مجهولة .

بصي هقولك نصيحة ، مش أي منتج تلاقي أي بنت مشيراه وتقول حلو للبشرة الدهنية ومش عارفة اي وتروحي تجبيه وتحطي منه وممكن في النهاية متلاقيش منه نتيجة أو يجبلك أعراض تانية ، كل واحده ليها بشرة معينة ومشاكل البشرة بتختلف ، والناس طبعا كل واحد بيشيَّر لمنتجاته بكلام يجذب المشاهدين ويخليهم يشتروا المنتج أومال هو هيكسب ازاي ! ف أنا نصيحة ، انتي حددي كل مشكلة في بشرتك وجبيلها علاجها الخاص ، سواء سيرم أو غيره ، تبحثي عنه وتتأكدي انه أصلي لإن في كتير مزيف .

أعتقد دي المشكلة اللي يعتبر كل العالم عاشها☻️ ، بص انت محتاج تقعد مع نفسك كدا في مكان هادئ وتشوف انت عاوز اي ، مستقبلك ، أحلامك ، حياتك ، يومك ، انا هفضل كدا لحد امتى ! .....محدش هيجي يطبطب عليك ويقولك فوق ، كله ماشي وبيجري ورا أحلامه ، وبيأسِّس حياته ، أما الجانب الديني فدا هيجي من وضع قرار التغير في القلب إن خلاص هبدأ أتغير وأرتب يومي وأظبط أموري ، لكن تكون عارف إنك هتقع في بعض الأوقات فتكون حاطط الحتة دي في بالك عشان ساعتها أول متيجي اللحظة دي تعرف انك في ساحة حرب مع النفس و الدنيا والشيطان ويلا حارب لوحدك🤝 بس لما تكون في وعيك وعارف انك في حرب أحسن بكتير لما تكون غافل ويجي العدو بغتة وانت جاهل بالأمر .

الخطة اللي كنت هنشرها هية نفسها خطة " المعز علي " ، كنت هوضح بس اي هو مضمون الخطة بتاعته وهبعتلكم رابط الجروب تنضموا ، لإن هو موضح كل حاجة حرفيا في ريكورداته . طبعاً هعرفكم عليه الأول ، ومين هو ؟ اسمه ( المعز علي ) ، مدمن متعافي من ٣ سنين ، حاليا بيرشد المدمنين لطرق وحلول عن تجاربه الشخصية وعن تجارب ناس هو كان بيرشدهم ويتابع معاهم طريق تعافيهم ، لحد لما ربنا أعانه وعمل خطة اسمها [ خطة العشر أيام ] للتعافي من الإدمان ، مسجل ١٠ ريكوردات موضح فيها هتعملوا اي في العشر أيام دول وما بعدهم برده ، غير إن في ٤ ريكوردات تانيين تمهيدي قبل متبدؤا العشرة . كلامه عميق وأي حد هيسمعه هيقول أصلا إن أكيد الشخص دا ليه تجربة مع الموضوع دا [ لا يبدع في الكلام إلا من تألم ] وفعلا والله هتستفادوا وبإذن الله هتجيب معاكم نتيجة . الرابط اهه ، أول لما تدخل هتضغط علي الرسالة المثبتة أعلي الجروب وهتوديك للريكوردات . https://t.me/NaltaqiTop

@السائلة تخيلي مثللاً لو أمك أخذت الفون حرمته منك مش هتقدري تمسكيه سعتها ، او مثلا اهلك اكتشفوا الأمر ف هيضربوكِ وهتبقي عايشة في رعب وخوف مش هتقدري تمسكيه اصلا ، او مثلا الحظر يجي من عنده هو بس هو اكيد مش هيعمل ، او مثلا التلفون حصل فيه مشكلة مبقاش يفتح ، كل دي خطوات انتي مش عاوزاها اصلا ولكن الابتلاءات دي اللي بتجيب نتائج رغم انها مشاكل وحشة لكن الخير فيها كتير من نواحي تانية ، حتي لو في لحظة ضعف ومخنوقة عاوزة تكلميه مفيش طريقه توصليله سعتها حتي لو عملتي المستحيل ، دي تجارب من أرض الواقع انا شفتها بعيني ، لكن ربنا اللي ابتلا بيها الناس دي .

