انا عارفه ان مشكلتي ملهاش حل بس حابه افضفض شويه
عمري ١٧ سنة و نص و بجاهد نفسي بقالي ٣ سنين ان اتوب من كل حاجه و ابطلها
عرفت ابطل و عندي قابليه ان ابطل بس أهلي مش مشجعين ليا
لما قررت البس واسع كانت أصعب خطوة اخدتها من ٣ سنين لإن بسببها حصل خلاف كبير مع والدي اكتئبت بسببه فترة طويلة
من ساعتها ونا بكتم اي حاجه حابه اعملها و اغيرها
الكلام عدى عليه مُدة بس لسه بيحاولو يرجعوا فيا اللي كنت بلبسه و بعمله
والدتي دايما شايفه ان المفروض البس لبس انثوي خارج المنزل اكتر من كدا و ان البس كعب و احط ميكب
بجاهد نفسي ف موضوع البناطيل و اخدت خطوة ان قطعا لو حصل ايه مش هلبسها و انزل بيها و سبت كل هدومي القديمة و فضلت فترة طويلة بلبس نفس الأطقم على جيبة واحده ، و كله بسبب عدم اقتنعهم ب اللي بعمله
بس دلوقتي تقبلو الأمر الواقع طبعاً ماما بتفضل كل منشتري لبس توريني بناطيل و ستايلات فيها بناطيل او جاكيت ديق ونا اقولها مش حلو و من جوايا نفسي البسه جداً
ماما لما اخدت خطوة ترك اللبس الديق و عملت الخلاف ده مع والدي حكت لطوب الأرض على اللي عملته
و الغريب ان كلل العيله كانت شايفه انهم هم الصح مش انا
حتى عمتي اللي هي كانت بتلبس واسع قالت انها بقت تشوف البطانيل الواسعة ساتره عن الجيب و بقت بتلبسها
طبعا ماما فضلت تنقل كل الكلام اللي قالوه ده ليا لدرجة انها حكت لمراتات خيلاني اللي أصلا مش بنحكيلهم حاجه عننا
كانت فترة صعبه بس الحمد لله الموضوع بيبقا هين مع الوقت بفضل ربنا اللي مثبتني ، انا ضعيفة امام كل ده جدا خاصةً كلام زمايلي و أهلي ان انا ازاي شخصيتين برا و جوا البيت و اني ازاي جمالي ده مش بستغله،
و دي من اصعب الجمل على قد م هي مدح ف هي بتؤذيني اوي ببقا فعلاً شخصيتين و شكلين مختلفين تماماً جوا البيت عن برا البيت و بيبدأ يدخلي الشيطان من الجزء ده و ان ازاي اللي هتجوزه هيعرف ان انا جميلة منغير ميشوف كل ده او ازاي هجذبه حتى ؟
من الحاجات اللي كان نفسي اعملها عشان اتجنب ده ان البس خمار ف جيت فترة الشتا استغليت الكوفيات و استعملتها كأني لابسه خمار
طبعا معرفش الصيف اللي داخل هعمل ايه ولا هلف الطرحة خمار ازاي و هيحصل ايه
جيت من فترة كنت بفكر لو تقدملي زوج صالح و قالي انتقبي هعمل ايه ، كنت بشوف النقاب حلو بس انا مش شايفاه فرض بل إحسان
بعدها من يومين كنت ببحث و جيت اشوف النقاب بكيت تلقائي ان ازاي البنات دي بتخرج و بتبقا ساترة جسدها و متأكدة انها على الصح و ازاي احساسهم جميل
اوقع النقاب في قلبي حباً
بس استحالة استحالة أعرف اخد خطوة ذي دي ، بفضل اقول لنفسي يمكن لما اتزوج يبقا كويس و يفرض هو النقاب عليا
المسئلة كمان مش نقاب بس ، فكرة الأغاني و الأفراح بعاني منها و مش عارفه إزاي اوضحلهم ان حرام ف مش هروح
اخر فرح ابن عمتي امي اشترتلي ميكب بفلوس غاليه اوي و أنواع غالية عشان تحطني قدام الأمر الواقع و ان هتحطي
حطتلي هي و بعد م حطت كنت قرفانه و قولتلها وحش و قعدت امسح منه حبه كتير قبل الفرح بالمنديل
اخدت تهزيق ان ايه الهبل اللي عملتيه ده و بابا قالي اشترته غالي و ف الأخر تمسحيه و هكذا
و حضرت الفرح الفستان كان ديق من فوق جدا ف لفيت الطرحه بحيث تغطي شويه
بردو مكنش عاجب ماما خالص
و كانو بيقنعوني ان عادي ابين حته من شعري او البس سكارڤ و هيبقا احلى عليا
