السلام عليكم، في رأيي إن سبب استمرارك في الإحساس ده لمدة سنة مش حبك للشخص ده قد ما هو إحساسك بالذنب إنك السبب لما دعيتِ. أنتِ برمجتِ عقلك أولا إن الشخص ده نصيبك ومفيش أحسن منه ولا غيره في الدنيا وبعدين برمجتِ عقلك تاني على إنك سبب خسارته وخسارة الحياة اللي تخيلتها معه. أنتِ رافضة تخرجي برا الدائرة اللي سجنتِ نفسك فيها. هو عكسك، كنتِ بالنسبة له احتمال لحياة معينة وشريكة حياة محتملة لكن مش كل العالم اللي حياته هتقف لو خسره، وهو عمل اللي عليه والرفض جه من ناحيتكم فهو بالنسبة له مفيش تقصير ولا شعور بالذنب، عشان كده قدر يتجاوز عادي ويخطب واحدة تانية في مدة قصيرة حتى لو باقي شوية مشاعر وحنين تجاهك فهي مش عائق إنه يكمل حياته في اتجاه آخر. ** اكسري الدائرة اللي ساجنة نفسك فيها وأعيدي برمجة عقلك إن: الشخص ده حبيتِه لأسباب معينة لكن أكيد هو مش كل العالم ولا الحياة هتقف على خسارته، حبك وتعلقك كان بصورة أنتِ راسماها بعقلك، لأن مهما كنتِ شايفة الظاهر منه فأنتِ مش عارفاه فعلا على حقيقته، فممكن تكوني لسه متعلقة بصورة وهمية أنتِ بس اللي شفتِها. الشخص ده فيه آلاف كتير فيهم نفس الصفات اللي حبيتِه عشانها، أنتِ بس اللي محتاجة تفتحي عينيك. حرام تضيعي عمرك على ماضي، مفيش حد مهما كان يستحق توقفي حياتك عشانه. الشخص ده لو كان نصيبك وربنا كاتبه مفيش أي حاجة كانت هتفرقكم حتى لو دعيتِ. أنتِ مش السبب ولا حتى خسرانة لأن في النهاية ده مكنش نصيبك فارضي بالمقسوم. استعيني بالله وافتكري إنك الوحيدة اللي تقدري تساعدي نفسك والتجاوز مش مستحيل حتى لو صعب وهياخد شوية وقت ومجهود، في النهاية نفسك تستحق. بالتوفيق.
لعرض الإجابة في فدني اضغط هنا