مهما يكن ..حتي بعد ما تبطلها ، ما أنا كنت بطلتها بس استمرت معايا لفترة أبني روايات في عقلي وطبعا لاني بحب الكتابة وخصوصا كتابة الروايات فالوضع كان صعب شوية ، لما لقيت إن انا خلاص ، رحت طلعت أفكاري كلها في رواية ونشرتها علي واتباد طبعا انصدمت من التفاعل الرهيب عليها بس حذفتها💁‍♀️ ، عانيت صراحة بسبب التخيلات دي حتي بقيت مبعرفش انام غير لما انشئ رواية في عقلي لحد ما اغوص في الأحداث وانام ، الموضوع دا من سنتين ، مهما أوصف حياتي كانت عشوائية ازاي سعتها فمفيش وصف يعبَّر ، حتي علاقتي بربنا أيامها مكنتش قد كدا ، لحد بقا ما جه يوم ورحت كتبت كل السلبيات اللي حابة أغيرها وكتبت الإيجابيات اللي عاوزاها ، ثم بدأت بقا بأول ايجابية وهي اني ابدأ أنشئ علاقتي مع ربنا من أول وجديد + جنبها قررت اعتزل عن أي حاجه هتمنعني من تحقيق الغاية دي ، كان الموضوع صعب وكنت بقع وأقوم واحيانا بطوِّل في الوقوع ف الوضع مكنش سهل لكن النتيجة في الآخر كانت تستحق ، الحمدلله تجاوزت الوضع بفضل ربنا وكنت بدعي كتير وربنا أعنِّي وخلاني أنشغل بأمور تانية خلتني اصلا ميبقاش عندي وقت أفكر في خيالات حتي لو عاوزة ، ودا اكتشفته بعدين وعرفت ازاي ربنا خرجني من الوضع دا ، فدي كانت طريقتي في تجاوز الأمر دا .

متوقفش المادة اللي بتستخدمها إلا لما تروح لدكتور نفسي ، لإن بعض المواد التوقف عنها فجأة خطر وبيسبب أعراض انسحاب شديدة ، ف انت محتاج تروح لدكتور نفسي الأول وتحكيله عن المادة دي وغيرها وهيعطيك أدوية ويشخصلك الحالة .

بصي أنا لو مكانك ، هبعتله وانهي معاه العلاقة وأقوله كل شيء قسمة ونصيب لو لينا نصيب لبعض ربنا هيجمعنا بإذن الله ، العلاقة دي حرام وانا وانت عارفين انها حرام ومترضيش ربنا فأنا قررت أفتح صفحة جديد وابعد واعمل حظر لرقمك وامسح رقمي من عندك واعرف إن البداية التي لا ترضي الله نهايتها مش هترضيني انا وانت ، واقفلي معاه خالص كدا فضِّي الموضوع ، متستنيش رد منه ابعتي الرسالة واعملي حظر وهقررها تاني متستنيش الرد ، لإن هيقعد يقولك كلام يا إما هتغيري رأيك وهتفضلي تكلميه يا إما هتقفلي معاه بس كلامه هيفضل مأثر فيكي اللي هو انتي خونتيني ومش عارفة اي ووووو...أنا عليا حذَّرتك وانتي بإيدك الخيار ، ثاني خطوة هو منكم يبعتلك من رقم آخر ف انا عوزاكي تغيري الشريحة بتاعتك لو تقدري ، ثالث حاجه موضوع انك مش بتقدري تبعدي وبعد فترة بترجعي فبما إنك حافظة رقمه ف انتي صعبتي الوضع عليكي هنا ...فحطي في عقلك انك داخلة في حرب مع الشيطان ونفسك وصعبة ، هتحذفي أي حاجه خاصة بيه من الفون وهتحاولي بقا متفكريش فيه بعدها لإن كتر التفكير هيصعب الأمر أكتر مهو صعب ، وهتدعي في صلواتك إن ربنا يعينك وينزع التعلق من قلبك إذا كان مش خير ليكي ، هتشغلي نفسك في الفترة دي بقا بدراستك وتسمعي تحفيزات دراسة عشان تدخلي جو الدراسة ، وخلي بالك هتيجي عليكي فترات كدا هتكوني خلاص مش قادرة وعاوزة تفضفضيله وتتكلمي معاه تاني ، هنا بقا ربنا بيختبر صدق توبتك فلما توصلي للمرحلة دي ابقي افتكري كلمتي وإن انتي دلوقتي تحت اختبار حقيقي بقا من ربنا يكتشف فيه صدق التوبة ، وإذا نجحتي الله أعلم لعل وعسي ربنا يسهل عليكي الموضوع بعدها بإذن الله ، أسأل الله ذلك .

