صباح الخير أنا عندي عشرين سنة دلوقتي أنا بعيدة جدًا عن ربنا يعني فين وفين لما بصلي أو بقرأ قرآن أنا بجد من جوايا نفسي أقرب من ربنا جدًا، بس برضو بكسل أقوم أصلي وأدعي. أنا بصلي بس فين وفين، وحياتي مدمرة بجد. أنا دايمًا لوحدي، آه حواليا أصحابي وأهلي، بس برضو بحس إني لوحدي
فاشلة دراسيًا وفاشلة في علاقتي مع ربنا. دايمًا بحس إني فاشلة في كل حاجة. أنا من جوايا نفسي أتغير، نفسي أقرب من ربنا، نفسي أكون إنسانة كويسة، بس أنا كل مرة بلاقي نفسي مش بعمل حاجة. وأنا والله بحاول، دايمًا بحاول، بس كل مرة بفشل في كل حاجة، بس بحاول مفكرش أستسلم.
أنا ساعات بكون راضية وحاسة إن ربنا بيحبني، بس دلوقتي أنا مش حاسة بكده بحس إن ربنا مش بيحبني، وكل ما بدعي على حاجة نفسي فيها مش بتيجي. أنا عارفة إني مقصرة أوي أوي، بس مش عارفة، مش عارفة بجد أعمل إيه. رغم إني بحاول برضو، مش بلاقي أي نتيجة
وأكتر حاجة نفسي فيها إن علاقتي بربنا تكون أحسن، أقرب منه، نفسي أوي أوي أنتظم في صلاتي
وبرضو علاقتي بمامتي مش أحسن حاجة، أو بمعنى أصح إني مش بحبها، ومش قادرة أستحملها بجد. دايمًا بنتخانق، بتلومني في كل حاجة، وأنا السبب في كل حاجة. ساعات بكون مش قادرة بسببها، بسبب تحكمها وإن أنا نفسي في كذا وهي مش موافقة. بتشتمني وبتزعقلي قدام الناس، وبتضربني كمان وأنا كبيرة
أنا بابا متوفي و بحس إني ماليش حد، حد يطبطب عليا أو يسندني أو يساعدني. وأنا بحس إني بعمل كل حاجة لوحدي، وكل ده برضو بفشل
زهقت بجد من حياتي ومن إني فاشلة
بصي يا بنت الناس أحسن حاجة أن فيكي الخير وجواكي النية إنك تتغيري وتقربي من ربنا وده معناه إن قلبك لسه سليم وربنا بيحبك ولولاه ما كانش زرع فيكي الشغف ده متجلديش ذاتك وتبصي للدنيا كلها مرة واحدة لأن التغيير بييجي خطوة خطوة ابدأي بالصلاة بس حتى لو مقصرة وقاومي كسلك وابدأي بالفرائض وحدة وحدة وتذكري إن ربنا ورحمته أكبر من أي تقصير وبالنسبة لمامتك استوعبي إنها ممكن تكون بتعاني من ضغوطات وفقدان والدك الله يرحمه وهي كمان مش عارفة تتعامل هدي اللعب معاها وحاولي تستحملي غضبها واستغفري كتير وحطي لنفسك هدف صغير كل يوم في دراستك أو حياتك وحققيه عشان تحسي بالإنجاز وتبعدي عن فكرة الفشل دي خالص لأنك مش فاشلة بس محتاجة ترتبي أفكارك وتاخدي نفس عميق وتبدأي من جديد وربنا معاكي وهيسندك. والصلاه مجرد ما تسمعي الاذان تتوضي وتصلي فورا متستنيش اي حاجه ...وجد والله ربنا يحفظك ويوفقك لما يحب ويرضى
تم النشر الجمعة، ١٨ سبتمبر ٢٠٢٦
بصي في صلاه اسمها صلاه التوبه صليها وتولي من كل ذنوبك وابدئي التزمي بفروضك واقري الاذكار وقرآن يوميا حتي لو ورد صفحه بالتعود هيزيد وادعي ربنا يهديك ويثبتك ويبعد عنك الشيطان طلعي صدقه ولو حاجه بسيطه جدا علي قد مقدرتك يعني اكل او فلوس حاولي تشوفي الذنوب الي بتعملها ووقفيها زي الغيبه النميمه يعني زي كدا شوفي انتي بتعملي اي وحاولي توقيفه ربنا يثبتك
