هو ازاي نتقرب من ربنا اكتر يعني انا متقربه بس عايزة افهم واتدبر القرآن من غير ملل انا حافظه قران الحمد لله بس عرفت انه الشخص لو عايز يطور حاجه يطور علاقته بربنا الاول قبل كل حاجه
بصي هو عن تجربة ، في كتب و مقاطع فديو بتبقا مملة وبتخلي الواحد يزهق من القصة ويمل منها ، عندك انا مثلا صراحة بسبب تعليم المدارس جاتلي عقدة من السيرة النبوية مبقتش حابة أسمعها خالص وبنفر منها وأحسها معقدة وفيها أحداث كتير بقا وغزوات ومش عارفة اي واي ووو المهم جاتلي فترة كدا لقيت قناة يوسف القط أكيد عرفاه اللي هو عوضين دا😅 المهم كان عامل سلسلة للسيرة النبوية ف كنت فاضية سعتها وزهقانة فقلت ادخل وخلاص ، واحدة ورا واحده مقطع ورا مقطع لقيتني خلصت السلسلة اي دا !🙂 حرفيا انا قلت لنفسي حسبي الله في المدارس 🙂 الميزة في السلسلة بتاعته انه عاملها بطريقة جميلة اووي فيها ذكاء صناعي مشاهد مع السرد بتاعه و في آخر المقطع في شيخ بيقرأ الآيات اللي بتشرح الأحداث ، انا حسيت اني بسمع حاجه جديدة لأول مرة في حياتي والله وعيطت سعتها🥲...الخلاصة من دا كله اختاري فديو تحسي فيه انك منسجمة مع الأحداث ، بصي هقولك علي شوية قنوات تحفة حرفيا وميزة فديوهاتهم انها فيها مشاهد ، عندك قناة أنس أكشن بيسرد قصص الأنبياء واحداث يوم القيامة وحاجات تانية برده وقناة الشيخ نبيل العوضي حرفيا تحفه برده بيستخدم مشاهد ، وقناة يوسف القط برده بينزل قصص الصحابة والأنبياء ، وقناة الغافري بصي بقا القناة دي فيها سلسلة للسيرة النبوية تحفة جدا حرفيا سمعتها بعد يوسف القط لإني مكتشفتهاش إلا بعدها ، المهم في قنوات كتير يعني مش فاكرة كتير منهم ، أما بالنسبة لموضوع الكسل إنك عاوزة تسمعي بس مكسلة أو بتسمعي يوم وتبطلي يوم ف شوفي بصي دا من الشيطان وانا كنت بعمل حاجه حلوة اووي 😅 بروح اسمع محاضرة اكني بذاكر واكيد بزهق بس بقول لأ لازم اسمع ف الشيطان بيخليني اتجه للفديوهات الدينية فبروح اسمعها بقا وانا مستمتعة .😂 معرفش هينفع معاكي ولا اي بس جربي .
تم النشر الأربعاء، ٢٦ أغسطس ٢٠٢٦
يا حبيبتي، إنكِ عايزة تطوري علاقتكِ بربنا ده أجمل خطوة ممكن تبدئي بيها، وده فعلاً أساس كل تطور في حياتنا. بما إنكِ حافظة القرآن الحمد لله، فالخطوة الجاية هي التركيز على التدبر والفهم بدون ملل، وده ممكن يحصل بخطوات عملية بسيطة ومستمرة. ابدئي بقراءة آية أو آيتين يومياً مع التركيز على معناها، مش الكمية. استخدمي تفسير مبسط زي "تفسير السعدي" أو "مختصر تفسير ابن كثير" عشان تفهمي السياق والحكمة ورا الآيات، وخلي معاكِ دفتر صغير تكتبي فيه تأملاتكِ الشخصية، زي "إيه اللي الآية دي بتقوله لي دلوقتي في حياتي؟". كمان، استمعي لتلاوات هادئة مع ترجمة المعاني، وادعي ربنا قبل كل جلسة إنه يفتح عليكِ ويبعد عنكِ الملل، لأن الدعاء ده مفتاح كبير. كمان، اربطي التدبر بالعبادات اليومية زي الصلاة والذكر، عشان القرآن يبقى جزء حي من يومكِ مش مجرد حفظ. لو حسيتِ بالملل، غيري الطريقة شوية، زي إنكِ تقرئي في مكان هادي أو مع صديقة بتشاركو التأملات. استمري كده، وربنا هييسر لكِ الطريق ويزودكِ قرباً منه، ولو عايزة أفكار أكتر ابحثي عن أسئلة مشابهة على فدني. أنتِ قادرة، وأنا معاكِ!
تم النشر الأربعاء، ٢٦ أغسطس ٢٠٢٦
ماشي
تم النشر الأربعاء، ٢٦ أغسطس ٢٠٢٦
لأ هو مش جدول ، انتي بس هتكتبي كل اللي عاوزة تلتزمي عليه ويبقا عادة وهتحطي جنب كل واحده علامة صح لما تخلصيها .
