السلام عليكم ورحمه الله وبركاته
انا شخص انطوائي جدا و مكنتش بحب اتكلم مع حد لكن بعد فترة انا اتعرفت على صاحبتي و هي فعلا اصبحت كل حاجه في حياتي بس انا عندي مشكله اني لما بحب حد بحبه حب تملك يعني مش عايزاه تكلم حد غيري ولا تهزر مع حد حاولت كذا مره اني اعالج الحته دي لكن فعلا مش عارفه و بقيت بزعل منها كتير حتى لما حاولت اعالج الحته دي لقيت اني بحاول اقطع علاقتي بيها علشان مبقاش متضايقه بس دا بردو بيأثر على نفسيتي مش عارفه اعمل ايه
السلام عليكم، شكرا أولا إنك وجهتِ لي السؤال وأرجو إني أقدر أفيدك ولو شوية. أنا مش مختصة نفسية لكن هحاول أجاوبك من خبرتي الحياتية المتواضعة. ** برأيي أساس المشكلة أنتِ ذكرتِه وسط كلامك.. (أصبحت كل حاجة في حياتي) طبيعي لما تخلي حد هو محور حياتك أو كل حياتك هتتعلقي به ومش هترتاحي لو حسيتِ إن مش معك لوحدك بكامل تركيزه أو بيعطي للآخرين جزء من الاهتمام اللي من وجهة نظرك هو من حقك وحدك. واللي بيزود المشكلة إنك شخصية انطوائية فمفيش شخصيات تانية أو توسع في بيئتك الاجتماعية يقلل تمركز مشاعرك عليها. ** الحل إنك لازم تقفي مع نفسك وقفة حازمة وتوسعي عالمك ومتخليهوش مقتصر عليها. *** طبعا الموضوع ممكن يحتاج شوية صبر وجهد لكن مع الاستمرارية هتلاقي نفسك المشكلة بتقل واحدة واحدة. خرجي نفسك بنفسك من فكرة إنها كل عالمك. اجبري نفسك يكون لك اهتمامات تانية وأنشطة تسحب وقتك وتفكيرك، ويا ريت الأنشطة تكون بتتطلب اختلاطك ومقابلتك لناس تانية حتى لو كانت هي معك أحيانا في بعض الأنشطة دي. المهم إنك توسعي دائرتك حتى لو شخصيتك انطوائية فعلى الأقل استعملي القدر الأدنى من طاقتك الاجتماعية عشان تكسري الدائرة دي. ** خلي فيه زملاء أو أصحاب غيرها، مش شرط توصل لصداقة. وعادي تحسي بالغيرة والضيق، بس اللي مش عادي إن ده ينعكس في تصرفاتك معها... الغيرة والضيق هيقلوا مع الوقت لما تستمري على شغل وقتك وحياتك بحاجات غيرها. بلاش جلد ذات لنفسك على مشاعرك لأن ده هيعقد المشكلة. ** كمان أنتِ بتحبيها، ففكري فيها وحطي نفسك مكانها، هتحسي بإيه لو حد حجر حريتك وعلاقاتك مع الناس وسجنك في سجن ضيق؟ كل ما تحسي بغيرة وتملك فكري في إحساسها ووقفي أفكارك واشغلي نفسك بعدها في كلام مع الصحاب اللي هي بتهزر معهم أو اعملي نشاط مختلف ياخد تركيزك. ** جربي كده ولو لقيتِ الموضوع صعب لوحدك لا تترددي تطلبي مساعدة مختصة نفسية أو معالجة سلوكية تساعدك بخطوات عملية ومتابعة. وإن شاء الله ربنا يسهل وتتخلصي خالص من مشكلتك. بالتوفيق.💚💚
تم النشر الثلاثاء، ٢ يونيو ٢٠٢٦
لعرض السؤال في فدني اضغط هنا