تم النشر السبت، ١٩ سبتمبر ٢٠٢٦
صباح الخير يا بنتي، أول حاجة أحب أقولها لك إن شعورك ده بالذات دليل على إن قلبك لسه حي وشايف النور، وربنا بيحبك ومش هيسيبك أبدًا. اللي بتمرّي بيه طبيعي جدًا في السن ده، والإحساس بالفشل والوحدة والتقصير مش بيخلّصك من رحمة ربنا، بالعكس، هو بيفتح باب التوبة والرجوع. أنتِ مش فاشلة، أنتِ بنت بتحاولي وبتقاومي، وده لوحده إنجاز كبير. عشان ترجعي لربنا بخطوات عملية، ابدئي بخطوات صغيرة جدًا مش هتثقل عليكِ. مثلاً، حددي صلاة واحدة في اليوم تلتزمي بيها في وقتها، حتى لو الباقي مش منتظم. بعد الصلاة اقرئي آية أو آيتين من القرآن بتركيز، وادعي ربنا بكلام بسيط من قلبك زي "يا رب قرّبني منك وأعنّي". الاستمرار في القليل أفضل من الانقطاع الكامل، وربنا بيتقبل الجهد حتى لو كان بطيء. كمان، كل ما تحسي بالوحدة أو الإحباط، افتكري إن ربنا موجود وشايف محاولاتك، وادعيله إنه يصلح حالك وييسر أمورك. بالنسبة لعلاقتك بمامتك، ده موضوع صعب ومؤلم، وربنا أمرنا ببر الوالدين حتى لو كان فيه خلاف، لكن ده مش معناه تتحملي الإيذاء. حاولي تتعاملي معاها بهدوء قدر الإمكان وتدعي لها بالصلاح، ولو الوضع بيأثر على صحتك النفسية بشدة، فكري في طرق عملية زي تنظيم وقتك بعيد عن الاحتكاك المباشر أو البحث عن دعم من مصادر موثوقة داخل العائلة. أنتِ مش لوحدك، وربنا هو السند الحقيقي اللي مش هيخيبك. استمري في المحاولة ومتستسلميش، التغيير بيجي تدريجيًا ومش لازم يكون مثالي من أول يوم. ابحثي عن أسئلة مشابهة على فدني عشان تشوفي تجارب بنات تانيين، وهتلاقي فيها إن شاء الله راحة وأفكار جديدة. ربنا يقوّيكِ ويصلح حالك ويفرّج همّك قريب.
تم النشر الجمعة، ١٨ سبتمبر ٢٠٢٦
مهم في البداية أنه بالتوازي مع أنك تهزمي نفسك وتصلي وتقربي من ربنا أنه يكون عندك شيء من الوعظ اليومي تسمعيه بقلبك، لأنه بطبيعة الحال النفس بتحتاج الدافع اللي يرغبها في العمل والزاجر أو الخوف اللي يمنعها من عدم العمل، في بداية نزول الوحي على الرسول صلى الله عليه وسلم كانت الآيات بتركز على جانب الإيمان بالله واليوم الآخر والحساب والجنة والنار بشكل كبير جدا، ودي هي الطريقة الصح لتلقي الدين لأن لما يزيد الإيمان واليقين دا هيثمر للعبادة من صلاة وقراءة قرآن ودعاء طعم خاص وخشوع عجيب....
تم النشر السبت، ١٩ سبتمبر ٢٠٢٦
لازم الصلاه دي اول حاجه
تم النشر السبت، ١٩ سبتمبر ٢٠٢٦
حاولي تاني حاولي انك تصلي قومي صلي اي اذآن تسمعيه مره على مره هتلاقي نفسك بتصلي متشيليش همها يعني لما تسمعي الاذآن منغير تفكير قومي صلي اكنك راحه شغل أو دي حاجه روتينية عندك الموضوع مش هياخد منك 3 دقائق أو 4
تم النشر السبت، ١٩ سبتمبر ٢٠٢٦
لعرض السؤال في فدني اضغط هنا