انا طالب في كلية هندسة و عندي كذا مشكلة مش عارف احلها ازاي حاسس اني قليل الحيلة بمعني
. اني مش بشتغل و لا عارف اعمل ايه حاجه ولا بخرج من البيت و قاعد فيه علطول و لا عندي اي مهارات و نظرة الناس ليا سواء الأقارب أو الجيران بقت نظرة احتقار حتي اقرب الناس ليا .
دا حتي اخويا الصغير بيحتقرني عشان مش عارف ادافع عن نفسي لو حد جاي يضربني و لما بشوف ابويا و امي شغالين و هم اصلا مش راضيين بالشغل ده و مش طايقنه بس لازم يشتغلوا عشان نعرف تصرف و نعيش و انا قاعد زي ما انا مليش لأزمة في الدنيا حرفيا و لما انوي اروح الجيم الاقي مشكلة تطلعلي أو انا عندي في هندسه تدريبات و عاوز اشتغل و اصرف على نفسي و اساعد ابويا و امي بس مش عااارف اسيب التدريب و اروح اشتغل ولا اكمل تدريب
انا تعبت و زهقت من نفسي و من عيشتي و انا بشوف الناس عماله بتحقق نجاحات و انا قاعد متحسر علي نفسي مفيش اي انجاز ..
و اقولك كمان انا معنديش أصحاب في البلد اللي قاعد فيها و زهقت منها و عاملين مشاكل مع كل الجيران ..
ابويا نفسه بيقولي الواحد لما يبعد عن البيت و يروح المدن بيرتاح نفسيا و من كل حاجه حرفيا ..و انا عاوز انقل انا و اهلي لمكان تاني بس مربوطين ببيت العيلة ..
آسف على الإطالة و يا رب اللي يكمل قراءة للاخر ربنا يرزقه بعمرة و شكرا لكم ♥️
السلام عليكم ورحمه الله وبركاته مشكله مش عارف تحلها لوحدك إن شاء الله نساعدك انك تحلها باذن الله خلينا نقول لما الانسان يبقى واعي كده لوضعه عارف نقاط القوه بتاعته عارف نقاط الضعف بتاعته فدي حاجه كويسه جدا ودي بدايه مناسبه انه انا اروح ناحيه التغيير لانه لو انا مش قادر اقيم انا في نقاط ضعف ايه مش هقدر اغيرها فحلو جدا ان انت عرفت الضعف بتاعتك تعال كده نبص واحده واحده بس انا هبدا من الاخر خالص من مساله وجودك في بيئه او في مكان السكن اللي هو ليه تأثيرات سلبيه بنتعامل ازاي مع الوضع ده اول حاجه نعملها ان احنا نتعامل مع الوضع ده ان هو وضع مؤقت. ليه لانه زي ما انت قلت احنا كلنا كعيله بالنسبه لنا الافضل ان احنا ننتقل لمكان ثاني فاحنا هنعتبر انه دلوقتي وجودنا هنا في المكان ده هو وضع مؤقت وضع مؤقت لحد ما يحصل ايه لحد ما ارتبطنا بالعيله يكون مش هو اللي ليه الاولويه دلوقتي في حياتنا وضع مؤقت لحد ما انتوا كولاد تبداوا يبقى لكم اتجاهات في حياتكوا تقرروا قرارات خاصه بحياتكم تكونوا في الاماكن اللي هي متعلقه بقراراتكم الشخصيه مؤقت لحد ما تقدر انك تكون صوره قويه انت عاوز تكون فين بالظبط عشان متنقلش لاي مكان وخلاص مؤقت لحد ما تاخذ احتياجاتك اللي انت بتاخذها من المكان ده وبعدين تبدا تحرك احتياجاتك دي لمكان ثاني انت فعلا تلاقي فيه احتياجاتك بشكل مظبوط. تاني حاجه مهمه جدا ان انا اتعامل مع الوضع المؤقت ده انه تحدي زي الجيم كده اللي بنلعبها على الموبايل او على أي جهاز انا ببقى عامل تحدي مع نفسي ان انا عايز اكسب ان انا عايز اوصل للنهايه ان انا عايز اخلص الليفل الصعب ده واروح لليفل اللي بعديه لما بشوف نفسي ان انا بتحدى الوضع ده انا بيبدأ يطلع قوه من جوايا هي جايه من تبني فكره التحدي