بصي هو عن تجربة ، في كتب و مقاطع فديو بتبقا مملة وبتخلي الواحد يزهق من القصة ويمل منها ، عندك انا مثلا صراحة بسبب تعليم المدارس جاتلي عقدة من السيرة النبوية مبقتش حابة أسمعها خالص وبنفر منها وأحسها معقدة وفيها أحداث كتير بقا وغزوات ومش عارفة اي واي ووو المهم جاتلي فترة كدا لقيت قناة يوسف القط أكيد عرفاه اللي هو عوضين دا😅 المهم كان عامل سلسلة للسيرة النبوية ف كنت فاضية سعتها وزهقانة فقلت ادخل وخلاص ، واحدة ورا واحده مقطع ورا مقطع لقيتني خلصت السلسلة اي دا !🙂 حرفيا انا قلت لنفسي حسبي الله في المدارس 🙂 الميزة في السلسلة بتاعته انه عاملها بطريقة جميلة اووي فيها ذكاء صناعي مشاهد مع السرد بتاعه و في آخر المقطع في شيخ بيقرأ الآيات اللي بتشرح الأحداث ، انا حسيت اني بسمع حاجه جديدة لأول مرة في حياتي والله وعيطت سعتها🥲...الخلاصة من دا كله اختاري فديو تحسي فيه انك منسجمة مع الأحداث ، بصي هقولك علي شوية قنوات تحفة حرفيا وميزة فديوهاتهم انها فيها مشاهد ، عندك قناة أنس أكشن بيسرد قصص الأنبياء واحداث يوم القيامة وحاجات تانية برده وقناة الشيخ نبيل العوضي حرفيا تحفه برده بيستخدم مشاهد ، وقناة يوسف القط برده بينزل قصص الصحابة والأنبياء ، وقناة الغافري بصي بقا القناة دي فيها سلسلة للسيرة النبوية تحفة جدا حرفيا سمعتها بعد يوسف القط لإني مكتشفتهاش إلا بعدها ، المهم في قنوات كتير يعني مش فاكرة كتير منهم ، أما بالنسبة لموضوع الكسل إنك عاوزة تسمعي بس مكسلة أو بتسمعي يوم وتبطلي يوم ف شوفي بصي دا من الشيطان وانا كنت بعمل حاجه حلوة اووي 😅 بروح اسمع محاضرة اكني بذاكر واكيد بزهق بس بقول لأ لازم اسمع ف الشيطان بيخليني اتجه للفديوهات الدينية فبروح اسمعها بقا وانا مستمتعة .😂 معرفش هينفع معاكي ولا اي بس جربي .

إنك تطلبي إن روتينك يتغير وفي نفس الوقت متتعبيش دا لو حصل يبقا هنصنفه ثامن حاجة من عجائب الدنيا السبع 🦧 ، مكنش حد غُلُب🙂 ، انتي محتاجه تغيري الحته دي في عقلك الأول إن مفيش حاجه اسمها أتغير بدون متعب #⃣ ، لإنك طول م الفكرة دي في عقلك كل متيجي تحاولي تتغيري وتلاقي الموضوع متعب في البداية فهتستسلمي ، أولا السوشل ميديا محتاجه تعتزليه ودا لمصلحتك وهيعود عليكي بالنفع في جوانب كتير سواء عقلك أو وقتك تمام ، هتحذفي أي موقع سوشل عندك ، مش خطوة سهلة علفكر لإن اليوم التالي هتكوني عاوزة تحملي التطبيقات تاني فمحتاجه تجاهدي النفس وكذالك الكومبيوتر هتبعدي عنه وهكرر تاني مش خطوة سهلة فمستقليش بيها ، بجانب بقا اعتزال السوشل هناخد خطوة تانية ألا وهي ممنوع السهر ، بتحبي الليل ..عندك من الساعة ٢ تقدري تظبطي٠ المنبه وتصحي تقيمي الليل وتقعدي تتأملي ف السماء لو عاوزة بس حذاري تمسكي الفون 🔪 ، اعملي أي هواية كدا بتحبيها دا لو مش هتقدري تفتحي المصحف وتقرئي علي الأقل صفحة ، كفاية كدا للحين أظن الحاجتين دول صعبين اووي فنركز عليهم الأول ف البداية اسبوع اسبوعين جهاد واستعانه بربنا وبإذن الله تلاقي ثمرة الجهاد ، بعدها نشوف المشاكل التانية إن شاء الله ، أو منكم انتي في خلال الإسبوعين دول تلاقي حلهم بنفسك.

بصي ، انا معرفش حجم الوضع اللي عندك بس لو انتي فعلا بتتعرضي للإيذاء والطرد من البيت احيانا ف تقدري تتصلي علي خط نجدة الطفل( 16000 ) دا لو سنك أقل من ١٨ سنة ولو سنك أكبر من ١٨ سنة فتقدري ترني علي المجلس القومي للمرأة (15115) متقلقيش التواصل معاهم بيكون في سرية تامة ، كل معلوماتك بتبقي في سرية ، المتخصصون بيلتزموا بعدم مشاركة بياناتك او حتي يفتحوا بلاغ رسمي الا برغبتك انتي . الوضع معاهم هيكون ماشي ازاي بصي اولا هيتابعوا معاكي الوضع من بعيد لبعيد كدا مجاني طبعا . هيسمعوا مشكلتك وهيوفرولك أخصائيين نفسيين يساعدوكي في التعامل مع الضغوطات النفسية مجاني وبسرية . ثانيا هيتدخلوا لحمايتك لما تبلغيهم بالعنف الأسري والإيذاء الجسدي او التهديد . هيوفروا ليكي مساعدة طبية مجاني لو لزم الأمر ثالثا يعني لو تطور الوضع واصبح شديد وفيه خطورة منكم ينقلوكي من البيت بتاعك لدور رعاية آمن تابع للدولة . ولو انتي اكبر من ١٨ سنة هيوفرولك محامي مجاني يتابع معاكي لو فيه محاكم في الموضوع .

بصي الأفضل أي حاجه في الدين تستشيري الشيوخ لإن منكم حد يعطيكي فتوة خاطئة . ولكن أنا هقولك معلومة للشيخ ابن عثيمين وبرده علي كلام كثير من الفقهاء : قالوا إن أي شك يطرأ بعد إتمام العبادة يُلغي ولا يلتفت إليه، منعاً للوسواس . الأصل بقاء الطهارة ، بما إن إنتي بدأتي المناسك بيقين علي إنك طاهرة فالأصل إن الطهارة مستمرة ، والشك الطارئ بعد العبادة لا يؤثر علي صحتها تمام . تقدري تتأكدي من أي شيخ موثوق عندك في المنطقة ، والله أعلم .

بداية انتي بترمي نفسك عليه بتصرفاتك دي ، ودا بيخليه يستقل بيكي ويقول انك بلا كرامة في عقله ، انتي معذورة لإن الحب بيعمل أكتر من كدا بس عاوزاكِ تفوقي كدا وتبصي على الواقع ، كل بيئة بتختلف ، انتي اي ضمَّنك إنك هتعيشي معاه الحياة اللي بتتمنيها ما يمكن يطلَّع عينك ويبهدلك وياما سمعنا بلاوي ضرب واهانات وووووو مع إن الإثنين بيكونوا بيحبوا بعض ، وفي الآخر بيتطلقوا ، لإن " البداية التي لا ترضي الله نهايتها لن ترضيك "

بتيجي وحده وحده مفيش حاجه بتيجي علطول ، اكتب في ورقة كل التشتتات اللي بتشغلك وابدأ اشتغل مع واحده واحده ، يعني لو مثلا هنمسك أول تشتت وهو الفون ، هنبدأ نحذف أي حاجه بتشتتنا سواء سوشل أو غيره ، ونراقب نفسنا لمدة اسبوع من التحكم النفسي عن عدم تحميل الحاجات دي تاني ، ابدأ خلص وحده بواحده ، في النهاية التوفيق من عند ربنا ف زود من علاقتك بربنا ، لإن مهما كانت امكانياتك ف بدون توفيق ربنا مش هتلاقي نتيجه ترضيك.

وعليكم السلام ورحمة الله وبركاته...بصي يقلبي دا كلة اسمه تشتت عقلي ، العقل مش عارف يركز في اي ولا في اي ، ف بالتالي لا عارفة تركزي في دي ولا في دي ، بصي كل حاجه وليها وقتها.. بمعني كمثال مثلا في الدين ، لو الأذان أذِّن وأنا بقرأ قرآن أنهو أجره أكبر ؟ القرآن أم ترديد الأذان ؟ راح واحد قايل انا هكمل قراءة القرآن لإن كل حرف بحسنة بقا والحسنة بعشر أمثالها وعليه أجر كبير ، و واحد تاني كان قاعد ماسك الفون ف سابه وقعد يردد الأذان ، أنهوا واحد أجره أكبر ؟ اللي بيردد الأذان هو اللي أجره أكبر من اللي عمال يقرأ قرآن ، لي ؟ لإن كل حاجه وليها وقتها ودا وقت ترديد الأذان مش وقت قراءة القرآن ، ناخد الفكرة دي بقا كتطبيق في حياتنا العملية ، كل حاجة وليها وقتها ، قناتك اللي علي التيك دا مش وقتها ، هتقولي دي دينية وغيري بيستفاد منها ، ايوا ي حبيبتي بس دا مش وقتها ، الحاجة دي تبقا وقتها في الأجازة مثلا او في اي وقت غير وقتها ، دراستك هية اللي وقتها الفترة دي وهية اللي أجرها أكبر ومتنسيش إن دا طلب علم فالبتالي أجره أكبر من نشر العلم لإن دا فعلا وقتها ، انتي محتاجه الأول تحطي حد للحاجات المشتته لعقلك ثم تبدئي بتعديل المشاكل الباقية.

الشغف احيانا بنكتشفه بالتجارب . ١ / اقعد قاعدة مع نفسك في مكان هادي قابل للتفكير واسأل نفسك ايه الحاجة اللي بحب أتعلم عنها من تلقاء نفسي؟ ٢ / لاحظ إيه اللي يمر فيه الوقت بسرعة وانت بتعمله . ٣ /جرب حاجات مختلفة بدل ما تستنا الشغف يظهر لوحده . ٤ / ودي حاجة مهمه ، فرَّق بين الحاجة اللي بتحبها والحاجة اللي تحب صورتها أو نتيجتها . بمعني انا مثلا بحب الكتابة مش معني اني بحبها يبقي دي شغفي لأ مش كل حاجة بتيجي كدا طيب أعرف ازاي هل دي شغفي ولا لأ ؟ بحط نفسي أمام تفاصيل الطريق، مش النتيجة النهائية لو شايفة اني هستمر في الكتابة رغم عقبات الطريق ف فعلا انا هنا عندي شغف الكتابة .