تم النشر الأربعاء، ٢٦ أغسطس ٢٠٢٦
طيب ماشي أمسك واحدة واحدة طيب اعمل جدول
تم النشر الأربعاء، ٢٦ أغسطس ٢٠٢٦
[ أحب الأعمالِ إلي الله أدومها وإن قل ] ..... ( القليل الدائم خيرٌ من الكثير المنقطع ) ...... لما تلاقي الوضع كدا فتمسكي حاجه وحده وتحاولي تثبتي عليها كل يوم ، يعني أذكار الصباح مثلا هنقرر نبدأ بيها ، هتكتبيها في النوتة بتاعتك ونبدأ نحدد أول اسبوع هنواظب علي اذكار الصباح كل يوم ، اذكار المساء لو جالك مزاج كدا تقرئيها اقرئيها لكن احنا حاليا هنركز علي حاجه وحده فقط اما الباقي ف سواء عملناه أو لأ ف لسة دوره مجاش ، كل يوم أول ما تصحي وتصلي الفجر هتكوني بالليل كاتبة علي ايدك بقلم جاف ( أذكار الصباح يا ....اسمك يعني ) فلما تتوضي هتشوفيها فهتفتكريها دا لو كنت ناسياها ، ولما تصلي تبدئي تقرئيها ، المهم في الاسبوع دا تكون أذكار الصباح هية اللي قدام عينك ، ولما تلتزمي بيها ابقي كافئي نفسك بحاجه بتحبيها ، وهكذا الأمر مع باقي العادات .
تم النشر الأربعاء، ٢٦ أغسطس ٢٠٢٦
يعني انا بمشي علي عادات زي الأذكار الصبح وبالليل ممكن اقرا الصبح وبالليل لا وقراءة سور معينه بقراها بعد كل وقت في بقرا وفي لا ازاي بقا اخلي كله اعمله
تم النشر الأربعاء، ٢٦ أغسطس ٢٠٢٦
توضيح ؟
تم النشر الأربعاء، ٢٦ أغسطس ٢٠٢٦
طيب ماشي شكرا جدا ليكي معلش سؤال لو انا ماشيه ببني عادات وكدا بس يوم اعملها ويومين لا بس ازاي ادخل الباقي من العادات دي بحيث تكون دايما
تم النشر الأربعاء، ٢٦ أغسطس ٢٠٢٦
اكتبي اسمها علي اليوتيوب هتظهرلك
تم النشر الأربعاء، ٢٦ أغسطس ٢٠٢٦
طيب ماشي شكرا خالص ليكي طيب ازاي ادخل في القنوات دي اللي انتي بعتاها
تم النشر الأربعاء، ٢٦ أغسطس ٢٠٢٦
ماشي طيب ايه السبب اني عايزة اعمل كدا بس مليش نفس اقرا في الحجات دي كل لما احاول ابطل تاني مش عارفه ليه
تم النشر الأربعاء، ٢٦ أغسطس ٢٠٢٦
ايوا بإذن الله مع الدعاء بالتأكيد ، في شيخ كان بيقول " حقٌ علي الله أن يعين عبده إن كان يثابر لطريقه وحقٌ علي الله أن يعين من يريد الزواج لإنشاء ذرية صالحة للمجتمع " تقريبا الشيخ أمجد سمير ، اسمعي لقصص الأنبياء والصحابة والصحابيات وسيرة الرسول صل الله عليه وسلم ، وأمهات المؤمنين وكمان في قصص مذكورة في القرآن ليست من قصص الأنبياء زي قصة أصحاب الكهف وأصحاب السبت و المرأة التي نقضت غزلها وغيرها من القصص دي.
تم النشر الأربعاء، ٢٦ أغسطس ٢٠٢٦
يعني قصدك لما ابدا ربنا هيساعدني وانا ممكن ابدا بقصص الانبياء
تم النشر الأربعاء، ٢٦ أغسطس ٢٠٢٦
ربنا كان بيقول للنبي صل الله عليه وسلم ﴿وَكُلًّا نَقُصُّ عَلَيْكَ مِنْ أَنْبَاءِ الرُّسُلِ مَا نُثَبِّتُ بِهِ فُؤَادَكَ ۚ وَجَاءَكَ فِي هَٰذِهِ الْحَقُّ وَمَوْعِظَةٌ وَذِكْرَىٰ لِلْمُؤْمِنِينَ﴾ ، من هنا نستنتج إن سماع قصص الأنبياء والصحابة والصحابيات هيثبت قلبنا وهيقوي إيمانا بربنا من خلال المعجزات اللي هنسمع عنها ، وبرده قصصهم في منها اللي مذكور في القرآن ف بالتالي كل م تسمعي قصة وتيجي تقرئيها من القرآن هتلاحظي فرق كدا مش عارفة أوصفه صراحة بس هو احساس جديد يعني ، باقي الخطوات دي ربنا هيرشدك ليها بإذن الله كل م يلاقي جهادك في التعمق في الدين لإن ربنا قال في الحديث القدسي : «من تقرَّب إليَّ شِبرًا تقرَّبتُ إليه ذراعًا، ومن تقرَّب إليَّ ذراعًا تقرَّبتُ إليه باعًا، ومن أتاني يمشي أتيتُه هرولةً».
تم النشر الأربعاء، ٢٦ أغسطس ٢٠٢٦
لعرض السؤال في فدني اضغط هنا