هو ممكن يكون سؤال غريب بس فعلا هو احنا هنلاقي ناس زينا فين أو ازاي يعني مثلا انا حد عارفه اهتماماتي بس الفكره بقي هنلاقي فين الشخص اللي زيي
كل الأشخاص اللي قدامي أو اللي بيتقدموا أو اللي بيقول كلهم بيبقوا مش زي مش دا اللي مستنياه وعامة الموضوع دا مش بتهاون فيه انا بحب الكتب جدا و الثقافات واللغات و اللوح والفن و الموسيقي و حاجات كتير تانيه
كل اللي بيجي قدامي بيبقي ذوقه مختلف ملهوش في الفن ملهوش في القراءه ومفيش حد مثلا يقدر دا ويساعدني اهتم باللي بحبه لا بلاقي سخريه فاااااا بجد هنلاقي امتى الناس اللي زينا أو هنلاقيها فين ومش شرط يبقى حب انا بدور ع صحاب زي محتاجه اتحاوط بناس زي اهتمامتي
السلام عليكم، بصي فيه طريقين، واحد في الواقع وواحد في العالم الافتراضي. في الواقع ممكن تشوفي الأماكن اللي بتجمع الأشخاص اللي شبهك، فيه ورش ومعارض فنون ومعارض كتاب وفيه أماكن ندوات ومكتبات عامة. كل دي أماكن ممكن تشتركي فيها وهتلاقي نفس الأشخاص اللي بيشاركوكِ الاهتمامات دي. ** ابحثي على الانترنت عن الأماكن القريبة منك وممكن برضه لو المكان بعيد شوية تخصصي يوم في الأسبوع أو الشهر حسب إمكانياتك تسافري له. وتابعي جروبات محبي الهوايات دي عشان مواعيد الإيفنتات وهكذا. ** أما لو مش بتحبي الخروج والاختلاط (وإن كان الانضمام للتجمعات دي تجربة مختلفة أكيد) فأنتِ ممكن تبحثي على الفيسبوك عن النشاط أو الهواية اللي بتحبيها وتنضمي لمجموعاتها، تابعي وتفاعلي وشاركي في النقاشات ومع الوقت هتعملي دائرة معارف. بس أنصحك برضه تقصري تعارفك على الجروبات دي على البنات، لأن فيه كتير شباب بيستغلوا نقطة النشاطات دي في التعارف بلا هدف إلا التسلية مع البنت. وربنا يوفقك.
تم النشر السبت، ١٥ أغسطس ٢٠٢٦
انا حرفيا شبهك بالظبط وسألت السؤال ده لنفسي وبالفعل لقيت جوابه والجواب انه ايوه هنلاقي ناس شبهنا، ممكن مش في محيطنا لكن هنلاقيهم بسسسس مش شرط هنحبهم لأن أنا قابلت ناس شبهي حرفيا اكنهم مراية ليا بكل مميزاتي وعيوبي واكتشفت ان انا واحد عيوبو محدش يستحملها، المهم يعني انه هنلاقي ناس شبهنا وممكن هنحبهم بس في الغالب مش هيبقو نفس الأشخاص الي في توقعتنا+ بعشق لوحات فان جوخ وموسيقى الجاز والشاي وبصراحة مبحبش اقرأ الكتب بس بحب بسمعها، بمل بسرعة
تم النشر الأحد، ١٦ أغسطس ٢٠٢٦
بصي، أنا شايف إن السؤال ده مش غريب خالص، بالعكس يمكن من أكتر الأسئلة اللي ناس كتير بتفكر فيها ومش بتعرف تقولها. فكرة إننا نلاقي شخص شبهنا مش معناها إننا لازم نلاقي حد مطابق لينا في كل حاجة؛ نفس الكتب، نفس الموسيقى، نفس الأفلام، نفس الاهتمامات، ونفس طريقة التفكير. ده تقريبًا مستحيل. وحتى لو لقينا حد مطابق، الاختلافات هي اللي في الآخر بتخلّي العلاقة فيها حياة. الأهم من إن الشخص يحب نفس الحاجات اللي بتحبيها، إنه يكون عنده فضول يفهم الحاجات اللي بتحبيها. يعني ممكن أنا مثلًا معرفش حاجة عن الفن أو الكتب، لكن لما ألاقي شخص بيحبهم، أسأله: إيه اللي عجبك في الكتاب ده؟ ليه اللوحة دي أثرت فيك؟ إيه الأغنية اللي بتحبي تسمعيها لما تكوني مبسوطة؟ مش لازم أكون خبير، يكفيني إني مهتم أعرف العالم اللي جواكي. وأعتقد إن أكتر حاجة بتخلينا نحس إن "مفيش ناس زينا" هي إننا بندور في الأماكن الغلط أو بالطريقة الغلط. أغلب التعارف دلوقتي بيبدأ من شكل، سن، شغل، منطقة، كام سؤال محفوظين، وبعدها كل واحد بيحاول يبان بأفضل صورة. قليل جدًا لما تلاقي مساحة الناس فيها بتتكلم فعلًا عن أفكارها واهتماماتها وحاجات بتحركها من جواها. لو إنتِ بتحبي القراءة مثلًا، مش شرط تدوري على "شخص بيقرأ"، دوري على شخص عنده عقل فضولي. لأن الشخص اللي بيقرأ النهارده ممكن يكون اهتمامه مختلف بكرة، لكن الفضول نفسه هو اللي بيخليه قادر يشاركك حاجات جديدة طول الوقت. وكمان مش لازم الشخص اللي قدامك يبقى نسخة منك. بالعكس، ممكن يكون عنده اهتمامات مختلفة تمامًا، لكنه يعرف يحترم اختلافك ويستمتع بسماعك وإنتِ بتتكلمي عنها. ممكن إنتِ تحبي الفن وهو يحب الرياضة، إنتِ تحبي الكتب وهو يحب السفر، لكن تلاقوا بينكم حاجة أهم: طريقة التفكير، الاحترام، الحنية، الأمان، والرغبة في معرفة بعض بجد. وبالنسبة لسؤالك "هنلاقي الناس دي فين؟" فمفيش مكان سحري للأسف 😂، لكن غالبًا هتلاقيهم في الأماكن اللي الناس بتروحها عشان تعمل الحاجة اللي بتحبها، مش بس عشان تتعرف على حد. نوادي القراءة، معارض الكتب، ورش الفن والكتابة، الكورسات، الفعاليات الثقافية، الجروبات المتخصصة في اهتمامات معينة، وحتى مجتمعات الإنترنت اللي بتجمع ناس على أساس اهتمام مش مجرد تعارف. لكن في نقطة أهم من كل ده: ما تستعجليش. أحيانًا إحنا لما نكون محتاجين حد يفهمنا، بنبدأ ندي أي شخص اهتمام لمجرد إنه سأل سؤالين حلوين أو عرف يتكلم عن حاجة بنحبها. وبعد فترة نكتشف إننا كنا متعلقين بفكرة "أخيرًا لقيت حد شبهي"، مش بالشخص نفسه. الشخص المناسب مش بالضرورة هيظهر من أول مرة، وممكن أصلًا يظهر في وقت إنتِ مش مستعدة تتوقعيه. المهم إنك ما تغيريش نفسك ولا تقللي من اهتماماتك عشان تبقي مقبولة عند حد. وفي رأيي، أجمل علاقة ممكن تحصل هي إنك تلاقي شخص مش لازم يكون شبهك، لكنه يخليكي حاسة إن اختلافك مش عبء عليه. شخص لما تحكي له عن حاجة بتحبيها، ما يقولكيش "إيه الهبل ده؟"، ولا يحاول يقلل منها، وإنما يقولك: "أنا مش فاهمها أوي، بس احكيلي إيه اللي بيخليكي تحبيها بالشكل ده؟" هنا بقى بتحسي إنك لقيتي حد فعلًا. لأن في النهاية، إحنا مش بندور على شخص عنده نفس قائمة اهتماماتنا؛ إحنا بندور على شخص مهتم بالشخص اللي إحنا عليه، ومستعد يدخل عالمنا من غير ما يطلب مننا نسيبه عشان نعيش في عالمه.
تم النشر السبت، ١٥ أغسطس ٢٠٢٦
أنا فاهمة شعورك تمامًا يا غالية، ولما الإنسان بيحب حاجات زي الكتب والفن والثقافات والموسيقى، وبيحس إن اللي حواليه مش بيشاركوه الاهتمام ده، بيحس بالوحدة فعلاً. ده مش غريب ولا مبالغ فيه، ده طبيعي جدًا لما تكوني بتدوري على ناس "شبهك" مش بس صحاب عابرين. الطريقة الأفضل إنك تبدئي تبحثي عن الأماكن اللي بتجمع الناس اللي بيحبوا نفس الحاجات دي. جربي تحضري فعاليات ثقافية أو ورش رسم أو جلسات قراءة جماعية في المكتبات أو المراكز الثقافية، أو حتى مجموعات تبادل لغات لو بتحبي اللغات. كمان فيه مجموعات على السوشيال ميديا مخصصة للقراءة أو الفن، تقدري تنضمي ليها وتشتركي في النقاشات، وده بيسهل إنك تلاقي ناس بتتكلم نفس اللغة. المهم إنك تكوني واضحة مع نفسك ومع اللي بتقابليهم، ومتستعجليش على النتيجة. الناس اللي زيك موجودين، بس أحيانًا بيحتاجوا شوية وقت ومكان مناسب عشان يظهروا. استمري في اللي بتحبيه، وهتلاقي اللي يقدره. ❤️
تم النشر الجمعة، ١٤ أغسطس ٢٠٢٦
نفس اجابة اسلام، و برضو ممكن يكون الاونلاين باب، ادخلي جروبات قراءة و نزلي ريفيوز فيها و اتعرفي ع ناس شبهك هناك و هكذا، اي عالم و ليه ناسه و هتلاقي ناسه عاملين جروبات يجمعوا بعض فيها، شوف رزقك الدنيا واسعه ياعم
تم النشر السبت، ١٥ أغسطس ٢٠٢٦
بنلاقيهم ف نفس الاماكن اللى بنحبها واللى فيها اهتمامتنا .. معرض كتب .. ندوات ثقافية .. مسجد .. جروبز فيها نفس الاهتمامات ..
تم النشر الجمعة، ١٤ أغسطس ٢٠٢٦
لعرض السؤال في فدني اضغط هنا