اول حاجة لازم إصرار وعزيمة انك تجيب أعلي الدرجات ثم تبدأ تاخد خطوة انك تمسح اي موقع سوشيال عندك سواء تيك أو انستا أو وتس أو فيس أو غيرهم يعني وابدأ بقا كدا اعمل جدول ونظم المواد وشوف اشتراكات المدرسين وانغمس في الدراسة وخليها هي هدفك وحط في بالك كل حاجة وليها وقتها يعني السنة دي وقتها الدراسة والجد فنبعد اي حاجة تانية بقا حتى لو كنت بتشتغل حاجة او بتعمل حاجه اون لاين ، كل حاجة وليها أولاوياتها ، ومتقلقش من موضوع السوشيال ، عقلك لما ينغمس في الدراسة هينسي واحدة واحده ولكن اول اسبوعين محتاج مجاهدة ومثابرة عشان بعد كدا يبقى موضوع الدراسة سهل ، العقل لو مشغلتوش بحاجة هيشغل نفسه بنفسه بالتفكير المفرط وآخر حاجة ابني علاقة قلبية مع ربنا وليس علاقة جسدية فقط ولو متعرفش يعني اي اسأل شات أو أي موقع Ai عشان بس رسالتي متبقاش طويلة ، ومعلومة بسيطة بخصوص الناس والأصحاب الإمام الشافعي رحمه الله قال : «الوحدة خير من جليس السوء.»

حبيبتي انتي اللي واضعة نفسك في كل الضغوطات دي ، الماضي والمشاكل العقل عمره ميتجاوزها وانتي كل شوية بتفكري فيها وتحسسي نفسك بالذنب ، العقل مش بيتجاوز حاجة الا لما يلاقي بديل يشغل نفسه بيه ، يعني العقل طالما فاضي فهيشغل نفسه بالمشاكل دي والتفكير بالماضي وتفكير مفرط بقا ، الحل هو إنك تبدئي تشغلي عقلك دا بحاجات تانية تلهيه عن التفكير في أمور تانية ، ابدئي اشغليه بالدراسة وركزي على بناء مستقبلك وحطي خطط وحطي عزيمة وقرار جديدة ببداية جديدة وتبدئي ترتبي وقتك وتنظميه وتشغليه بالدراسة والحاجات اللي بتحبيها متسببش عقلك فاضي خالص ، كل دا عن تجربة شخصية ، وبالنسبة لموضوع المصاريف دا انتي تقدري تاخدي أون لاين وأوفر كمان من السناتر بكتير سواء توفير في الوقت أو الفلوس ، تقبَّلي فكرة إن والدك واجب عليه أنه يصرف عليكم ولو مصرفش عليكم هيتحاسب أمام ربنا لكن لو عاوزة توفري عليه فخدي أون لاين ، وأهم حاجة عشان حياتك تتغير ابني علاقة قلبية مع ربنا وليس علاقة جسدية فقط ولو متعرفيش يعني اي اسألي شات أو أي موقع Ai عشان بس رسالتي متبقاش طويلة .

بصي ي حبيبتي انتي مش محتاجة تخسي ، انتي محتاجه تتقبِّلي نفسك الأول ، السوشيال ميديا هي السبب في تفكيرك ونظرتك السيئة دي نحو نفسك ، كل ما تشوفي بنات جميلة على النت تقارني نفسك بيهم و نفسيتك تتحطم وتكرهي شكلك ونفسك وتعيطي ووووووو ...كل دا سببه ( السوشيال ميديا ) فانا بنصحك لو فعلا عاوزة تتغيري اقطعي السوشيال ميديا انعزلي عنها خالص ، خلي اول اسبوع دا هو فترة محاولة انعزالك عن المواقع اللي بتسببلك غِيرة وكره لنفسك ، ثم بعدها ابدئي ابني علاقة قلبية مع ربنا وليس علاقة جسدية فقط ولو متعرفيش يعني اي اسألي شات أو أي موقع Ai عشان بس رسالتي متبقاش طويلة ، اشكي لربنا وعيطيله وحاشاه أن يخذلك ، قوليله يارب مش عاوزة أزدري نِعَمك عليَّ يا رب فاهدي قلبي وأنعِم عليه بالقبول والرضا ، ادعي كتير ، والله ربنا قادر انه يغير شكلك ويخليكي تعيدي النظر لشكلك تاني وهتحسي انك فعلا جميلة انا ازاي كنت بفكر كدا ! ، ثم بقا ابدئي اهتمي بنفسك و في طرق كتير للتخسيس وربنا هيرزقك التوفيق بدا لإن علفكرة انتي ممكن تعملي كل طرق الأسباب المحتلة لإنك تخسي بس برده متخسيش لإن ربنا مش موفقك لإنك تخسي فكل حاجة بتوفيق من ربنا فاسعي لرضا ربنا الأول.

