيتك من الدراسة. رتب أفكارك والمواد اللي عندك وحاول تعمل خطة مرنة، تشوف أكتر أوقات بتكون فيها نشط وبتستوعب. مش شرط تفضل ساعات تذاكر، شوف فيديوهات (ذاكر أقل ذاكر بذكاء) هتلاقي فيها طرق مذاكرة إن شاء الله تناسبك حاجة منها وتوفر عليك وقت وجهد. بالنسبة للمواد اللي فاتتك، فشوف لو فيه جروب الدفعة بينزلوا شروحات للمحاضرات أو ملخصات. والانترنت دلوقتي فيه كل حاجة، هتلاقي قنوات كتير على يوتيوب خاصة بالتمريض فابحث عن المادة اللي عاوز شرحها وإن شاء الله تلاقي لها شرح. كمان فيه قنوات على تليجرام وجروبات فيسبوك. ممكن كمان تبحث عن الجزئية اللي مش فاهمها... لو الإنجليزي بتاعك كويس هتلاقي فيديوهات أجنبية تفيدك، ممكن تستخدم شات GPT بس اختار خاصية البحث على الإنترنت عشان يجيب لك مصادر معتمدة وراجع المصادر، اطلب منه يبسط لك المعلومة لو ملقتش شرح على يوتيوب. ** يعني باختصار، انس خالص طريقة الدراسة في المدارس وإن المدرس هو اللي يلقننا المعلومات... الكلية نظام مختلف. اتعلم انت تبحث عن المعلومة بنفسك، وأنصحك تشوف في أي وقت فاضي كورس (تعلم كيف تتعلم) أو تلخيص له... هيفرق معك كتير في التعلم الذاتي. بالتوفيق إن شاء الله.
لعرض الإجابة في فدني اضغط هنا