انا رغم الظروف انا هوصل للنتيجه الكويسه اللي انا عايزها انا رغم الظروف اللي هي سلبيه انا هقدر اخليها ما توقعنيش وانا افضل واقف على رجلي التحدي ده حتى لو لقيت نفسك في اوقات في النص بتضعف وبتيأس لا هتقدر انك باحساس التحدي ده ترجع تاني على نفس الخط وتقدر تكمل اللي انت عايز توصل وده مهم جدا جدا ان انا اكون حاطط لنفسي هدفي خلينا نقول اول خطوه انت محتاج تعملها انك تحط لنفسك هدف تقول انا عاوز اوصل في الحته الفلانيه في خلال قد ايه عاوز يبقى شكل حياتي ازاي عاوز يبقى منصبي فين وهكذا حدد لنفسك هدف معين عشان تبقى بتتحرك ناحيته طب ولما اتحرك ناحيته هيحصل ايه؟ لما نتحرك ناحيه الهدف بتاعنا هنبقى قادرين نشوف بقى هو ايه المهارات اللي انا محتاجها لان دلوقتي لو على المهارات الاجتماعيه ففي مهارات اجتماعيه كتير جدا طب انا في طريقي ده محتاج ايه مثلا انت قلت انا بنوي اروح الجيم بس ان انا اروح الجيم ده متعارض مع المواعيد بتاعتي او مساله التدريبات بتاعه الكليه طيب هو انت هتروح الجيم عشان ايه هو ده هيدعم انهي حته في الهدف بتاعك ولا هو هروحه عشان يمكن هو ده اللي هيظبط الدنيا معايا لا احنا مش عايزين الشكل ده اللي هو يمكن ده هيظبط الحاجات اللي بايظه عندي لا انا عايزه اكون متاكد انه انا اللي حاطط اشتراك الجيم ده لان انا عارف ان هو اللي هيكون من الخطوات اللي هتوديني من ناحيه الهدف بتاعي لكن لو انا الهدف بتاعي مش هياثر فيه الجيم يبقى انا مش هروحه لانه كده هيبقى بيعطلني بدل ما يكون بيساعدني الموضوع ده مهم جدا جدا عشان نختار انهي مهارات احنا محتاجين نشتغل عليها. منها بقى الحاجات اللي انت بتقول انا ما بخرجش من البيت وقاعد فيه على طول طيب احنا ليه مش بنخرج من البيت زي ما انت قلت انا دلوقتي في الوضع المؤقت بتاعي موجود في بيئه انا مش بستحسنها يعني فأنا مش قادر ان انا اتعامل معاه بشكل كبير لكن هل هنقول ان انا هدي لنفسي ده طب ما هو انا محتاج مهارات اجتماعيه طب ازاي هاخد المهارات الاجتماعيه بتاعتي من غير ما اتحرك من البيت يبقى اتحرك وهخرج من البيت ولكن هيبقى ليا وجهه رغم البيئه دي اكيد في أماكن فيها ناس كويسين ممكن يكون في واحد من البقالين او السوبر ماركت فيه راجل طيب وجميل وطريقته جميله في الكلام فخلاص انا لما هخرج من البيت أنا هخرج عشان اروح اتكلم كلمتين حلوين مع الراجل الطيب ده ممكن يكون فيه مسجد في ناس بيترددوا عليه شباب قريبين من سني والشباب دولت كويسين وأقدر ان انا اتواصل معاهم من غير ما يكون في شد وجذب وحاجات تكون مؤذيه لا قدر الله فانا هاخذ بعضي وهكون بتردد على المسجد ده انا هختار جوه البيئه دي فين الاماكن اللي انا هروح أدرب نفسي على مهاراتي الاجتماعيه هناك ده دي مساله مهمه جدا جدا انه انا اختار من البيئه اللي انا فيها دي الاماكن أو النقاط البسيطه اللي هتبدا تساعدني واهم شيء انه الموضوع يكون مربوط بجد بجد بهدف انا عايز اروح له عشان كل حاجه اعملها ابقى شايفها ان هي هتفيدني في الهدف ده ما تبقاش بشكل عشوائي وخلاص.
تم النشر الثلاثاء، ١٩ أغسطس ٢٠٢٥
لعرض السؤال في فدني اضغط هنا