السلام عليكم، أنا فاهمة إحساسك كويس بس حاولي تهدي كده وتستعيني بالله. انسي خالص المادة اللي عدت أيا كان اللي عملتِه فيها، اتعودي أي امتحان يخلص ارميه ورا ظهرك وركزي على المواد اللي بعده. أنتِ كده بتضيعي الباقي وفي الآخر ممكن يكون توترك مهيألك إنك عكيتِ في الامتحان وتكتشفي العكس، كتير حصل معانا نخرج من الامتحان حاسين إن حلنا أسوأ حاجة وربنا بيسترها والتصحيح بيكون كويس. فأنتِ استغفري ربنا كده وتوكلي عليه وهدي أعصابك. عارفة الكلام سهل والتنفيذ صعب بس فعلا مش قُدامك غير تقفلي عقلك عن التفكير في الامتحان اللي فات وتركزي على الجاي. أنتِ مش هتقدري تغيري اللي حصل بس في إيدك تغيري اللي جاي. وبلاش تدخلي اللجنة متوترة لأن التوتر بينسيكِ اللي أنتِ مذاكراه. لو رايحة نايمة كويس وأعصابك هادئة ومش متوترة هتقدري تحلي أفضل من واحد مقفل المنهج 100% بس متوتر ومش مركز. اعملي بالنصائح اللي قالتها طويلبة علم في إجابتها وكرري كتير ذكر (لا حول ولا قوة إلا بالله العلي العظيم) و(حسبي الله ونعم الوكيل) ردديهم كتير خلال اليوم وبين فترات الراحة بين جلسات المراجعة. ربنا معك ويوفقك.
فاهمه بس انا اقصد حتي لو في اجابه مش اعرفها لما بختار الاجابه وبعدين في الاخر اغيرها بسبب الشك او اني مش اعرفها أو ذاكرتها بتكون في الاخر الاجابه اللي انا اخترتها في الأول صح او لو مثلا في عقلي اخترتها بس مخترتهاش وانا بحل فاهمه انا بقصد ده
تم النشر الاثنين، ٢٢ يونيو ٢٠٢٦
التوتر وعدم التركيز هو اللي بيخليكِ مترددة وبتشكي في الحل فتغيريه، فزي ما قلت إنك تروحي نايمة كويس وأعصابك هادية ده بيخليك مركزة وقادرة تسترجعي المعلومات اللي ذاكرتِها.. كمان بيحصل كتير إن إجابات بعض الأسئلة ممكن تلاقيها مكتوبة في أسئلة تانية فلما تكوني بتحلي بهدوء تقدري تلقطيها... من الحاجات اللي كانت بتساعدني أبدأ الامتحان من دون توتر إن الكم دقيقة قبل استلام الورقة مفتحش أي كتاب أراجع ولما أقعد في اللجنة استغل الوقت ده في قراءة قرآن أو أردد أذكار وأتنفس كم دقيقة تنفس عميق منظم عشان أهدي نفسي. ممكن كمان في مراجعتك للمواد الجاية لما تفصلي شوية بين جلسات المراجعة تفصلي بقراءة قرآن عشان ربنا إن شاء الله يبارك في مذاكرتك، دي حاجة جربتها في امتحاناتي وفرقت معي.. أنتِ ركزي على مادة مادة ومتراجعيش بعد الامتحان وترجعي تفصلي (باقي اليوم أو كم ساعة حسب جدولك) بعيد عن المذاكرة عشان تبدئي المادة اللي بعدها وأنتِ شاحنة طاقتك ونفسيتك.. ربنا يوفقك.💚
تم النشر الاثنين، ٢٢ يونيو ٢٠٢٦
انا راجعت وفعلا زي ما توقعت. المشكله اوقات بجاوب صح وفي الاخر لما بغيرها بتكون غلط ودا عشان انا بكون ياما نسيت او معرفش فمش بثق في الاجابه
تم النشر الاثنين، ٢٢ يونيو ٢٠٢٦
لعرض الإجابة في فدني اضغط هنا