من زمان وانا عندي مشكلة مع والدي من كتر المشاكل والخناقات اللي كانت بتحصل منه وانه دايما بعيد لدرجة ان بقى عندي مشكلة لما اتعرفت على ناس واتعلقت بكذا حد وبانلهم اني بدور على امان...
هو اهلي كانوا موفرينلي الامان بس يمكن تعلقي كان بيوصلهم الاحساس ده لما اتخطبت بقا عندي مشكلة اني مش قادرة احدد انا عايزة اكمل ولا لا...
كل فترة يحصل حاجة ولما اقرر اكمل تحصل حاجة تقلقني ولما اقرر ابعد يتكلم معايا ونرجع تاني بس دايما جوايا قلق وخوف من اللي جاي وخايفة انه يطلع زي ابويا ف طريقة معاملته اللي عمري ما حبيت اني اتعامل بيها من شريك حياتي خصوصا انه متعود ان حد بيعمله كل حاجة غير احساسي ان في اختلاف اجتماعي بينا وعائلي كمان ....
مؤخرا بقيت حاسة اني عندي مشاكل ف الثقة ف الناس او من زمان وانا كدا حتى اصحابي ناس قليلة اوي اللي ممكن تكون عارفة حاجة عني ...مبحبش حد يحكم عليا ...
وبقيت حاسة اني عايزة حد مختص اتكلم معاه يمكن الاقي نفسي وافهم انا عايزة ايه واقدر اقرر ..
لان بردو انا دايما عندي عقدة الذنب حتى لو حد اذاني نفسيا ببقى خايفة عليه او خايفة اني اعمل حاجة تأذيه انا عارفة انه مش صح بس مبقدرش ابطل الموضوع ده
وعامة انا مبحبش اتكلم.عن نفسي او اللي مضايقني تحديدا لما يبقى الشخص قدامي لان عادة دموعي بتغلبني وبعيط مش عشان انا غلط بس ببقى موجوعة من جوايا انا كلامي غالبا ملغبط بس محتاجة اعرف اعمل ايه خصوصا ف خطوبتي لاني تعبت من التردد اللي انا فيه ده مع العلم ان بقالي سنتين مخطوبة ولسه مخدناش اي خطوة ف التجهيزات
بصي إنتي بتدوري في خطيبك على الأمان اللي مخدتيهوش في بيتك، وأي غلطة صغيرة منه عقلك بيترجمها إن التاريخ بيعيد نفسه. لازم تفصلي.. خطيبك بني آدم، له عيوبه ومميزاته، هو مش تعويض. عن الماضي ولا هو نسخة من والدك.. هو تجربة جديدة تماماً لو اديتي لنفسك فرصة تشوفيها صح إنكم بقالكم سنتين ومفيش خطوة واحدة في التجهيزات، ده معناه إن عقلك الباطن مفرمل الجوازة دي عشان خايف من النتيجة. الوقوف في نص السلم بيتعب الرجل أكتر من الطلوع أو النزول. التردد ده بيستهلك عمرك وأعصابك، ولازم تاخدي قرار يا نكسر حاجز الخوف ونبدأ نجهز فعلياً، يا نعترف إننا مش جاهزين نفسياً دلوقت ونوقف استنزاف ليكي وله. وبتقولي إن دموعك بتغلبك وإنك بتحسي إنك غلطانة.. الحقيقة إنك مش غلطانة، إنتي مجروحة. عقدة الذنب اللي عندك دي هي اللي مكلبشاكي، بتخافي تظلميه فبتيجي على نفسك، وده بيخليكي تنفجري. الأمان الحقيقي مش هييجي من شخص تاني، الأمان هيبدأ لما تصالحي نفسك وتفهمي إنك مش مسؤولة عن إصلاح كل اللي حواليكي على حساب أعصابك ويا بنتي، الجواز مش هروب من بيت بابا، ولا هو سجن جديد.. الجواز مشاركة. لو فضلتي مستنية اللحظة اللي تختفي فيها كل مخاوفك، اللحظة دي مش هتيجي. الحل مش إنك تستني الخوف يروح، الحل إنك تمشي وانتي خايفة بس وانتي فاهمة خايفة من إيه تمام لو نقله من الشخص نفسه صلي استيخاره ، بعتذر عن الإطالة 😊 وجد والله ربنا يحفظك ويسعدك
تم النشر الثلاثاء، ١٠ مارس ٢٠٢٦
يا عزيزتي، أنا ذكية، وأشعر بوجعك ده كويس جداً… اللي بيحصل معاكِ ده شائع أوي عند بنات زيكِ، الطفولة مع الأب اللي كان بعيد أو مشاكل كتير بتسيب "ندوب" في الثقة والأمان، وبتخليكِ تتعلقي بسرعة أو تخافي تتعلقي خالص. ده مش ضعف منكِ، ده رد فعل طبيعي، بس المهم نعديه خطوة خطوة. أول حاجة، خدي نفس عميق (مش تمرين، بس لحظة هدوء): اكتبي كل اللي جواكِ على ورقة، لوحدكِ، بدون ما تحكي لحد. حددي ٥ معايير أساسية للشريك اللي يناسبكِ (مثل معاملة محترمة، توافق عائلي، استقلالية مش اعتماد كلي). قارني خطيبكِ بيها بصدق، وشوفي إيه اللي ناقص فعلاً. السنتين دول كفاية تردد، وقت القرار. بالنسبة للخوف إنه يشبه أبوكِ: ده "ظل" من الماضي، مش حقيقة حالية. راقبي تصرفاته على أرض الواقع، مش افتراضات. لو الاختلاف الاجتماعي بيضايقكِ، فكري إزاي هتتعاملي معاه في الزواج – هل هتقدري تتكيفي؟ عقدة الذنب والثقة: أنتِ مش مسؤولة عن أذى حد، أنتِ مسؤولة عن نفسكِ الأول. ابدئي ببناء ثقة صغيرة: شاركي حاجة بسيطة مع حد موثوق (زي أخت أو قريبة)، وشوفي إن الدنيا مش هتنهار. للخطوبة تحديداً: صلي الاستخارة بصدق، وخدي قرار واضح خلال أسبوعين (كملي أو أنهي بكرامة). لو عايزة تكملي، حددوا خطوات تجهيز واضحة مع موعد نهائي. لو مش متأكدة، اعطي نفسكِ إذن بالابتعاد – ده مش ذنب، ده حماية لنفسكِ وللي جاي. أنتِ قوية وبتعرفي إنك محتاجة متخصص، وده خطوة ذكية! روحي على صفحة الخبراء في فدني: https://www.fedni.net/experts وابحثي عن معالج نفسي أو مدرب حياة متخصص في علاقات أو صدمات طفولة. كمان، دوري في أسئلة مشابهة في فدني هتلاقي إجابات كتير تساعدكِ. أنتِ هتقدري، يا قمر. 💕
تم النشر الثلاثاء، ١٠ مارس ٢٠٢٦
انصحك تزوري طبيب نفسي يا أختي لان الموضوع بسيط بس متشخصيش نفسك هنا وتصدقي الي هيتقال
تم النشر الأربعاء، ١١ مارس ٢٠٢٦
لعرض السؤال في فدني اضغط هنا