بهنيك أولا علي خطواتك دي بجد مش كتير بيعملها يعني اللي بيتجهوا لطريق المخدرات دول بيكون صعب عليهم يبطلوه بس بجد بهنيك والله ، بص في قاعدة بتقول " اللي فات مات " الماضي وذكريات الماضي لا هتجيب ولا هتودي ، هتقولي صعب اتخطاها هقولك ايوا صعب مقلناش سهل بس بما انك قدرت تتجاوز المخدرات ف بإذن الله روحك المعنوية هتساعدك في تجاوز الماضي ، بداية تجاوز الماضي بتيجي ازاي بقا ؟ بص أولا هي عدم التفكير في الماضي ونركز علي الوضع الحالي والمستقبل ، خد عهد علي نفسك بإنك هتبدأ مسيرة حياة جديدة طاهرة في طاعة الله وعمر اللي كان قريب من ربنا ربنا بيتخلي عنه " والذين جاهدوا فينا لنهدينهم سبلنا " ، كل ما تلاقي عقلك هيفكر في الماضي جاهد وامنعه وقوم اشغله سواء بالتخطيط لبناء حياتك وشغلك ، لإن العقل دا لو انت مشغلتهوش في حاجة هو هيشغل نفسه بالتفكير المفرط فاحنا نمنع الحتة دي بإننا نشغله احنا منستناش لما هو يشغل نفسه بنفسه ، ثاني حاجة مهما امك وابوك يعملوا هيفضلوا أمك وأبوك اللي ربنا وصَّاك بطاعتهم ، بيعاملوك وحش عاملهم بما يرضي الله حلو " ولا تقل لهما أفٍ ولا تنهرهما وقل لهما قولا كريما " اصبر على أذاهم لوجه الله ، انت مش هتستحملهم العمر كله هما فترة وهيسيبوك وانت فترة وهتتجوز وتعيش مع عيالك ومراتك وكلنا في الآخر هنموت ، في الآخر أهم حاجة بنصحك بيها ألا وهي الصحبة اللي انت بتمشي معاها ، اختار الناس اللي تاخدك لطريق ربنا وابعد عن اللي بيرجعوك للمخدرات والمعاصي ، و ابني علاقة قلبية مع ربنا وليس علاقة جسدية فقط .

بصي يا قمر " الحرام هيفضل حرام حتى لو كل العالم بيعملوه " قاعدة خليها متبروزة في عقلك لحد م يتوفاكِ الله تمام 👌، ربنا قال يا حبيبتي " ولا متخذات أخدان " يعني اي ؟ متخذات: أي اللاتي يتخذن. أخدان: جمع خِدْن، وهو الصديق أو العشيق الذي تكون معه علاقة سرية غير مشروعة. فالمعنى هو: النساء اللاتي لا يتخذن عشاقًا أو أصدقاء في السر يقمن معهم بعلاقات محرمة. والآية جات لتشترط في المرأة العفة، فربنا قال : ﴿مُحْصَنَاتٍ غَيْرَ مُسَافِحَاتٍ وَلَا مُتَّخِذَاتِ أَخْدَانٍ﴾ أي: عفيفات، لا يمارسن الزنا علنًا (غير مسافحات) ولا يتخذن علاقات سرية محرمة مع الرجال (ولا متخذات أخدان). فالآية تنهي عن كل صور العلاقات غير المشروعة، سواء كانت علنية أو خفية.

