هي الفكرة كلها إن الدنيا متقلبة ومحدش عارف بكرة فيه إيه. انتي دلوقتي بتقولي إنك في بيئة ووضع مادي كويس وماما بتعمل لك كل حاجة. حتى لو مش معاك شهادة كلية فانتي محتاجة تعليم ومحتاجة يكون في إيدك مهارة أو علم تقدري تستخدميه في مستقبلك ووقت تحتاجي وظيفة واستقلال مادي. محدش ضامن الظروف. انتي ممكن الكلية اللي دخلتيها مش حاباها وممكن عقلك احتاج يرتاح من الضغط اللي كان عليه في المدرسة. بالمختصر ممكن انتي وصلتِ لحالة احتراق نفسي ووظيفي وعقلك احتاج يفصل. اقعدي مع نفسك ورتبي أفكارك واعرفي إن ربنا خلقك لهدف... ربنا خلقك لعبادته لكن العبادة مش معناها الصلاة والصوم والدعاء بس. العبادة معناها تعيشي حياتك صح وتتعلمي وتبري والدتك وتعملي الواجب اللي عليكِ تجاهها وتجاه نفسك وتتفوقي عشان متكونيش عالة على حد بعد كده. تتعلمي حاجة تنتفعي بها وتقدري يكون في إيدك فلوس تتصدقي بها وتساعدي غيرك من المحتاجين. يكون معك شهادة أو وظيفة تنفعك لو لا قدر الله تقلبت الدنيا والأحوال. والدتك أكيد كل ما مسؤوليات الحياة بتكبر عليها وكل ما الظروف الاقتصادية بتصعب علينا هي أكيد بتتأثر حتى لو مش بتشاركك همومها وأكيد هتحتاج لك بعد كده. فيه جملة انتي قلتيها (كلها يومين وهنموت فنعيش وننبسط) والحقيقة إن ديننا مش بيقول كده، أيوه مش بيقول نعيش في نكد لكن فيه توازن... فيه سعي... فيه عمل عشان الدنيا باختصار مزرعة الآخرة. انتي في الدنيا عشان تزرعي لآخرتك وتحجزي مكانك في الجنة بطاعة ربنا ونجاحك في الاختبار. الرسول قال (إذا قامت الساعة وفي يد أحدكم فسيلة فليغرسها) معنى كده إن لآخر لحظة مطلوب مننا السعي والعمل... يعني خلاص القيامة هتقوم والشخص ده مش هيشوف أصلا ثمرة الغرسة اللي هيغرسها لكن المطلوب يعمل ويسعى وربنا بيجازي على السعي في النهاية. ربنا يوفقك لما يحب ويرضى وينفع بك ويديم عليكِ نعمه. بالتوفيق.
معاكي حق فعلا انا كنت فاكرة إن العبادة هي الصلاة والصوم واني بلبس واسع أو بقرأ قرآن خلاص انا كده ضامنة جنة،لكن فعلا العمل عبادة،بس ربنا يعلم اني عمري مااذيت حد وطيبة وبحب الخير للناس والناس كلها بتحبني الحمدلله حتى اهلي بعاملهم حلو جدا وبقولهم دايما كلام حلو وبقدرهم انا غالبا بأذي نفسي بس اني مش بركز في مستقبلي وبرضو بأذي اهلي فعلا عشان ماما قلبها بيوجعها عشان مش بذاكر وبتقعد تتحايل عليا اذاكر بس انا معنديش هدف قوي اذاكر عشانه بصراحة وبحس ان محدش زيي
تم النشر الخميس، ١٧ أكتوبر ٢٠٢٤
لعرض الإجابة في فدني اضغط هنا