أول م قرأت كلامك جه في دماغي حاجه ألا وهى انك اننتى لازم تحبى نفسك، بس حب للنفس أولا يكون صادق مش بالعافية، يعني مش تتظاهرى بحبك لنفسك وأنتى في قرارة نفسك مليانه مشاكل بينك وبين نفسك ومش قادره تتغلبى عليها، وثانيا يكون حب محايد، يعني حبك لنفسك الغرض منه يكون انك تكونى خايفه على نفسك وعاوزه تخلي نفسك احسن حد في الدنيا فعلا، ف تنتقدى نفسك بشكل موضوعي وتصححى أخطائك وتفكرى في مواقفك وآراءك وتوجهاتك وتصرفاتك ويكون عندك مرجعية تصقل عليها كل الأفكار دي. حبك لنفسك هييجي من انك تكونى منبهره ب قد ايه أنتى إنسانه فعلا كويسه، بس حطيلي خط تحت كلمة فعلا، يعني عاوزك تتعلمى حاجات جديدة، تجتهدى في دراستك أو شغلك، قوي جسمك، اتعلمى هوايات، تفقهى في دين الله واعرفى طريق خلاصك في الآخرة واللي هو خير وأبقى لكى لو تعلمى. اتعاملى بشكل كويس وطيب ونمي مهاراتك الاجتماعية، اقرأى اقرأى اقرأى خصوصا في الدين . هتلاقي نفسك بدأتى تحبى نفسك والناس هتبدأ تقرب منك، ثقتك في نفسك وحبك ليها هم أول خطوة، محدش هيحب حد مش بيحب نفسه، انا مش بقول انك مش بتحبى نفسك لكن حاولى تفكرى ف اللي قولتهولك. + حاولى تقربى من زوجك أكتر وتشوفى هو ليه مبقاش يحبك ليه ممكن يكون فيه سبب وتحاولوا ترجعوا زى الاول
لعرض الإجابة في فدني اضغط هنا