السلام عليكم، أولا ربنا يعينك وتمر الفترة الصعبة دي على خير، واضح إنك تعبتِ ومريتِ بظروف صعبة، وأيا كان السبب، سحر أو ضغوط نفسية وصحية فقدر الله وما شاء فعل. ركزي على الجاي وواظبي على الأذكار والرقية الشرعية واكشفي عشان تطمئني إن مفيش مشكلة صحية هي اللي أثرت على التركيز وتذكر المعلومات في الامتحانات. *** بالنسبة للنتيجة واختيار الكليات أو المعاهد فالأفضل تنتظري نتيجة التظلم وتركزي على اجتياز المواد الباقية وبعد كده تقارني مجموعك النهائي بالتنسيق لأنه بيختلف من سنة للتانية وكل اللي الناس بيقولوه هيكون مجرد توقعات أو كلام غير مؤكد منهم. ** متفكريش في حاجة أو قرار دلوقتي وأنتِ مشاعرك لسه في صدمة وخدي وقت تهدي عشان تركزي بعد كده مع المواد الباقية واعملي اللي عليكِ وإن شاء الله خيرًا. *** وحطي في بالك إن الثانوية مش نهاية العالم ولا عدم دخولك كلية معينة معناها إنك فشلتِ في حياتك كلها لا قدر الله، دلوقتي ناس كتير مش بتشتغل بشهادتها أصلا، وناس نجحت في مجالات مكنتش متخيلة تدخلها في يوم وكان نفسها في كليات تانية وربنا لم يشأ، ودلوقتي أي مجال عاوزة تتعلميه بقى متاح ومبقاش التعلم والنجاح مقتصر على الدراسة الجامعية. والثانوية زي ما قلت مش النهاية، هي بس بتوجهك لطريق جديد في حياتك وأنتِ في إيدك تحققي فيه النجاح والتفوق إن شاء الله. بالتوفيق.💚💚
لعرض الإجابة في فدني اضغط هنا