السلام عليكم
أنا في تالته ثانوي ومدمن على الفيسبوك
فبضيع بعض الوقت اللي أحتاجه في المذاكرة و السبب إني بخاف أضيع التريندات والأخبار بتاعت العالم فبخاف لما حد يسألني من صحابي أو من إخواتي عن تريند أو حادثة كانت مشهورة علي الفيسبوك ومعرفهاش فبشعر إني مختلف ومبقتش مواكب الأحداث فإيه الحل
بص... اللي عندك اسمه FOMO أو الخوف من فوات التريندات، وده شعور طبيعي جدًا بس محتاج يتحطّ له حدود. الحقيقة إن 99% من التريندات ملهاش أي تأثير على حياتك، وبتخلص في يومين، والمهم فعلًا بيوصلك غصب عنك حتى لو مش على الفيس. الحل مش إنك تقطع الفيس مرة واحدة، لكن تحط نظام بسيط: دخولي 3 مرات بس في اليوم، شيل الإشعارات، وخلي التطبيق جوة فولدر علشان مايبقاش قدامك طول الوقت. ومع الوقت هتلاقي دماغك نفسها بطلت تفتح فيس من غير سبب. ولما حد يسألك عن تريند وإنت مش عارفها، قول: "لا ماعرفتوش، احكيلي"، ومش هيحصل أي حاجة. كلنا بنفوت حاجات. المهم إنك تفوق لنفسك وتفهم إن متابعة التريندات مش إنجاز، لكن مستقبلك ومذاكرتك هما اللي بيبنوا حياتك. اعمل كمان يوم في الأسبوع تقلل فيه الفيس ساعتين بس، هتحس إن ولا حاجة راحت عليك، وهتهدي من جواك. الفكرة كلها إنك تبدّل العادة بعادة أحسن: شوف فيديو مفيد، اكتب خطة… أي حاجة تخلي دماغك مش فاضي فتجري للفيس. باختصار: التريندات مش هتهرب، ولا هتغيّر مستقبلك. لكن وقتك لو راح… بيرجعش. وده اللي يستاهل تركز فيه.
تم النشر السبت، ٦ ديسمبر ٢٠٢٥
وعليكم السلام ورحمة الله وبركاته. انا كان عندي نفس المشكله تماما بس اللي عملته اني غيرت مسار اهتماماتي تماما ، حذفت فيسبوك وطبعت جدول تتبع العادات وكل يوم يعدي من غير ما احاول انزل فيسبوك بعمل صح ☑ والوقت اللي كنت بضيعه في الفيس بقيت اضيعه ف جروبات التلجرام بتاعت صحابي اللي بيعملوا فيها تحديات مذاكره وبدأت اتشجع واذاكر معاهم بس ما أنكر ان الفتره دي كانت أصعب فتره ف حياتي كنت حاسه اني مدمنه مخدرات مش تطبيق 😂
تم النشر الجمعة، ٥ ديسمبر ٢٠٢٥
تمام شكرا بحاول أبطل
تم النشر الاثنين، ٨ ديسمبر ٢٠٢٥
انا دلوقتي ف اولى جامعه في هندسه وبقولك الاختلاف دا الحاجه اللي انت محتاجها اصلا دا لو عاوز تبقى في كليه أو حته كويسه لأن الاغلبيه عاديين لاكن المختلف هوا اللي ناجح والتريندات حتى لو انت شوفتها هيجيلها وقت وتخلص ويجي غيرها كل اللي هتبقى خسرته وقتك ومذكرتك وافتكر انك بتموت مره واحده على الحاجة انا كنت مدمن ويمكن اكتر منك بس جيت على نفسي عشان فيه غرض وحاجه مش هعرف اعوضعا لاكن لما دخلت الكليه رجعت برضو ولسه بحاول ابطل زي الاول ف السوشيال ميديا عمتا موجوده بس الثانويه هيا لقطه واحده
تم النشر الاثنين، ٨ ديسمبر ٢٠٢٥
واجه الخوف واتعمد انها تفوتك
تم النشر الأحد، ٧ ديسمبر ٢٠٢٥
الموضوه ده هيتلاشي معاك لما تهتم بما ينفعك فقط
تم النشر السبت، ٦ ديسمبر ٢٠٢٥
وانا كمان بجد بس انستجرام
تم النشر السبت، ٦ ديسمبر ٢٠٢٥
احذف الفيسبوك كله
تم النشر السبت، ٦ ديسمبر ٢٠٢٥
الشكر لله
تم النشر الجمعة، ٥ ديسمبر ٢٠٢٥
تمام شكرا
تم النشر الجمعة، ٥ ديسمبر ٢٠٢٥
احذف التطبيق وأبدأ تتعامل مع المشاعر دي وحل المشكله. انا كان عندي مشكله المثاليه اللي هو لازم ابقى عارفه كل حاجه في الكوكب بحيث لو حد سألني ابقى عارفه كل حاجه . حاليآ بتجنب اعرف اي ترند أو أي اغنيه جديده وبتعمد لو حد سألني اقول معرفش لان الحاجه دي مبقتش من اهتماماتي حتى لو انا عارفه الاغنيه دي اي أو بتاعت انهي ترند
تم النشر الجمعة، ٥ ديسمبر ٢٠٢٥
المشكله اني بقلق من أن افوت أحداث مهمه وأخبار اخواتي أو صحابي ودا الي مخليني مش ماسحه
تم النشر السبت، ٦ ديسمبر ٢٠٢٥
المشكله عندي إني بخاف تفوتني أخبار مهمه أو أشياء الناس بتتكلم عنها وانا مش عارف حاجه عنها وأنا ماسحه فا دا الي مانعني امسحه
تم النشر الجمعة، ٥ ديسمبر ٢٠٢٥
لعرض السؤال في فدني اضغط هنا