و موضوع الأغاني تعبني اوي كتبت و حكيت مشكلتي تجاهو هنا قبل كدا
انا مش عارفه اعمل ايه ف الأفراح اللي بعد كدا بفضل افكر ان لسه في بنات خالتي و اخواتي البنات و قرايب كتير اوي و افراح هتصرف قدام كل ده إزاي
اقنعت واحده قريبتي انها متعملش فرح و هي كمان بقت ذيي و نفسها تلبس النقاب و لما قالتلهم كدا كانت مصيبه طبعاً كان بظبط كأنها بتقولهم عايزه البس بدلة رقص
بيجيلي بعض القلق تجاه اللي هتزوجه نظراً لفرض العيلة على قريبتي ب عريس هي مكنتش بتحبه و اضطهادهم ليها الطويل انها بتعامله وحش و مبتفهمش
هم وصلوا لمرحلة ان شككوني انا فيها و خلوني محبهاش من كتر كلامهم ان ازاي غبيه و ان الولد ده ميتعوضش و هي بترفضه ، فكملت معاه فترة طويله كان هو اتعلق و هي بتكرهو بعدها سابته و مستحملتش و لما سابته ظهر على حقيقته ،
عملوا معاها مشاكل كتيره اوي عشان بس هي مش عايزاه ، بخاف لما يجيلي شخص يعملو كدا و يجوزوني لواحد انا مبحبهوش
أملي كله ف اللي هتزوجه بعد كدا ان يكون على دين و علم و يساعدني ف بخاف اوي لو طلع عكس كدا
بس في النهايه بتوكل على الله و بدعو ربنا ان شاء الله يستجيب ، و بحس ان دي وساوس شيطان عشان يخوفني مش اكتر
اسفه ان طولت بس حقيقي كنت محتاجه افضفض عن اللي بيحصلي و شكراً ليكم
يا حبيبتي، أول حاجة شكرًا إنك فضفضتي هنا، وده خطوة كبيرة جدًا وشجاعة منك. أنتِ بتعملي جهاد ربنا يثيبك عليه، و17 سنة ونص وبتحاربي كده؟ ده إنجاز عظيم، وأنا فخورة بيكي أوي. ربنا مثبتك زي ما قلتي، وده دليل إنه معاكي. عن احترام أهلك لقراراتك : هما مش هيحترموها فجأة، بس أنتِ تقدري تبني الاحترام بالصبر والثبات. كلميهم بهدوء في وقت هادئ، قوليلهم "أنا بحاول أرضي ربنا، وده قراري اللي هيسعدني في الآخرة، ساعدوني بدعواتكم". لو ضغطوا، ابتسمي وقولي "الحمد لله، أنا مرتاحة كده" واستمري بدون جدال كبير – الثبات بيغير الواقع مع الوقت، زي ما حصل مع اللبس الواسع. لو عايزة دعم أكتر، شوفي أسئلة مشابهة في فدني، هتلاقي بنات كتير مرّوا بنفس اللي أنتِ فيه. اللبس والنقاب : برافو عليكي إنك سبتي الهدوم القديمة! للصيف، جربي خمار قطن خفيف أو طرحة واسعة مع كوفية، هتلاقي أنواع عملية في المحلات الإسلامية. النقاب حلو وإحسان زي ما قلتي، بس لو وقع في قلبك، ابدئي تدريجيًا لوحدك برا البيت (مش لازم تقولي لحد دلوقتي). ربنا ييسرلك، ولو زوجك الصالح طلب، هيبقى سهل. الأفراح والأغاني : متروحيش، واعتذري بلطف: "مش هقدر أحضر عشان التزاماتي، ادعولي". لو أجبرتك ماما، حاولي تروحي وتغطي كل حاجة وتتجنبي الرقص/الأغاني قدر الإمكان، أو قعدي في ركن هادئ. مع الوقت، هيتقبلوا رفضك زي اللبس. اقنعتي قريبتك؟ ده نصر كبير! القلق من الزوج : ده وساوس شيطان زي ما حسيتي، ربنا قال "وَمَنْ يَتَّقِ اللَّهَ يَجْعَلْ لَهُ مَخْرَجًا". ادعي ربنا يرزقك زوج صالح يفهمك ويساندك، وخلي أهلك يعرفوا إنك عايزة زواج على دين. متخافيش، اللي بيخاف الله هيلاقي الخير. أنتِ مش شخصيتين، أنتِ واحدة قوية بتحمي نفسها. استمري، ولو عايزة استشارة خبراء في فدني (https://www.fedni.net/experts)، روحي ليهم في التربية الإسلامية أو الاستشارات الأسرية. ربنا يثبتك وييسر أمرك، وأنا هنا لو عايزة تفضفضي تاني. 💕
تم النشر الاثنين، ٩ فبراير ٢٠٢٦
لعرض السؤال في فدني اضغط هنا