محطم من بداية ثالثة ثانوي ولا شغف لديّ وأشعر بالخوف من كل شيء، ماذا أفعل؟

Question

انا لسة في بداية تالتة ثانوي وحياتي عبارة عن دمار من كل ناحية مش بذاكر خالص بضيع وقتي في حاجات تافهة وحاسس اني مش عندي شغف بتاع كل سنة بمعنى مش شايف لنفسي مستقبل خايف من كل حاجه خايف أجرب حاجات جديدة واللي بيصعبها عليا أكتر كل أهلي وصحابي مستنيين مني اني أجيب حاجة كبيرة. وبس كده ممكن لو حليت المشاكل دي نص حياتي هتتعدل، أتمنى الرد يكون شافي

Accepted Answer

لو مشيت ورا مزاجك مش هتحقق حاجه في حياتك علشان كده ربنا ميز الإنسان بالعقل فاهمه ان محدش او قله قليلة هتكون هوايته المذاكره او يستمتع بيها انا الشخصيه دي بردو بس في الاجازه بكشف انني معنديش حياه غيرها بحس عمري بيضيع في الفاضي وانا في تالته المستر قال جملة فضلت معلقه معايا ان الندم بيلعب اكتر بكتير من النتيجه الأنسان كان بيذاكر بدموعه في أغلب الأحيان بس كل ده علشان اما تجيب نتيجتك لو لا قدر الله قليلة فأنت عملت اللي عليك معندكش حاجه تزعل عليها محدش من أهلك يقولك انا قصرت معاك في ايه او عالأقل انت من جوه نفسك تكون عارف انك مقصرتش واستفيد بيها كعلم هتفتحلك مجالات كتيره بعدين ان شاء الله

Answer

السلام عليكم ورحمه الله وبركاته يعني نظره الخوف الدائمه دي مش هتوصلنا لاي حاجه ليه بقى احنا دلوقتي محتاجين نفكر انا خايف من ايه انا خايف من ليه مثلا مجبش المجموع اللي انا عايز طب هو ايه مجموع اللي انا عايزه انا عايزين مجموع الفلاني حلو انا هسال نفسي اذا انا ما جبتش المجموعه ده ايه الحاجات اللي انا مش هقدر اواجهها مش هقدر اواجه مثلا الانتقادات انا مش هقدر اواجه بعد كده المستقبل ده مش عارف هعمل فيه ايه تمام جدا يبقى انا دلوقتي هحط اسوا سيناريو ده قدامي واحاول الاقي لنفسي طريقه تعمل بها مع السيناريو ده اذا حصل ده اولا. ليه بقى لما بكون جوه ذهنيه عندي استعداد لمجابه الموقف الصعب ده بيخليني اهدى ده بيخلي الخوف ما يجيش ويبقى هو اللي مسيطر عليا فالنقطه دي مهمه جدا جدا جدا عشان تحل الازمه اللي عندك مساله بقى انه انا خايف اجرب. وتامنين ابدا وخلاص ابدا وخلاص وابدا بكل حاجه واحده واحده انا مش فجاه هبقى جامد جدا لا عادي جدا ناخد الامور واحده واحده انت يعني لو تعرف تسوق العربيات هتعرف انه العربيه ما ينفعش نجيبها على اعلى سرعه مره واحده لازم ندرج السرعات ما فيش عربي على ربع مره واحده لا لازم نجيب الاول وبعدين الثاني وبعدين الثالث وبعدين الرابع هنبقى نجيبه بقى لان لو انا طلعت على الرابع مره واحده انا هحرق موتور العربي فاحنا مش محتاجين ان احنا اا يعني نحرق الموتور بتاعنا من بدايه السنه خلينا ناخدها واحده واحده ونبدا حاجه حاجه فانا الاول خالص انا شايف ان انا بضيع وقت مثلا في الحاجه التافهه الفلانيه دي اللي هو ان انا بقوم الصبح بمسك الموبايل وانا على السرير وبضيع لي ساعه ولا ساعتين يبقى دي اول حاجه هبدا بيها وهاوقف الموضوع ده اسيب بقيه الحاجات اللي في اليوم انا اهتم بالحاجه دي الاول اتخلص منها تماما اوقفها تماما وبعدين انقل على حاجه تافهه تانيه بعديها من اللي بتضيع وقتي واحده واحده. كل ما ناخد الامور واحده واحده كل ما نبدا نشوف نتائج لكن بلاش النظره المثاليه اللي هي بتاعه انا ثالثه ثانوي يبقى انا لازم اقوم بقى اكل النجيله اللي في الارض يعني مش لازم الصوره النمطيه دي خالص وخلينا في نفسنا وخلينا نمشي حسب قدراتنا احنا الشخصيه وناخدها واحده واحده نبص على هدفنا والخوف بتاعنا نتعامل معاه صح عشان يبقى دافع لينا بيزقنا لقدام بدل ما يبقى بيكلبشنا ويوقف.

Answer

دي حيل نفسيه بيهرب بيها العقل الباطن من مسؤلية المذاكرة كان عندي صديقه الله يرحمها كانت حاطه ستيكرات قدام مكتبها فيها جمل تحفيزيه كتيرة من ضمنها (إذا أعجبتك حلاوة النوم فتذكري مرارة الفشل وتذكري أن لديك حلم وعليك تحقيقه) خذ بمبدأ قليل دائم يعني تذاكر 10 دقائق كل يوم افضل من انك متفتحش كتاب اصلا وفيه طرق تسهل المذاكرة مثلا تحط عناوين رئيسيه للدرس وتحت منه عناوين فرعيه اكتبهم في كشكول او استخدم ماركر حتى لو مذاكرتش الدرس كله هتكون عندك فكرة عامه عنه مش تتفاجأ بيه في الامتحانات عامه هي الثانويه العامه مش نهايه الحياة لكن تخيل حياتك فيما بعد هتكون راضي وشايف انك عملت اللي عليك حتى لو مجبتش المجموع اللي منتظره ولا قاعد تلوم في نفسك عشان كنت تقدر تذاكر وسيبت نفسك لمرقعة العقل الباطن

محطم من بداية ثالثة ثانوي ولا شغف لديّ وأشعر بالخوف من كل شيء، ماذا أفعل؟

نفسية

خوف

شغف

تعليمية

سؤال من احد أعضاء فدني

تم النشر الثلاثاء، ١٩ أغسطس ٢٠٢٥

4 إجابة

4 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك