إجابة علي السؤال: أكره أهلي .. وأتمنى أن أتبرأ منهم ويتبرأون مني واقطع صلتي بهم الي الأبد..!!

اسهل حاجة بتتعمل فى السن اللى انت فيه ومن قبله كمان انك تكون مش عاجبك الحال وفى نفس الوقت مش عارف انت تغير الحال ده لحال افضل .فبالتالى اسهل حاجة نشوف اللى حوالينا الجزء بتاعهم من الغلط ايه ونتكلم على الجزء ده وبس ونلعن الظروف والدنيا والناس . ايوه طب وبعدين . هقولك الكلام اللى غالبا مش هيعجبك بس هو الحقيقة ......ابوك حتى لو مقصر بس هو اللى رباك ووفرلك الامان المادى والبيت واللبس اللى يخليك دلوقتى لمجرد انك جربت فى مسئوليات بسيطة ( مش بيت وعيال ومصاريف ) تقول لا الموضوع صعب اوى ومش هعرف اعمله لوحدى وهتخنق من مواقف اتحط فيها . هقولك يا سيدى تعالى نعتبر انك كبرت لقيت ان مفيش اب اصلا ....كنت هتدخل فى نفس المبررات ...ما انا لو كان ليا اب كان علمنى وفهمنى ..انا غصب عنى اللى ربتنى امى ودى بردوا ست ...هتلاقى لنفسك اى حجة تريح بيها نفسك انت . اللى عاوز يعمل حاجة يا ابنى بيعملها ...عاوز تبقى راجل انزل اشتغل فى الاجازة وفى ناس شغالين من اعدادى ومعندهومش رفاهية اصل الثانوية ضغط ومذاكرة ويقدر يسيب شغل ومسئوليه ..بيعملوا كل حاجة ومبيتحججوش ..لانهم ببساطة لو قعدوا يصيحوا وخلاص مش هيلاقوا اكل فى البيت . لكن حضرتك كافة احتياجاتك متوفره من الراجل اللى انت شايفه كسول ومقصر ...لما تقدر تعمل اللى بيعمله يا ابنى فى نفس الزمن ده ابقى اقف وحاكمه . بتكرههم اوك مفيش مشكله خالص ....مش مطلوب تحبهم ..مطلوب تكون بس ابن محترم وتراعى طلباتهم وتستحملهم متحبهومش ..بس حب ربنا اللى انعم عليك نعم ...انت مش حاسسها دلوقتى وشيطانك قاعد يوريك بس النواقص ومخليك فى ضنك يارب تحس النعمه قبل ما تروح منك يارب اللى ناقص منك يا سيدى خده من اى حد تانى غير ابوك ..شوف اى حد زى الشيخ بتاعك واعتبره اب وخليه قدوه ليك واطلب منه يعلمك الاداب والاصول والرجوله اللى انت مفتقدهم . مش كل حاجة بيعرف الاب والام يوفروها ( ومع ذلك مكانتهم محفوظة ) فاللى مقدروش عليه بسبب قلة ثقافه ولا قلة حيلة ولا قلة طاقة ومحدودية تفكير ...اتفضل الدنيا واسعه وفيها طرق كتير تتعلم منها . وابقى حب اللى هيعلمك عادى جدا واشعر ناحيته بالفضل اللى مش قادر تحسه لاهلك.