السلام عليكم، على فكرة بيحصل مع كتير مننا، بعد الموقف ما بيعدي الواحد يفضل يتخيل ويقول كان ممكن أقول كذا ولا أرد بكذا وبيجي في بالك ردود مثالية وتندم إنك مقلتهاش. فعادي، تعامل مع الأمر إنه عادي ومنتشر. وحاول تفرق بين إنك مش بتعرف تتكلم أو فاشل في الكلام وبين إنك مقلتش أفضل حاجة عندك. طبيعي إن بعد ما الموقف يعدي وعقلك يكون أهدى إنه يفكر بروية وهدوء ويخترع ردود مثالية فمتحسش بالذنب وتفضل تقارن أو تحسس نفسك إنك فاشل في الكلام، لأن الموقفين مختلفين وطبيعي رد الفعل يختلف. الأفضل طبعا تبعد عن الخناقات والنقاشات الحادة اللي مفيش منها فائدة لكن لو مضطر فحاول تدرب نفسك على الهدوء والتحكم في الأعصاب بحيث متكونش ردودك متسرعة. لو لقيت نفسك بتفكر وبتقول لو، على طول رجع تفكيرك لأن خلاص الموقف عدى و(لو) مش هتغير حاجة وإيه اللي ممكن تعمله في موقف مشابه بعد كده عشان متكررش الغلط أو الكلام اللي ندمت عليه. *** طبعا لو التفكير ده بيقعد لساعات طويلة أو بيؤثر سلبا على حياتك وشغلك فالأفضل تتابع مع مختص يساعدك تتخلص منه. بس أعتقد بما إن الموضوع منتشر فهو إن شاء الله سهل تتعامل معه، ومش محتاج منك تفضل ضاغط نفسك او تحوله لمشكلة وعقدة.
لعرض الإجابة في فدني اضغط هنا