عن تجربة شخصية بص أولا إنك محتاج أنثي في حياتك دي مشاعر وتفكير طبيعي جدا ( أبونا آدم عليه السلام رغم إنه كان في الجنة بس كان حاسس بفراغ داخلي ولما ربنا رزقه حواء حس بالإكتمال لإن الإثنين بيكملوا بعض ) فدي مشاعر وأحاسيس طبيعية في البني آدم لا تلوم نفسك عليها ، لكن مش بقول كدا عشان تروح تكلم بنات ! لأ كل حاجه وليها طريقها الصح وطالما انت مش جاهز حاليا ف نحاول بقدر الإمكان منفكرش في الأمر دا حاليا عشان منساعدش الشيطان يوصلنا للغلط ، ثانيا : حاجه حلوة جدا إن تفكيرك يبقا عقلاني ومش زي شباب الأيام دول لإنهم بيجيبوا المغص صراحة ، المجتمع بتاعنا دا هو اللي بايظ بيكونوا عاوزين الواحد يقول كلام على مزاجهم كتطبيل كدا ولو مقولتش كدا يبقا انت وحش ومش محترم ووووووو فكك من كلامهم لإن كلامهم لا هيجيب ولا هيودي نفسيتك اللي هتتأثر فقط ، وحاجة مهمة بقا ( بص أنت كل ما انت حابس نفسك في القوقعة اللي انت فيها دي حاليا انت مش هتتغير وهتفضل متأثر بكلامهم وحاططهم في قيمة أعلي منهم أساسا ، عاوز الحل والخلاصة اعمل اللي هقولك عليه دا = أول حاجه ابني مع ربنا علاقة قلبية وليس علاقة جسدية فقط ولو متعرفش الفرق بينهم أسأل شات أو أي ذكاء اصطباحي وهيوضحلك بإذن الله عشان بس رسالتي متبقاش طويلة اووي ، المهم ثاني حاجه ابدأ اشتغل على نفسك وشوف مستقبلك ومتقولش لما أخلص من كلامهم واتجاوز الوضع دا لإن دا اسمه تسويف ، ابدأ علطول لإن عقلك لو مشْغِلتهوش في حاجه هيفضل يفكر ويشغل نفسه مهو مش لاقيك مشغله في حاجه فطبيعي هيبص على اي حاجه يشغل نفسه بيها فأنت لما تِشْغل نفسك بمستقبلك وتبدأ تسعى انت كدا بتجبر عقلك يوقف تفكير وصدقني والله جرب بس وهتشوف النتيجة وهتدعيلي ، هتلاقي نفسك واحدة واحده رغم أن كلامهم هو هو نفس الكلام اللي كان بيخليك تتأثر لكن هتلاقي نفسك ولا همَّك وهتضحك علي نفسك إنك ازاي كنت متأثر بالحاجة العبيطة دي ، الطريق هيكون صعب عليك شوية بس اعرف ان ربنا قال " والذين جاهدا فينا لنهدينهم سُبلنا " لما ربنا يشوف جهادك هيعينك بعدها علطول ولكن اهم حاجه تجاهد سواء في علاقتك مع ربنا أو في طريق بناء مستقبلك ، حط الآية دي دايما في بالك واستعن بيها وكل شوية قول لربنا يارب إنت قلت كذا يارب فأعني ، آخر حاجه حابة اقولها متسمعش حاجة حزينة ومتسمعش أغاني لإنها حرام وربنا ممكن يكون مبتليك الإبتلاء دا عشان توصل لفكرة إنك تسيب الأغاني ، استبدلها بقرآن وصدقني فيه راحة نفسية رهيبة بس اسمعه بقلبك وتدبر آياته ، يسر الله لنا ولك بالتوفيق بإذن الله .