كنت متعرف على واحدة من قيمة ست شهور تقريبا وكانت كويسة جدا معايا ف البداية ومع الوقت ابتديت اخد عليها وعلى وجودها فحياتي مع الوقت بدأت المشاكل تكتر بينا لدرجة انها وصلت لخناق كل يوم بيني وبينها ودايما كانت هي اللى بتقفل الموضوع ولا كإن فارق معاها أي حاجة لكن يعلم ربي اني لما كنت بتصل بيها عشان نحل الموضوع كان عشان اني بحبها ومش عايز أخسرها كانت كل مرة بالبلدى كدا بحس انها بتتنطط عليا عشان انا اللى بتصل وبحاول أصلح الغلط اللى والله ف الغالب مكانش بيبقا مني كنت مكلم ابوها عن اني عايز أتقدملها من فترة وكان معلقني ومحستش باهتمام من ناحيتو فقطعت معاه وجيت من قيمة يومين كلمتو تاني وقالي هرد عليك كمان يومين وعرفت امبارح ان كان في واحد عندهم ف البيت المفروض انو بيتقدملها وكدا حقيقي مش مصدق بعد كل اللى عملتو عشانها ازاى قدرت تعمل فيا كدا مش قادر اتخطى الموضوع والله..
السلام عليكم، قدر الله وما شاء فعل. ربنا مش كاتب لك الخير معها ومين عارف لو كنت كملت وخطبتها وتزوجتم كنت تعبت معها وانتهت العلاقة بانفصال بعد مشاكل وجروح أشد. يعني موقفها وموقف والدها وإنهم مكنوش صرحاء والشد والجذب اللي كان بينكم، وكل العلامات اللي بتقول إنها علاقة مصيرها الفشل، فاحمد ربنا إنها انتهت لكده مهما كان شعورك بالألم والخذلان. وتأكد إن "الخيرة فيما اختاره الله" *** أكيد التخطي مش هيكون بضغطة زر فلازم تعمل حسابك تعطي نفسك الوقت وتصبر عليها، الزمن هيداوي كل حاجة. *** الأول، تفَهّم مشاعرك وإحساسك بالضيق والألم والخذلان وبلاش لوم للنفس أو إنك تقعد تفكر إنك عملت كل حاجة وفي الآخر يكون ده المقابل، الغرق في الندم واستمرارك في لوم نفسك أو التفكير إن "لو" و"يا ريت" هيصعب تخطيك للأمر. لا تحاول إجبار نفسك على نسيانها، مقاومة الشيء بتزوده، تعايش لفترة مع الذكريات والمشاعر، عادي لو خطرت كتير في تفكيرك (بدون الاستغراق في الندم واللوم زي ما قلت) دواك هيكون في إنك تشغل وقتك حتى لو الأفكار هتفضل تخطر ببالك لفترة، إنشغالك في حياتك وشغلك وإنك تضع أهداف تانية تشتغل عليها لو عندك أي وقت فراغ بحيث مع الوقت الأفكار هتتراجع للخلفية. *** أكيد هتيجي عليك أيام تحس بحنين أو غلبة من الذكريات لكن هتقل مع الوقت والانشغال ولو حصل في يوم هي رجعت وحاولت تتواصل وترجع العلاقة وتبرر بأي شيء فبلاش تضعف وترجع لنفس الدائرة اللي غالبا هتنتهي بنفس الألم والخذلان. *** ونصيحة أخيرة، بلاش تكرار لأي ارتباط غير رسمي حتى لو بنية التعارف للزواج أو إنك تكلم أهلها بعد فترة عشان تتقدم، بلاش عشان التعلق اللي ممكن يحصل في الفترة دي، الأفضل لما تكون مهيأ نفسيا وجاهز ماديا للزواج سواء تتقدم لخطبة بنت عن طريق معارفك وتمشي الطريق الرسمي أو لو قابلت بنت وعجبتك وكان فيه قبول مبدئي تسأل عنها وتتقدم وتتعرف عليها وقت الخطوبة، وبلاش تدخل العواطف في فترة التعارف عشان متحصلش نفس المشكلة ويكون حكمك عقلاني، العاطفة بتعمينا والتوقعات والتعلق ممكن يقود لخذلان. ** ربنا يعينك وتتخطى بأسرع وقت. تحياتي.
تم النشر الأربعاء، ٢ سبتمبر ٢٠٢٦
لازم الاول تتقبله علشان تتخطاه اقبل انك اتخذلت عادي وقول لنفسك تجربه وعدت وخرجت منها كسبان نفسي ولسه هتتعلم احنا ياما هنشوف علي الجانب الاخر راجع كل حساباتك من الاول غلطت في ايه واعرف ان الست بتحب الوسط ولا التقيل اوي ولا المرمي عليها بزياده الاعتدال حلو وبعد كده عزز طلبك ومتطلبش غير وانت واثق من قبولك وبردوا الناس غير بعضها متخليش التجربه دي تأثر على اختيارك فيما بعدربنا يوفقك ويعوضك الاحسن
تم النشر الأربعاء، ٢ سبتمبر ٢٠٢٦
أنا آسفة جدًا يا محمود على اللي بتمر بيه، والله الموقف صعب ومؤلم، خاصة لما تكون بتحب حد وبتحاول تصلح الأمور بكل جهدك ثم تكتشف إن الطرف التاني مش بيقدر ده. العلاقة دي فعلاً سامة لأنها مليانة خناق يومي وتجاهل وإغلاق للمواضيع، وده بيخلّي الواحد يحس إنه بيجري ورا حاجة مش بتستاهل تعبه. أول خطوة عملية عشان تتخلص منها: اقطع التواصل تمامًا دلوقتي، حتى لو صعب. متصلش ولا تسأل ولا تحاول تفهم أكتر، لأن الاستمرار هيزود الألم ويأخر الشفاء. ركز على نفسك، اكتب اللي بتحسه في ورقة عشان تخرّج المشاعر، ومارس رياضة أو هواية بتحبها عشان تملّي وقتك بطاقة إيجابية. من الناحية الإسلامية، ادعي ربنا كتير واستغفر وصلِّ استخارة على قرارك بالابتعاد، وتذكر إن اللي ربنا كتبه لك هيجي في الوقت المناسب، وإن اللي حصل ده ربما كان حماية لك من علاقة أصعب. الوقت هيساعدك تتخطى، ولو حسيت إن الألم مستمر قوي، ممكن تبحث عن أسئلة مشابهة على فدني عشان تشوف تجارب ناس تانيين. أنت قوي وهتعدي المرحلة دي، وهتلاقي اللي يقدرك فعلاً.
تم النشر الأربعاء، ٢ سبتمبر ٢٠٢٦
لعرض السؤال في فدني اضغط هنا