السلام عليكم، الإعجاب ممكن يكون عشان صورة خارجية أنتِ شايفاها منه لكن مش ضروري تكون الصورة صح وممكن لو أخدتِ خطوة نحوه بنفسك تندمي بعدين لما تكتشفي إنه كان غير ما أنتِ متخيلة أو تتعمقي في مشاعرك مع الوقت من طرف واحد ويبقى صعب التخلص منها. أنتِ دلوقتي على البر، الإعجاب مدخل للحب والتعلق لكن ممكن نوقف عند مرحلة إعجاب وخلاص. ___ إذا الشخص ده كان مهتم وحاول يقرب منك فوقتها ممكن تفتحي الباب بالطريقة الوحيدة المباحة وهي إنك تعطيه رقم أهلك وهو يتقدم زي أي شخص بيتقدم لك حاليًا وتقييمه كخاطب بعيدًا عن مسألة الإعجاب والمشاعر عشان تعرفي تقييمي صح. المشاعر للأسف لو سيطرت دلوقتي أو في فترة الخطبة لو حصل نصيب فهتأثر على حكمك وهتخليكِ تتنازلي أو تتغاضي عن عيوب واضحة على أمل تغيير الشخص بعد الزواج أو تتجاوزي عن أشياء كتير أو متشوفيهاش من الأساس. تعاملي عادي معه في حدود الشغل والتزمي بالحدود اللي وضعها الدين بين الجنسين وركزي في حياتك وإذا فيه ناس بتتقدم عادي اقعدي معهم ممكن تلاقي فيهم إن شاء الله حد تُعجبي به ويكون نصيبك.. محدش عارف النصيب فين. ربنا يكتب لك الخير حيثما كان ويرضيك به.
شكرا جدا
تم النشر الاثنين، ٢٦ مايو ٢٠٢٥
لعرض الإجابة في فدني اضغط هنا