السلام عليكم، أكبر ظلم هترتكبيه في حق نفسك إنك توافقي على الشخص ده. أنا مش شايفة أي شيء طبيعي في اللي حكيتِه وعلامات الخطر منثورة في كل سطر. بعيدًا عن فرق السن الكبير كل حاجة تانية بتصرخ إنذار فبلاش تلقي نفسك في التهلكة عشان خاطر ضغط أي حد أو كلام أهلك لأن محدش هينفعك بعد كده. أنتِ سنك لسه صغير وكمان متزوجتيش أصلا قبل كده وحتى لو تزوجتِ قبل كده واتطلقتِ ده لا يدفعك للموافقة على شخص بالمواصفات دي. ** خليني أقول لك حاجة مهمة، أنتِ محتاجة تقفي مع نفسك وقفة وتراجعي أفكارك ونظرتك لنفسك، لأن لو عندك مشكلة داخلية تجاه سنك وتجاه فسخ خطوبتين وعقد قبل كده أو إنك تكوني بتتأثري بكلام سلبي من اللي حولك إنك مثلا بتكبري أو مطلقة أو محدش هيرضى بك وبتصدقي ده جواك، كل الأفكار دي للأسف هتخليكِ تجذبي النوعية دي من الرجال. ** غيري أفكارك وحبي نفسك وشوفيها تستحق الأفضل وثبتي في عقلك تمامًا، إن لا سنك ولا تجاربك السابقة تقلل منك في حاجة أو تعطي مبرر لحد إنه يقلل منك أو يقول إنك تستحقي أي جوازة والسلام. ** تاني مرة تقعدي مع شخص متقدم لا تسمحي له يتجاوز بالطريقة اللي عملها الشخص ده، ولا من حقه يسألك عن تجاربك السابقة ولا حتى من حقه يقول لك هقفل لك حسابك أو مفيش نت لأن دي غالبا علامة خطرة وفي معظم الحالات بيكون شكاك أو عارف بنات مش كويسة على النت أو عنده غيرة مرضية. *** اختاري بتأن وصلي استخارة قبل الموافقة على أي شخص متقدم (أي حد غير ده) حتى لو حسيتِ بقبول وطولي فترة الخطوبة براحتك وادرسي الشخص كويس لحد ما تتأكدي إنه يستحق يكون شريك حياتك وأب أولادك فعلا. وربنا يكتب لك الخير ويرضيك به.
لعرض الإجابة في فدني اضغط هنا